ކާބޯ ވާޑޭގެ ކީޕަރުގެ މަންމައަށް އެމެރިކާއަށް ދެވޭނެ މަގު ފަހިކޮށްދެނީ

ވޯލްޑް ކަޕްގައި ކުޅެމުންދާ ކާބޯ ވާޑޭގެ ގޯލްކީޕަރު ވޮޒީނިއާގެ މަންމައަށް، ދަރިފުޅުގެ ކުޅުން ބަލާލުމަށް އެމެރިކާއަށް ދިޔުމުގެ ފުރުސަތު ހޯދައިދިނުމަށް އެމެރިކާގެ ސްޓޭޓް ޑިޕާޓްމަންޓުން މަސައްކަތް ފަށައިފިއެވެ.

ސްޓޭޓް ޑިޕާޓްމަންޓުގެ އޮފިޝަލަކު މިކަން ހާމަކުރެއްވީ، ވިސާ ބޮންޑަށް ދައްކާނެ ފައިސާ ނެތުމުން މަންމައަށް އެމެރިކާއަށް ދަތުރުނުކުރެވުނު ކަމަށް ބުނެ ވޮޒީނިއާ ކަންބޮޑުވުން ފާޅުކޮށްފައިވަނިކޮށެވެ.

މިދިޔަ ހޯމަ ދުވަހު ވަރުގަދަ ސްޕެއިންއާ ދެކޮޅަށް ކާބޯ ވާޑޭ ކުޅެ، ހައިރާންކުރުވަނިވި ނަތީޖާއަކުން އެއްވަރުވި މެޗަށްފަހު ނޫސްވެރިންނާ ވާހަކަދައްކަމުން އުމުރުން 40އަހަރުގެ ކީޕަރު ބުންޏީ، ވިސާގެ ކަންތައްތައް ހުރިގޮތުންނާއި ބޮންޑަށް ދައްކަންޖެހޭ ފައިސާ ނެތުމުން މަންމައަށް އެ މެޗަށް ނާދެވުނު ކަމަށެވެ. "ވިސާގެ ކަންތައްތައް ހުރިގޮތުންނާއި، ވިސާއަށް ދައްކަންޖެހޭ ފައިސާ ނެތުމުން މަންމައަށް މިކޮޅަށް ނާދެވުނީ"ވޮޒީނިއާ ބުންޏެވެ. "ވަގުތަށް ކަންކަން ހަމަނުޖެހުނީ. އަހަރެން ބޭނުންވޭ މަންމަ މިތަނުގައި ހުންނަން"

އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަރުކާރުން ވަނީ ވިސާގެ މުއްދަތު ހަމަވުމަށްފަހު އެ ގައުމުގައި މަޑުކުރާ މީހުން ގިނަވުމުގެ ސަބަބުން، ކާބޯ ވާޑޭ ހިމެނޭހެން 50ގައުމެއްގެ ރައްޔިތުން ވިސާ ހޯދުމަށް 15,000ޑޮލަރާ ހަމައަށް ބޮންޑެއް ދައްކަންޖެހޭ ގޮތަށް ހަމަޖައްސާފައެވެ. ނަމަވެސް އެމެރިކާގެ ސްޓޭޓް ޑިޕާޓްމަންޓުން ބުނީ ކުޅުންތެރިޔާގެ މަންމަ ވިސާއަށް އެދިފައިވާކަމުގެ އެއްވެސް ރިކޯޑެއް ނެތް ކަމަށާއި، ކުޅުންތެރިންގެ އާއިލާގެ މެންބަރުން މި ބޮންޑު ދައްކަން ނުޖެހޭނެ ކަމަށެވެ.

ސްޓޭޓް ޑިޕާޓްމަންޓުގެ އޮފިޝަލް ވިދާޅުވީ، ކުޅުންތެރިންގެ ހުރިހާ އާއިލީ މެންބަރުންވެސް ވިސާ ބޮންޑުން އިސްތިސްނާ ވާނެ ކަމަށާއި، ވިސާގެ ކަންކަމުގައި އެހީތެރިވުމަށް މިހާރު އެ އާއިލާއާ މުއާމަލާތް ކުރަމުންދާ ކަމަށެވެ. ރިޕޯޓުތައް ބުނާގޮތުން ވޮޒީނިއާގެ މަންމަގެ އަތުގައި މި ވަގުތު މުއްދަތު ހަމަނުވާ ޕާސްޕޯޓެއް ނެތުމުން، އޭނާ މިހާރު ދަނީ އައު ޕާސްޕޯޓެއް ހެއްދުމުގެ މަސައްކަތް ކުރަމުންނެވެ.

ޕޯޗުގަލްގެ ދެވަނަ ޑިވިޝަނުގައި ކުޅެމުން އަންނަ ވޮޒީނިއާ ވަނީ ވޯލްޑް ކަޕްގެ ފުރަތަމަ މެޗުގައި ސްޕެއިންގެ ވަރުގަދަ ހަމަލާތައް ދިފާއުކޮށް، ކުރު މުއްދަތެއްގެ ތެރޭގައި ބޮޑު މަޝްހޫރުކަމެއް ހޯދާފައެވެ. ގާތްގަނޑަކަށް 530,000މީހުންގެ އާބާދީއެއް އޮންނަ ކާބޯ ވާޑޭއިން ހޯދި މި ތާރީޚީ ކާމިޔާބީއާ އެކު، ވޮޒީނިއާގެ އިންސްޓަގްރާމް ފޮލޯވަރުންގެ އަދަދު ވަނީ 50,000އިން 9.7މިލިއަނަށް ވުރެ މައްޗަށް އުފުލިފައެވެ. ކާބޯ ވާޑޭ ދެން ކުޅޭ މެޗުގައި އަންނަ އާދީއްތަ ދުވަހު މަޔާމީގައި ބައްދަލުކުރާނީ އުރުގުއޭއާއެވެ.