ވޯލްޑް ކަޕް ގްރޫޕް ޖޭގައި ރާއްޖޭ ގަޑިން ބުދަ ދުވަހުގެ ހެނދުނު ކުޅުނު މެޗުގައި އަލްޖީރިއާ އަތުން 3-0އިން އާޖެންޓީނާ މޮޅުވީ ކެޕްޓަން ލިއޮނަލް މެސީ ކާމިޔާބުކުރި ހެޓްރިކުންނެވެ.
ނަމަވެސް، މި މެޗުގައި މެސީ ކުރި ނުރައްކާތެރި ފައުލަކަށް ރެފްރީ އެއްވެސް ކާޑެއް ނުދައްކައި ދޫކޮށްލުމުން، އޭނާއަށް ރެފްރީންގެ ފަރާތުން "ހާއްސަ އިނާޔަތްތަކެއް"ލިބޭ ކަމަށް ބުނެ ސޯޝަލް މީޑިއާގައި ބޮޑު ބަހުސެއް ވަނީ ފެށިފައެވެ.
މެޗުގައި މެސީ ޖެހި ފުރަތަމަ ގޯލާއި ދެވަނަ ގޯލާ ދެމެދު ހިނގި މި ހާދިސާގައި، އޭނާ ވަނީ އަލްޖީރިއާގެ ކެޕްޓަން އައިސާ މަންޑީގެ ފަހަތުން ގޮސް އޭނާގެ ކަނާތު ފައިގެ ކުޑަކަޅުވާ މަސްގަނޑަށް އަމާޒުކޮށް ވަރުގަދަ ޗެލެންޖެއް ކޮށްފައެވެ. އެ ވަގުތު ބޯޅަ އޮތީ މަންޑީގެ ކޮންޓްރޯލްގެ ދަށުގައި ކަމަށްވާއިރު، މެސީ ހުރި މަގާމުން ބޯޅަ ހޯދުމުގެ ފުރުސަތު ކުޑަ ނަމަވެސް އޭނާ ކުރި ޗެލެންޖުގައި ބޫޓުގެ ދަށްފުށް ވަނީ މަންޑީގެ ފައިގައި ސީދާ ޖެހިފައެވެ.
މި ފައުލާ ގުޅިގެން ޕޮލެންޑުގެ ރެފްރީ ޝިމޮން މާސީނިއަކް ނިންމީ ހަމައެކަނި އަލްޖީރިއާ އަށް ހިލޭ ޖެހުމެއް ދިނުމަށެވެ. މެސީއަށް އެއްވެސް ކާޑެއް ދެއްކުމުގެ ވިސްނުމެއް ރެފްރީ ނުގެންގުޅުނު ނަމަވެސް، ފުޓްބޯޅަ ތަޖުރިބާކާރުން ބުނާ ގޮތުގައި އެއީ އެންމެ ކުޑަމިނުން ރީނދޫ ކާޑެއް، ނުވަތަ ރަތް ކާޑެއް ވެސް ދެއްކުން ހައްގު ނުރައްކާތެރި ފައުލެކެވެ.
މެސީ އެއްވެސް އަދަބަކާ ނުލައި ސަލާމަތްވުމުން، އޭނާގެ އެންމެ ބޮޑު ވާދަވެރިޔާ ކްރިސްޓިއާނޯ ރޮނާލްޑޯގެ ސަޕޯޓަރުން ދަނީ ސޯޝަލް މީޑިއާގައި ސުވާލު އުފައްދަމުންނެވެ. ރޮނާލްޑޯގެ ސަޕޯޓަރުން ބުނާ ގޮތުގައި މެސީއަށް ރެފްރީންގެ ހާއްސަ ލުއިތަކެއް ލިބެއެވެ. އެހެންކަމުން، މިއީ ހަމައެކަނި މެސީގެ ނަސީބު ރަނގަޅުވުންތޯ ނުވަތަ އޭނާއަށް ލިބޭ ހާއްސަ އިނާޔަތެއްތޯ ކުރެވޭ ބަހުސް މިހާރު ވަނީ ވަރަށް ބޮޑަށް ހޫނުވެފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.