ފުޓްބޯޅަ ނުކުޅެ ފަސްމަސްވީ ނަމަވެސް އިރާންގެ ހިތްވަރު ދައްކާލައިފި

ލޮސް އެންޖެލިސް ސްޓޭޑިއަމްގައި ކުޅުނު ފޯރިގަދަ ވޯލްޑް ކަޕް މެޗްގައި، ތެހެރާންގެ ސަރުކާރާ ދެކޮޅަށް ކުރި މުޒާހަރާތަކާއި އެމެރިކާ-އީރާން ހަނގުރާމަ ނިންމުމަށް ސޮއިކުރި ސުލްހައިގެ އެއްބަސްވުމުގެ ސަބަބުން އުފެދުނު ނުތަނަވަސްކަމުގެ ތެރެއިން، އީރާނުން ދެ ފަހަރު ފަހަތުން އަރައި ނިއުޒީލެންޑާ 2-2 އިން އެއްވަރުކޮށްފިއެވެ.

ހޯމަ ދުވަހު ކުޅުނު މި މެޗުގެ ދަނޑުން ބޭރުގައި ސަލާމަތީ ކަންކަން ވަރުގަދަކޮށްފައިވުމާއި، ދަނޑުން ބޭރުގައި ކުރި މުޒާހަރާތަކަކީ މެޗާ ގުޅިގެން ކުރިމަތިވި ބޮޑެތި ކަންބޮޑުވުންތަކެވެ.އަދި ކްރިސް ވުޑް ތަނަވަސްކޮށްދިން ފުރުސަތަކުން، އޭރިއާ ތެރެއިން އެލީޖާ ޖަސްޓް ފޮނުވާލި ވޮލީއަކުން ނިއުޒީލެންޑުން މެޗުގެ ކުރީކޮޅު ލީޑު ނެގުމުން، އީރާން ސަރުކާރަށް ފާޑުކިޔާ ބައެއް ސަޕޯޓަރުން ވަނީ ނިއުޒީލެންޑްގެ ސަޕޯޓަރުންނާ އެކު އުފާފާޅުކޮށްފައެވެ.

ސަރުކާރާ ދެކޮޅު މި ސަޕޯޓަރުންގެ ތެރެއިން ގިނަ ބަޔަކު ވަނީ ފީފާގެ ގަވާއިދުތަކާ ހިލާފަށް، އީރާނުގެ އިސްލާމީ އިންގިލާބުގެ ކުރީގެ "ލަޔަން އެންޑް ސަން" ދިދަ ހިފައިގެން ދަނޑަށް ވަދެފައެވެ. މީގެ އިތުރުން މެޗު ފެށުމުގެ ކުރިން އީރާނުގެ ގައުމީ ސަލާމް ކިޔަމުންދިޔަ ވަގުތު ބައެއް މީހުން ވަނީ އަޑުގަދަކޮށް ހުރަސްއަޅާފައެވެ.

ނަމަވެސް ދަނޑަށް ވަދެތިބި 70،000 އަށް ވުރެ ގިނަ ސަޕޯޓަރުންގެ ބޮޑު ބައެއް ތިބީ "ޓީމް މެލީ" އާއެކުގައެވެ. އެމީހުން ދިޔައީ "އީ-ރާން! އީ-ރާން!" އޭ ކިޔައި އަޑުގަދަކުރަމުންނެވެ. އަދި މެޗުގެ ބައިގަޑިއިރު ހަމަވިތަނާހެން ރާމިން ރެޒައިއާން ލަނޑެއް ޖަހައި ނަތީޖާ ހަމަހަމަކޮށްދިނުމުން ދަނޑު ގުގުމާލިއެވެ.

އެމެރިކާއާއި އިސްރާއީލުގެ ވައިގެ ހަމަލާތަކާ ގުޅިގެން އީރާނުގެ ލީގު މެދުކަނޑާލުމުން، ފެބްރުއަރީ މަހުން ފެށިގެން ކްލަބް ފުޓްބޯޅަ ކުޅެފައިނުވާ އީރާނުގެ ކުޅުންތެރިންގެ ތެރޭގައި ހިމެނޭ ރެޒައިއާން ވަނީ، ބްލޮކްވި ބޯޅައަކަށް ހުޝިޔާރުކަމާ އެކު އަރައި، ކުރިއަށް ނިކުތް ކީޕަރުގެ ބޯމަތިން ގޯލުގެ ތެރެއަށް ބޯޅަ ފޮނުވާލާފައެވެ.

ދެވަނަ ހާފުގެ ކުރީކޮޅު ވުޑްއާއި ޖަސްޓްގެ ފަރާތުން އަނެއްކާ ވެސް މޮޅު ކުޅުމެއް ފެނިގެންދިޔައެވެ. ނިއުޒީލެންޑްގެ ކެޕްޓަން ތަނަވަސްކޮށްދިން ފުރިހަމަ ޕާހަކުން، އުމުރުން 26 އަހަރުގެ ފޯވާޑް ޖަސްޓް ވަނީ ބާރު ހަމަލާއަކުން ގޯލު ކާމިޔާބުކޮށް "އޯލް ވައިޓްސް"އަށް އަލުން ލީޑު ހޯދައިދީފައެވެ.

އީރާނުން މެޗުގެ ނަތީޖާ އަލުން ހަމަހަމަކުރީ އޭގެ 10 މިނެޓު ފަހުން މުހައްމަދު މުހައްބީ ކާމިޔާބުކޮށްދިން މޮޅު ލަނޑުންނެވެ. އޭނާ މި ލަނޑު ޖެހީ ރެޒައިއާން ނަގައިދިން ހުރަސް ބޮލުން ގޯލުގެ ދުރު ކަނަށް ފޮނުވާލައިގެންނެވެ.

މި މެޗު އެއްވަރުވުމާއި ބެލްޖިއަމްއާއި މިސްރު 1-1އިން އެއްވަރުވުމުން، ގްރޫޕް ޖީގައި ހިމެނޭ ހުރިހާ ޓީމަކަށް މިހާރު ވަނީ އެއް ޕޮއިންޓް ލިބިފައެވެ.

ވޯލްޑް ކަޕްގައި ތިންވަނަ ފަހަރަށް ވާދަކުރާ ނިއުޒީލެންޑަށް، މި މުބާރާތުގައި ކުޅުނު ހަތް މެޗުން ވެސް އަދި މޮޅެއް ހޯދިފައެއް ނުވެއެވެ. އީރާނުން މަސައްކަތް ކުރަމުންދަނީ ފުރަތަމަ ފަހަރަށް މުބާރާތުގެ ނޮކައުޓް ބުރަށް ދަތުރުކުރުމަށެވެ.

މި މެޗުން ވަނީ އެމެރިކާގައި ދިރިއުޅޭ އީރާން ރައްޔިތުންގެ މެދުގައި އޮތް ބައިބައިވުންތައް ހާމަވެފައެވެ. ގިނަ ބަޔަކު ބުނި ގޮތުގައި، ކުޅިވަރުގެ އެންމެ ބޮޑު މައިދާނުގައި އީރާން ވާދަކުރާތީ ލިބޭ ފަޚުރާއި، ތެހެރާން ސަރުކާރުން މުޒާހަރާގެ ބައިވެރިންނާ ދެކޮޅަށް ހިންގާ އަނިޔާވެރިކަމަށް ކުރެވޭ ނަފުރަތާއި، އަދި ވޮޝިންގޓަނުން ދެމުންދާ ބޮން އެޅުމުގެ ހަމަލާތަކާ މެދު ކުރެވޭ ކަންބޮޑުވުންތަކުގެ މެދުގައި އެމީހުން ތިބީ ގޮތް ހުސްވެފައެވެ.

މެޗު ފެށުމުގެ ކުރިން، ދަނޑުން ބޭރަށް 300 އާއި 500 އާ ދެމެދުގެ އަދަދެއްގެ މުޒާހަރާގެ ބައިވެރިން އެއްވެ، ސަރުކާރާ ދެކޮޅު ބޯޑުތަކާއި ދިދަތައް ހޫރަމުންދިޔައެވެ.

އެމެރިކާގައި ދިރިއުޅޭ ބައެއް އީރާން ރައްޔިތުން ބުނި ގޮތުގައި މެޗު ބަލަން ދިއުމަކީ އީރާން ސަރުކާރަށް ތާއީދުކުރުން ކަމަށް ބެލެވިދާނެއެވެ. ނަމަވެސް އަނެއް ބަޔަކު ބުނީ ސިޔާސީ ކަންކަން އެއްފަރާތްކޮށް، ކުޅުންތެރިންނަށް ސަޕޯޓްކުރަން ބޭނުންވާ ކަމަށެވެ.

އީރާނުން ދެން ކުޅޭ މެޗުގައި އަންނަ އާދީއްތަ ދުވަހު ލޮސް އެންޖެލިސްގައި ބެލްޖިއަމްއާ ދެކޮޅަށް ނިކުންނައިރު، ނިއުޒީލެންޑް ބައްދަލުކުރާނީ ވެންކޫވަރގައި މިސްރާއެވެ.