ނިއުކާސަލްގެ އެންތަނީ ގޯޑަން ބާސެލޯނާއަށް ސޮއިކޮށްފި

ބާސެލޯނާގެ ކުރިމަގަށް އެޓޭކިންގް ލައިން ވަރުގަދަކުރުމުގެ ގޮތުން ނިއުކާސަލްގެ އެންމެ ގިނަ ލަނޑު ޖެހި ކުޅުންތެރިޔާ ބޮޑު އަގަކަށް ވިއްކާލައިފިއެވެ.

ނިއުކާސަލް ޔުނައިޓެޑުން އެންތަނީ ގޯޑަން ބާސެލޯނާއަށް ބަދަލުވިކަން ހުކުރު ދުވަހު އެ ކްލަބުން ކަށަވަރުކޮށްދީފައިވާއިރު، މި ޓްރާންސްފާގެ އަގު 80 މިލިއަން ޔޫރޯ (93 މިލިއަން ޑޮލަރު)އަށް އަރާނެ ކަމަށް ބެލެވެއެވެ.

ބާސެލޯނާއިން ނެރުނު ކުރު ބަޔާނެއްގައި ބުނެފައިވަނީ ގޯޑަން ސޮއިކުރާނީ "ކުރިއަށް އޮތް ފަސް ސީޒަނަށް، 30 ޖޫން 2031 ގެ ނިޔަލަށް" ކަމަށެވެ.

އުމުރުން 25 އަހަރުގެ ވާތްފަރާތުން ކުޅޭ ވިންގަރ ވަނީ މި ސީޒަނުގައި ނިއުކާސަލްއަށް 17 ލަނޑު ޖަހައިދީފައެވެ. މީގެ ތެރެއިން 10 ލަނޑު ޖެހީ ޗެމްޕިއަންސް ލީގުގައެވެ. އޭނާއަކީ އެ ކްލަބަށް މި ސީޒަނުގައި އެންމެ ގިނަ ލަނޑު ޖަހައިދިން ކުޅުންތެރިޔާއެވެ.

އިނގިރޭސިވިލާތުގެ ވޯލްޑް ކަޕް ސްކޮޑުގައި ހިމެނޭ ގޯޑަން ބާސެލޯނާގެ އެޓޭކަށް އިތުރުވެގެންދާއިރު، އެ ކްލަބުގެ ކޮންޓްރެކްޓް ހަމަވުމުން ޕޮލެންޑުގެ ތަޖުރިބާކާރު ފޯވާޑް ރޮބަޓް ލެވަންޑޯވްސްކީ ކްލަބް ދޫކޮށްދާނެއެވެ. އަދި މެންޗެސްޓަރ ޔުނައިޓެޑުން ލޯނުގެ ދަށުން ކުޅެމުންދާ މާކަސް ރަޝްފޯޑް ވެސް ލޯނު މުއްދަތަށްފަހު އެނބުރި ހިނގައިދާނެ ކަމަށް ބެލެވެއެވެ.

ލަލީގާގެ ޗެމްޕިއަން ބާސެލޯނާއިން ކުރިއަށް އޮތް ހަފުތާތަކުގައި ޓީމު އިތުރަށް ވަރުގަދަކުރަން ބޭނުންވާއިރު، އެތުލެޓިކޯ މެޑްރިޑްގެ ފޯވާޑް ހޫލިއަން އަލްވަރޭޒް ކެޓަލޯނިއާއަށް ބަދަލުވެދާނެކަމުގެ އަޑުތައް ވަނީ ގަދަވެފައެވެ. އަދި ރަޝްފޯޑް ޓީމުގައި ބެހެއްޓުމަށް އާ މަސައްކަތްތަކެއް ކުރުމުގެ ފުރުސަތު ވެސް އެ ކްލަބުން ބަންދެއް ނުކުރެއެވެ.

ވޭތުވެދިޔަ ތިން އަހަރު ހަރަދުތައް ކުޑަކުރުމަށް ފަހު، އަދި ބައެއް މިންވަރަކަށް އަލުން އިމާރާތްކުރި ކޭމްޕް ނޯ ސްޓޭޑިއަމް އަލުން ހުޅުވުމާ އެކު، ލަލީގާގެ ހަރުކަށި ފައިނޭންޝަލް ފެއާ ޕްލޭ ގަވާއިދުތަކުގެ ތެރެއިން ބާސާއަށް މިހާރު މާލީ ގޮތުން ކުރިއަށްވުރެ ބޮޑު ލުޔެއް ލިބިފައިވެއެވެ.

ލެވަންޑޯވްސްކީ ކްލަބް ދޫކޮށްލުމާއި ރަޝްފޯޑްގެ ލޯނު މުއްދަތު ހަމަވުމުން ބާސާއަށް ހަރަދުކުރުމުގެ ފުރުސަތު ލިބޭއިރު، ރޫނީ ބާޑްޖީ، އަންސީ ފާޓީ އަދި މާކް-އަންދްރޭ ޓާ ސްޓޭގަން ފަދަ އެހެން ކުޅުންތެރިން ވެސް ކްލަބް ދޫކޮށް ހިނގައިދާނެއެވެ.

މިއީ ނިއުކާސަލްގެ ތާރީޚުގައި ވެސް ދެވަނައަށް އެންމެ ބޮޑު އަގަކަށް ވިއްކާލި ކުޅުންތެރިޔާއެވެ. އެންމެ ބޮޑު އަގަކަށް ވިއްކާލީ މިދިޔަ ހޫނު މޫސުމުގައި ލިވަޕޫލުން 125 މިލިއަން ޕައުންޑް (168 މިލިއަން ޑޮލަރު) އަށް ގަތް އަލެކްސަންޑާ އިސާކްއެވެ.

ޚަބަރުތައް ބުނާގޮތުން، ޕްރިމިއާ ލީގުގެ ނިއުކާސަލްއިން އޭނާގެ ބަދަލުގައި ރެއާލް ބެޓިސްގެ ވިންގަރ އެޒް އަބްޑޭ ހޯދުމަށް މަސައްކަތް ކޮށްފާނެއެވެ.

ގޯޑަން 2023 ވަނަ އަހަރު ނިއުކާސަލްއާ ގުޅުނީ އެވަޓަންއިން 45 މިލިއަން ޕައުންޑަށެވެ. އަދި ސެއިންޓް ޖޭމްސް ޕާކުން އޭނާ ބަދަލުވުމުން ލިބޭ ފައިދާގެ 15 އިންސައްތަ މާސީސައިޑްގެ އެވަޓަންއަށް ލިބޭނެއެވެ.