ޕްރީ ސީޒަންގައި ވޮރިއަރސްއިން ކިންގްސް ބަލިކޮށްފި

ސެން ފްރެންސިސްކޯގެ ޗޭސް ސެންޓަރގައި ކުޅުނު އެންބީއޭ ބާސްކެޓްބޯޅަ މުބާރާތުގެ ޕްރީ ސީޒަން މެޗެއްގައި ސެކްރެމެންޓޯ ކިންގްސްއާ ވާދަކޮށް، 111-106ޕޮއިންޓުން ގޯލްޑަން ސްޓޭޓް ވޮރިއަރސް މޮޅުވެއްޖެއެވެ.

ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔަ މި ކުރިމަތިލުމުގައި، ފުރަތަމަ ކުއާޓަރުގެ ކުރި ލިބުނީ އެއް ޕޮއިންޓުގެ ތަފާތަކުން ކިންގްސްއަށެވެ. އެހެންނަމަވެސް، ދެވަނަ ކުއާޓަރުގައި ވޮރިއަރސް އިން ކުޅުން ރަނގަޅުކޮށް، ފަސް ޕޮއިންޓުގެ ލީޑަކާއެކު ފުރަތަމަ ހާފު ނިންމާލިއެވެ. ތިންވަނަ ކުއާޓަރުގައި ލީޑު އިތުރަށް ފުޅާކޮށް އަށް ޕޮއިންޓުގެ ތަފާތަކާ އެކު ވޮރިއަރސް ކުރީގައި އޮތްއިރު، ފަހު ކުއާޓަރުގައި ކިންގްސްއިން ނަތީޖާ ހަމަހަމަކުރަން ކުރި މަސައްކަތް ވަނީ ނާކާމިޔާބުވެފައެވެ. މި މެޗުގައި ވޮރިއަރސްގެ ޔަކްސެލް ލެންޑެބޯގް ވަނީ 23ޕޮއިންޓާއި 10ރީބައުންޑް އަދި 6އެސިސްޓާއެކު މޮޅު ކުޅުމެއް ދައްކާފައެވެ. ބްރެންޑަން ވިލިއަމްސް 19ޕޮއިންޓް އަދި ގުއި ސެންޓޮސް 15ޕޮއިންޓް ހޯދިއިރު، ކިންގްސްއަށް އެންމެ ގިނަ ޕޮއިންޓް އެއްކޮށްދިނީ 25ޕޮއިންޓާއި 8އެސިސްޓް ހެދި ޑާރިއަސް އަކުފް ޖޫނިއަރއެވެ.

ޕްރީ ސީޒަންގައި ކުޅުނު އެހެން މެޗަކަށް ބަލާއިރު، ފިލަޑެލްފިއާ ސެވަންޓީ ސިކްސަރސްގެ މައްޗަށް ބޮސްޓަން ސެލްޓިކްސްއިން ވަނީ 144-106ގެ ބޮޑު ތަފާތަކުން ކާމިޔާބީ ހޯދާފައެވެ. ބޮސްޓަންގެ ޓީޑީ ގާޑެންގައި ކުރިއަށްދިޔަ މި މެޗު ފެށުނީއްސުރެ ކޮންޓްރޯލް ކުރީ ސެލްޓިކްސްއިންނެވެ. ފުރަތަމަ ހާފު 21ޕޮއިންޓުގެ ލީޑަކުން ނިންމާލި ސެލްޓިކްސްއިން މެޗު ނިންމާލީ 38ޕޮއިންޓުގެ ފަރަގަކުންނެވެ. ސިކްސަރސްގެ މުހިންމު ކުޅުންތެރިން ކަމަށްވާ ޖޮއެލް އެމްބިޑް، ލެބްރޮން ޖޭމްސް އަދި ޖޭލެން ބްރައުން މި މެޗުގައި ނުކުޅޭކަން ފާހަގަކުރެވުނެވެ. ސެލްޓިކްސްގެ ޕޭޓަން ޕްރިޗާޑް 25ޕޮއިންޓް ހޯދިއިރު ޖޭސަން ޓެޓުމް ވަނީ 23ޕޮއިންޓް ސްކޯކޮށްފައެވެ. ސިކްސަރސްއަށް އެންމެ ރަނގަޅު ކުޅުމެއް ދެއްކީ 19ޕޮއިންޓް ހޯދި ވީޖޭ އެޖްކޯމްބްއެވެ.

މީގެ އިތުރުންވެސް ޕްރީ ސީޒަންގެ ގިނަ މެޗުތަކެއް ވަނީ ކުޅެފައެވެ. އެގޮތުން ލޮސް އެންޖަލިސް ކްލިޕަރސް އަތުން 114-106އިން ޓޮރޮންޓޯ ރެޕްޓަރސް މޮޅުވިއިރު، އިންޑިއާނާ ޕޭސަރސް ބަލިކޮށް އެޓްލާންޓާ ހޯކްސް ކުރިހޯދީ 119-117އިންނެވެ. އޯވަރ ޓައިމް ކުޅެގެން ޑެޓްރޮއިޓް ޕިސްޓަންސްގެ މައްޗަށް 114-108އިން ވޮޝިންގޓަން ވިޒަޑްސް ކާމިޔާބު ހޯދިއެވެ. އަދި މައާމީ ހީޓް އަތުން 125-124ގެ ހަނި ތަފާތަކުން މިނެސޯޓާ ޓިމްބަރވުލްވްސް މޮޅުވިއިރު، ސެންއެންޓޯނިއޯ ސްޕަރސްގެ މައްޗަށް ފީނިކްސް ސަންސްއިން ވަނީ 102-98އިން ކުރިހޯދާފައެވެ.