ޑަބްލިއުޓީއޭގެ އިނާމުތައް ފައިސާއިން ދޭން ނިންމައިފި

އަންނަ އަހަރުން ފެށިގެން ޑަބްލިއުޓީއޭ 1000ގިންތީގެ އެންމެހާ ޓެނިސް މުބާރާތްތަކެއްގައި އަންހެން އަދި ފިރިހެން ކުޅުންތެރިންނަށް އެއް ހަމައަކުން އިނާމު ފައިސާ ދިނުމަށް ވިމެންސް ޓެނިސް އެސޯސިއޭޝަން (ޑަބްލިއުޓީއޭ)އިން ނިންމާފައިވާކަން އެ އިދާރާއިން އިއްޔެ އިއުލާނުކޮށްފިއެވެ. 

މި ތާރީޚީ ނިންމުމުގެ ސަބަބުން، ކެނޭޑިއަން އޯޕަންއާއި ސިންސިނާޓީ އޯޕަންގެ އިތުރުން އިޓާލިއަން އޯޕަން ފަދަ ބޮޑެތި މުބާރާތްތަކުން ވެސް ދެން އިނާމު ފައިސާ ދޫކުރާނީ ތަފާތުކުރުމެއް ނެތިއެވެ. ކުރިން ވެސް އިންޑިއަން ވެލްސް، މަޔާމީ، މެޑްރިޑް، ޗައިނާ އަދި ޔުނައިޓެޑް ކަޕްގެ އިތުރުން ގްރޭންޑް ސްލޭމްގެ ހަތަރު މުބާރާތުން އައީ މި އުސޫލުން ހަމަހަމަކޮށް ކުޅުންތެރިންނަށް ފައިސާ ދެމުންނެވެ. 

ރޯމްގައި ބާއްވާ އިޓާލިއަން އޯޕަންގެ އިނާމު ފައިސާ ތިން އަހަރުތެރޭ ހަމަހަމަކުރުމަށް އިޓަލީގެ ޓެނިސް ފެޑެރޭޝަނުން 2023ވަނަ އަހަރު އަމާޒު ހިފި ނަމަވެސް، 2025އާ ހަމައަށް ވެސް އެކަން އޮތީ ހާސިލުނުވެފައެވެ. މިކަމާ ގުޅިގެން ޑަބްލިއުޓީއޭގެ ޗެއަރޕާސަން ވެލެރީ ކެމީލޯ ވިދާޅުވީ، މިއީ މުޅި ޓެނިސް އާއިލާއަށް ލިބުނު ފާހަގަކޮށްލެވޭ ބޮޑު ކާމިޔާބީއެއް ކަމަށެވެ. އަދި މިއީ އެތުލީޓުންގެ މެދުގައި މާލީ އަދި ވާދަވެރިކަމުގެ ހަމަހަމަކަން ގާއިމުކުރުމަށް އެ ޖަމުއިއްޔާއިން ކުރަމުންދާ މަސައްކަތާއި، ޖަމުއިއްޔާގެ އަސްލު މަގުސަދު ދައްކުވައިދޭ އަލިގަދަ ހެއްކެއްކަން އޭނާ ފާހަގަކުރެއްވިއެވެ.

ކުރިއަށް އޮތް އަހަރުގެ ޓެނިސް ކަލަންޑަރު އެކުލަވާލާފައިވާއިރު، 26ގައުމެއްގައި ޖުމްލަ 55މުބާރާތް ކުޅުމަށް ވަނީ ތާވަލުކޮށްފައެވެ. މީގެ އިތުރުން، ސީޒަންގެ ފަހު މުބާރާތް ކަމަށްވާ "ޑަބްލިއުޓީއޭ ފައިނަލްސް"އަންނަ އަހަރުން ފެށިގެން މަދުވެގެން ތިން އަހަރު ވަންދެން ކުރިއަށްދާނީ އެމެރިކާގެ ނޯތު ކެރޮލީނާ ސްޓޭޓްގެ ޝާލޮޓް ސިޓީގައެވެ.