އިޓަލީގެ ޤައުމީ ޓީމާއި ކަގްލިއާރީއަށް ކުޅެމުން އަންނަ އުމުރުން 24އަހަރުގެ މިޑްފީލްޑަރު ޑެނިއެލް މަލްޑިނީ، ޤާނޫނުން ހުއްދަކުރާ މިންވަރަށް ވުރެ ގިނައިން ބަނގުރާ ބޮއެގެން ހުރެ އާދީއްތަ ދުވަހުގެ ރޭ ދުއްވި ކާރެއް އެކްސިޑެންޓުވުމާ ގުޅިގެން، ފުލުހުން އޭނާގެ ލައިސަންސް ހިފަހައްޓައިފިއެވެ.
މި ހާދިސާ ހިނގިއިރު އޭނާއާ އެކު އިތުރު ބަޔަކުވެސް ކާރުގައި ތިބިކަމަށް މީޑިއާ ރިޕޯޓުތައް ބުނެއެވެ. މި އެކްސިޑެންޓުގައި ހަ މީހަކަށް އެކިވަރުގެ ކުދި އަނިޔާތައް ލިބުނު ނަމަވެސް، މަލްޑިނީއަށް ސީރިއަސް އަނިޔާއެއް ލިބިފައި ނުވާކަމަށް އޭނާ ނިސްބަތްވާ ކްލަބު، ކަގްލިއާރީން ނެރުނު ރަސްމީ ބަޔާނެއްގައި ވަނީ ކަށަވަރުކޮށްދީފައެވެ. އަދި ހޮސްޕިޓަލަށް ގެންގޮސް ފުރިހަމަކުރަންޖެހޭ ޓެސްޓުތައް ހެދުމަށްފަހު ދޫކޮށްލާފައި ވާތީ، ހޯމަ ދުވަހު އޮންނަ ޓީމުގެ ފަރިތަކުރުންތަކުގައި އޭނާ ބައިވެރިވާނެކަމަށް ވެސް ކްލަބުން ހާމަކޮށްފައިވެއެވެ.
މަޝްހޫރު ފުޓުބޯޅަ ލެޖެންޑް ޕައުލޯ މަލްޑިނީގެ ދަރިފުޅު ޑެނިއެލްއަކީ، މަލްޑިނީ އާއިލާއިން ފުޓުބޯޅައިގެ ތެރެއަށް ނުކުތް ތިންވަނަ ޖީލުގެ ކުޅުންތެރިޔާއެވެ. އިޓަލީގެ ސީނިއާ ޤައުމީ ޓީމަށް މިހާތަނަށް ހަ މެޗު ކުޅެދީފައިވާ ހުނަރުވެރި މިޑްފީލްޑަރު މި ހާދިސާއާ ކުރިމަތިލާން ޖެހުނީ، އިޓާލިއަން ލީގުގައި އެޓްލާންޓާއާ ދެކޮޅަށް ކުޅެ ކަގްލިއާރީ މޮޅުވި މެޗުގައި ނަތީޖާ ނެރެދިން މުހިންމު ލަނޑު ކާމިޔާބުކޮށްދިންތާ މާގިނައިރުތަކެއް ނުވަނީހެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.