ވަގުތީގޮތުން ޤައުމީ ޓީމުގެ ކުޅުން މެދުކަނޑާލަން ސަބިޓްޒާ ނިންމައިފި

އުމުރުން ދުވަސްވުމާއި ގާތްގާތުގައި ގިނަ މެޗުތަކެއް ކުޅެން ޖެހުމުގެ ސަބަބުން އުފުލަންޖެހޭ ބުރަ ކުޑަކުރުމުގެ ގޮތުން، ކުރިއަށް އޮތް ޔުއެފާ ނޭޝަންސް ލީގުގެ މެޗުތަކުގައި ނުކުޅެ، އޮސްޓްރިއާގެ ޤައުމީ ފުޓުބޯޅަ ޓީމުން ވަގުތީ ބްރޭކެއް ނެގުމަށް ތަޖުރިބާކާރު މިޑްފީލްޑަރު މާސެލް ސަބިޓްޒާ މިއަދު ނިންމައިފިއެވެ.

މިހާރު އުމުރުން 32އަހަރު ފުރިފައިވާ، އަދި ކްލަބް ލެވެލްގައި ޖަރުމަނުގެ ބޮރޫޝިއާ ޑޯޓްމަންޑަށް ކުޅެމުން އަންނަ ސަބިޓްޒާ ވަނީ އޭނާގެ ޤައުމަށް ކުޅެދިން 102މެޗުގައި ޖުމްލަ 27ލަނޑު ކާމިޔާބުކޮށްދީފައެވެ. އޮސްޓްރިއާގެ ފުޓްބޯޅަ އެސޯސިއޭޝަނުން މައުލޫމާތު ދޭގޮތުގައި، ޤައުމީ ޓީމުގެ ކެރިއަރާމެދު އޭނާ ފަހު ގޮތެއް ކަނޑައަޅާނީ 2028ވަނަ އަހަރުގެ ޔޫރޯ ކޮލިފައިން ފެށުމުގެ ކުރިން، އަންނަ އަހަރުގެ މާޗު މަހުގެ ތެރޭގައެވެ.

ސަބިޓްޒާ އާންމުކުރި ބަޔާނެއްގައި ފާހަގަކޮށްފައިވާ ގޮތުގައި، ފާއިތުވި ދެ އަހަރަކީ ކުޅިވަރުގެ ރޮނގުން އޭނާއަށް ނުހަނު ބުރަ ދުވަސްތަކެކެވެ. އެގޮތުން ޔޫރޯ 2024، ކްލަބް ވޯލްޑް ކަޕް އަދި ފީފާ ވޯލްޑް ކަޕާއެކު ޖެހިޖެހިގެން ތިން ސީޒަނެއްގައި އަރާމުކުރުމެއް ނެތި ކުޅެފައިވާކަން އޭނާ ފާހަގަކުރިއެވެ. މީގެ އިތުރުން، ޖަރުމަން ލީގާއި ކަޕްގެ އިތުރުން ޗެމްޕިއަންސް ލީގުގެ ސަބަބުން މި ސީޒަނުގެ ޝެޑިއުލް ވެސް ވަރަށް ބާރުބޮޑުކަމަށް އޭނާ ބުންޏެވެ. "އުމުރުން 32އަހަރުގައި އަދިވެސް އިތުރު އަހަރުތަކެއް ވަންދެން މަތީ ފެންވަރުގައި ކުޅެން ބޭނުންވާތީ، ހަށިގަނޑުގެ ފިޓްނަސް ހިފެހެއްޓުމަށް މިހާރަށް ވުރެ ބޮޑަށް ސަމާލުވާން އެބަޖެހޭ"ސަބިޓްޒާ ހާމަކުރިއެވެ.

ޤައުމީ ޓީމުގެ ކޯޗު ރަލްފް ރަންގްނިކްއާ އެކު ބޭއްވި މަޝްވަރާތަކަށްފަހު މިގޮތަށް ނިންމިއިރު، ކޯޗު ވަނީ ސަބިޓްޒާގެ މި ނިންމުމަށް އިހުތިރާމްކުރާކަން ހާމަކޮށްފައެވެ. ރަންގްނިކް ބުނީ، މުހިންމު ކުޅުންތެރިޔަކު ޓީމާ ދުރަށް ދިއުމަކީ އުނިކަމެއް ނަމަވެސް، ޓީމަށް ނުހަނު ބޭނުންޖެހިއްޖެ ހިނދެއްގައި އޭނާ އަލުން ގުޅޭނެކަމުގެ ޔަގީންކަން ދީފައިވުމަކީ ލިބޭ ހިތްހަމަޖެހުމެއް ކަމަށެވެ. އަދި މިއިން ސާބިތުވަނީ ސަބިޓްޒާގެ ހިތުގައި ޤައުމީ ޓީމަށް އޮތް ލޯބިކަމަށް ވެސް ކޯޗު ބުންޏެވެ.

ކުރިއަށް އޮތް ނޭޝަންސް ލީގުގައި މި މަހުގެ 24ވަނަ ދުވަހު އިސްރާއީލާ ދެކޮޅަށް އަމިއްލަ ޤައުމުގައި އަދި 29ވަނަ ދުވަހު ކޮސޯވޯއާ ދެކޮޅަށް ކުޅޭ މެޗުތަކަށް ނަގާ ސްކޮޑު ކޯޗު ރަންގްނިކް މާދަމާ އިއުލާނުކުރާނެއެވެ. އޭގެ ފަހުން އޮކްޓޯބަރު މަހުގެ ފުރަތަމަ ދުވަހު އަޔަލެންޑާ ދެކޮޅަށް އަދި އޭގެ ހަތަރު ދުވަސް ފަހުން އަނެއްކާވެސް ކޮސޯވޯއާ ދެކޮޅަށް އޮސްޓްރިއާ ނުކުންނާނެއެވެ.