ދިގު މުއްދަކަށް ފަހު އެނބުރި އައި މުޑްރިކަށް އަނިޔާވެއްޖެ

ޑޯޕިންގެ މައްސަލައެއްގައި ދިގު މުއްދަތެއްގެ ސަސްޕެންޝަނެއް ފުރިހަމަކުރުމަށް ފަހު، ޗެލްސީން ލޯނު އުސޫލުން ޓޮޓެންހަމް ހޮޓްސްޕަރއާ ދާދިފަހުން ގުޅުނު އުމުރުން 25އަހަރުގެ ޔޫކްރެއިން ފޯވާޑް މިޚައިލޯ މުޑްރިކް، ފަރިތަކުރުންތަކުގެ ތެރެއިން ފައިގެ ކުޑަހުޅަށް ލިބުނު އަނިޔާއަކާ ގުޅިގެން އަނެއްކާ ވެސް ދަނޑާ ދުރަށް ދާންޖެހިއްޖެއެވެ.

އިނގިރޭސި މީޑިއާތަކުން ރިޕޯޓުކުރާ ގޮތުގައި، މި އަނިޔާއިން ސަލާމަތްވެ މުޑްރިކަށް އަލުން މެޗެއް ކުޅެވޭވަރު ވާނީ ކުރިއަށް އޮތް ބައިނަލްއަގުވާމީ މެޗުތަކަށް ލީގު މެދުކަނޑާލުމަށް ފަހުގައެވެ. ޓްރާންސްފާގެ އެންމެ ފަހު ވަގުތު އެއް އަހަރުގެ ލޯނެއްގެ ދަށުން ސްޕަރސްއަށް ބަދަލުވި ކުޅުންތެރިޔާ ވަނީ ފާއިތުވި ހަފުތާބަންދުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އަރައިފައެވެ. އެ މެޗު ނިމުނީ އެއްވެސް ޓީމަކަށް ލަނޑެއް ނުޖެހިއެވެ. 

ޔޫކްރެއިންގެ ޝަކްޓާ ޑޮނެސްކުންވެސް މުޑްރިކަށް އިރުޝާދުދިން ޓޮޓެންހަމްގެ މިހާރުގެ ކޯޗު ރޮބާޓޯ ޑި ޒާބީ ހާމަކުރިގޮތުގައި، މިއީ މާ ސީރިއަސް އަނިޔާއެއް ނޫނެވެ. ނަމަވެސް، ގިނަ ދުވަސްތަކެއް ވަންދެން މެޗުތަކާ ދުރުގައި ހުރުމަށް ފަހު އެނބުރި އައުމުން މިފަދަ ކުދި އަނިޔާތައް ވުމަކީ ފުޓުބޯޅައިގައި އާންމުކަމެއްކަން އޭނާ ފާހަގަކުރިއެވެ. ކޯޗު ބުނީ މުޑްރިކަކީ ޓީމަށް ނުހަނު ބޭނުންތެރި ކުޅުންތެރިއެއް ކަމަށާއި، ފާއިތުވި ދުވަސްތަކުގައި އޭނާ ގިނަ ތަކުލީފުތަކެއް އުފުލައިފި ކަމަށާއި، ވީ އެންމެ އަވަހަކަށް އޭނާ ފިޓުވެގެން އައުމަކީ ޓީމަށް މުހިންމު ކަމެއް ކަމަށެވެ.

މުޑްރިކްގެ ފުޓުބޯޅަ ކެރިއަރަށް ބޮޑު ހީނަރުކަމެއް އައީ، 2024ވަނަ އަހަރު ހެދި ޑޯޕިން ޓެސްޓަކުން މަނާ މާއްދާއެއް (މެލްޑޯނިއަމް)އޭނާގެ ހަށިގަނޑުން ފެނުމާ ގުޅިގެންނެވެ. އިނގިރޭސި އެފްއޭއިން ފުރަތަމަ އޭނާ ހަތަރު އަހަރަށް ސަސްޕެންޑުކުރި ނަމަވެސް، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް)މެދުވެރިކޮށް ކުރިއަށްދިޔަ އިސްތިއުނާފުގެ ތެރެއިން ވާޑާ އާއި އެފްއޭގެ އެއްބަސްވުމެއްގެ ދަށުން އެ އަދަބު ވަނީ ލުއިކޮށްދީފައެވެ. އޭގެ ކުރިން 2023ވަނަ އަހަރު ޗެލްސީއަށް ބަދަލުވެ، އެ ކުލަބަށް ކުޅެދިން 73މެޗުގައި އޭނާ ވަނީ 10ލަނޑު ޖަހައި 11އެސިސްޓު ކޮށްދީފައެވެ. ނަމަވެސް ޗެލްސީގައި އޭނާއަށް އުންމީދުކުރި ވަރުގެ މޮޅު ކުޅުމެއް ދެއްކިފައެއް ނުވެއެވެ.

މި ސީޒަނުގެ ޕްރިމިއާ ލީގުގައި ޓޮޓެންހަމުން މިހާތަނަށް ހަތަރު މެޗު ކުޅެފައިވާއިރު، އެ ޓީމަށް ހޯދިފައިވަނީ އެންމެ ދެ ޕޮއިންޓެވެ. ނަތީޖާތައް ދަށްވުމުގެ ސަބަބުން އެ ޓީމު މިވަގުތު އޮތީ ލީގު ތާވަލުގެ 17ވަނައިގައެވެ.