ސްޓޭޑިއަމް އޮފް ލައިޓްގައި މިރޭ ކުޅުނު އިނގިރޭސި ލީގު ކަޕްގެ މެޗުގައި ހަލް ސިޓީއާ ވާދަކޮށް 1-0ގެ ހަނި ތަފާތަކުން މޮޅުވެ، މުބާރާތުގެ ގަދަ 16ގެ ޖާގައެއް ސަންޑަލެންޑުން ކަށަވަރުކޮށްފިއެވެ.
ހަފުތާ ބަންދުގައި ކުޅުނު ޕްރިމިއަރ ލީގުގެ މެޗުތަކާ ޚިލާފަށް ގިނަ ބަދަލުތަކަކާ އެކު ދެ ޓީމުން ވެސް ކުރިމަތިލި މި މެޗުގެ ހަމައެކަނި ލަނޑު ފެނިގެންދިޔައީ 71ވަނަ މިނެޓުގައެވެ. މި ލަނޑު ސަންޑަލެންޑަށް ކާމިޔާބުކޮށްދިނީ ހަލް ސިޓީގެ ކީޕަރު ޑިލަން ފިލިޕްސް ކުރިއަށް ނުކުމެ ހުއްޓައި، އޭނާގެ ބޯމަތިން ގޯލުގެ ތެރެއަށް ބޯޅަ އަމާޒުކޮށްލައިގެން މޮރޮކޯގެ ކުޅުންތެރިޔާ ޝެމްސުދީން ތަލްބީއެވެ.
މި މުބާރާތުގައި ކުޅުނު އެހެން މެޗުތަކަށް ބަލާއިރު، ދެކުނު ލަންޑަނުގައި ކްރިސްޓަލް ޕެލަސްއިން ވަނީ ޗެމްޕިއަންޝިޕްގައި ވާދަކުރާ މިޑްލްސްބަރާގެ މައްޗަށް 3-0އިން ކުރިހޯދާފައެވެ. ކްރިސްޓަލް ޕެލަސް މޮޅުވި މެޗުގައި އެ ޓީމުގެ ޔޯގެން ސްޓްރޭންޑް ލާސެން ބޮލުން ދެ ލަނޑު ކާމިޔާބުކޮށްފައިވާއިރު، ތިންވަނަ ލަނޑު 72ވަނަ މިނެޓުގައި ޖަހައިދިނީ ޑައިޗީ ކަމާޑާއެވެ.
ހަމައެއާ އެކު އަމިއްލަ ދަނޑުގައި ލިންކަން ސިޓީއާ ދެކޮޅަށް ކުޅުނު މެޗު 4-0އިން ކާމިޔާބުކޮށް ބޯންމަތުން ވަނީ އެޓީމުގެ އައު ކޯޗު މާކޯ ރޯޒްގެ އިރުޝާދުގެ ދަށުން ފުރަތަމަ ރަސްމީ މޮޅު ހޯދާފައެވެ. މި މެޗުގައި ބޯންމަތުގެ ރަޔާން ކްރިސްޓީގެ ފަރާތުން ފުރިހަމަ ހެޓްރިކެއް ވަނީ ފެނިގެންގޮސްފައެވެ.
މީގެ އިތުރުން 2025ވަނަ އަހަރުގެ ޗެމްޕިއަން ނިއުކާސަލް ޔުނައިޓެޑުން މިލްވޯލްއާ ދެކޮޅަށް ކުޅުނު ތިންވަނަ ބުރުގެ މެޗުން އެޓީމު ސަލާމަތްވީ މެޗުގެ ފަހު ދިހަ މިނެޓުގެ ތެރޭގައި ޖޯ ވިލޮކް ކާމިޔާބުކުރި ލަނޑުންނެވެ. އޭނާ މި ލަނޑު ޖަހައިދިނީ 81ވަނަ މިނެޓުގައެވެ.
ލީގު ކަޕްގައި ކުރިއަށް އޮތް މެޗުތަކަށް ބަލާއިރު، މާދަމާ ރޭ ޗެލްސީއާއި ލީޑްސް ޔުނައިޓެޑް ވާދަކުރުމަށް ވަނީ ހަމަޖެހިފައެވެ. އަދި މި ބުރުގައި ބާކީ ހުރި މެޗުތައް ކުޅުމަށް ތާވަލުކޮށްފައި ވަނީ އަންނަ ހަފުތާގައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.