ގައުފް ތިންވަނަ ގްރޭން ސްލޭމަކާ ގާތަށް!

މިއަހަރުގެ ފަހު ގްރޭންޑް ސްލޭމް މުބާރާތް ކަމަށްވާ ޔޫއެސް އޯޕަން ޓެނިސް މުބާރާތުގެ އަންހެން ސިންގަލްސް ބައިން އެމެރިކާގެ ކޯކޯ ގައުފް ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

އާތަރ އޭޝް ސްޓޭޑިއަމްގައި ކުޅުނު މި މެޗުން މުބާރާތުގައި ހަތަރުވަނައަށް ސީޑް ކުރެވިފައިވާ ގައުފް މޮޅުވީ، އެމެރިކާގެ ޒުވާން ކުޅުންތެރިޔާ އައިވާ ޖޮވިޗް ސީދާ ދެ ސެޓުން ބަލިކުރުމަށްފަހުއެވެ. މި މެޗުގެ ސެޓުތައް ގައުފް ގެންދިޔައީ 6-1އަދި 6-4އިންނެވެ.

މިދިޔަ 2023ވަނަ އަހަރުގެ ޔޫއެސް އޯޕަން ކާމިޔާބުކޮށް ފުރަތަމަ ގްރޭންޑް ސްލޭމް ތަށި އުފުލާލި ގައުފް، މި ފަހަރުގެ ކުއާޓާ ފައިނަލުގައި ނުކުންނާނީ ރަޝިއާގެ މީރާ އަންޑްރީވާ އާ ދެކޮޅަށެވެ. މިއީ ފްރެންޗް އޯޕަންގެ އެންމެ ފަހުގެ ދެ ޗެމްޕިއަނުންގެ މެދުގައި ކުޅެވޭ ފޯރިގަދަ ކުރިމަތިލުމަކަށް ވާނެއެވެ. މުބާރާތުގައި 14ވަނައަށް ސީޑް ކުރެވިފައިވާ ޖޮވިޗާ ދެކޮޅަށް ކުޅުނު މެޗުގައި ގައުފްގެ ބާރުގަދަ ހަމަލާތަކާއި ރަނގަޅު ސާވްތަކުގެ ސަބަބުން ޖޮވިޗަށް ބޮޑެތި ގޮންޖެހުންތަކަކާ ކުރިމަތިވިއެވެ.

މެޗުގެ ފެށުމުގައި ދެ ކުޅުންތެރިންގެ ފަރާތުންވެސް ސާވްތައް ބްރޭކްވި ނަމަވެސް، ގައުފް ވަނީ ކުޅުން ރަނގަޅުކޮށް ބައިގަޑިއެއްހާއިރު ތެރޭގައި ފުރަތަމަ ސެޓު ކާމިޔާބުކޮށްފައެވެ. ދެވަނަ ސެޓުގައި ޖޮވިޗް އޭނާގެ ސާވްތައް ރަނގަޅުކޮށް، ގައުފްގެ ސާވްއެއް ބްރޭކްކޮށްގެން މެޗުގެ އޮއިވަރު ބަދަލުކުރަން މަސައްކަތް ކުރި ނަމަވެސް، އޭނާއަށް ހެދުނު ގޯސްތަކުގެ ފައިދާ ނަގައި ގައުފް ވަނީ މެޗު ކާމިޔާބުކޮށްފައެވެ. މީގެ ކުރިން އެލެކްސެންޑްރާ އިއެލާ އަތުން މޮޅުވެ 18އަހަރުގެ ޖޮވިޗް ވަނީ މުބާރާތުގައި މޮޅު ކުޅުމެއް ދައްކާފައެވެ.

މުބާރާތުގެ ފިރިހެން ސިންގަލްސްގެ އެހެން މެޗުތަކަށް ބަލާއިރު، ލުއީ އާމްސްޓްރޯންގ ސްޓޭޑިއަމްގައި ކުޅުނު މެޗުން ކަރަން ޚަޗަނޯވް ވަނީ އެމެރިކާގެ ޒުވާން ކުޅުންތެރިޔާ ލާނާ ޓިއެންގެ މައްޗަށް ކުރިހޯދާފައެވެ. ފަސް ސެޓަށް ދެމިގެންދިޔަ މި މެޗު ޚަޗަނޯވް ކާމިޔާބުކުރީ 7-5، 4-6، 6-7، 6-1އަދި 6-4އިންނެވެ.

މީގެ އިތުރުން، ގްރޭންޑް ސްޓޭންޑް ކޯޓުގައި ފަސް ގަޑިއިރަށް ދެމިގެންދިޔަ ވަރުގަދަ ކުރިމަތިލުމަކަށް ފަހު، ޑަޗް ކުޅުންތެރިޔާ ބޮޓިކް ވަން ޑި ޒޭންޑްޝުލްޕް ވަނީ އާތަރ ގިއާގެ މައްޗަށް ކުރިހޯދާފައެވެ. އުމުރުން 21އަހަރުގެ ގިއާ އަކީ ގްރޭންޑް ސްލޭމް ތާރީޚުގައި "ލަކީ ލޫޒަރ"އެއްގެ ގޮތުގައި ކުއާޓާ ފައިނަލަށް ދަތުރުކުރި ފުރަތަމަ ކުޅުންތެރިޔާއަށް ވުމާ ދާދި ގާތަށް ދިޔަ ކުޅުންތެރިއެކެވެ. ނަމަވެސް، ފަހަތުން އަރައި ތިން ސެޓު ދެ ސެޓުން މެޗު ކާމިޔާބުކޮށް، ޑި ޒޭންޑްޝުލްޕް ވަނީ ގިއާގެ މި ތާރީޚީ ކާމިޔާބީއަށް ހުރަސްއަޅާފައެވެ.