އެމެރިކާގެ ނިއު ޔޯކްގައި މިހާރު ކުރިއަށްދާ އަހަރުގެ އެންމެ ފަހު ގްރޭންޑް ސްލޭމް، ޔޫއެސް އޯޕަން ޓެނިސް މުބާރާތުގެ އަންހެން ސިންގަލްސް އިވެންޓުގެ ގަދަ ސޯޅައިން، މުބާރާތުގެ އެއްވަނަ ސީޑު ބެލަރޫސްގެ އަރީނާ ސަބަލެންކާ އާއި ތިންވަނަ ސީޑު އެމެރިކާގެ ޖެސިކާ ޕެގޫލާ ޖާގަ ކަށަވަރުކޮށްފިއެވެ.
ލުއިސް އާމްސްޓްރޯންގ ސްޓޭޑިއަމްގައި ކުޅުނު ތިންވަނަ ބުރުގެ މެޗުގައި އުޒްބެކިސްތާންގެ ކަމީލާ ރަހިމޯވާގެ މައްޗަށް ސަބަލެންކާ ކުރިހޯދީ ސީދާ ދެ ސެޓުންނެވެ. މި މެޗުގެ ސެޓުތައް އޭނާ ގެންދިޔައީ 6-3އަދި 6-4އިންނެވެ. މިއީ ފުލަޝިންގ މެޑޯސްގައި އޭނާ ޖެހިޖެހިގެން ހޯދި 16ވަނަ މޮޅުކަން ފާހަގަކޮށްލެވެއެވެ. މި މުބާރާތުގެ އެންމެ ފަހުގެ ދެ އަހަރުގެ ޗެމްޕިއަންކަން ހޯދާފައިވާ ސަބަލެންކާގެ އަމާޒަކީ، 2014ވަނަ އަހަރު ސެރީނާ ވިލިއަމްސް ހެދި ރެކޯޑާ ހަމަކޮށް، ޖެހިޖެހިގެން ތިންވަނަ ފަހަރަށް ޔޫއެސް އޯޕަން ކާމިޔާބުކުރާ ފުރަތަމަ ކުޅުންތެރިޔާއަށް ވުމެވެ. ހަތަރުވަނަ ބުރުގައި އޭނާ ނުކުންނާނީ 15ވަނަ ސީޑު ރަޝިއާގެ ޑައާނާ ޝުނައިޑަރ ކަޓުވާލުމަށް ފަހު އައި އެމެރިކާގެ ޓޭލަރ ޓައުންސެންޑާ ދެކޮޅަށެވެ.
އަނެއްކޮޅުން ތިންވަނަ ސީޑު ޕެގޫލާ ހަތަރުވަނަ ބުރުގެ ޖާގައެއް ކަށަވަރުކުރީ، 31ވަނަ ސީޑު ކެނެޑާގެ ލޭލާ ފެނާންޑޭޒްއާ ވާދަކޮށް ފަހަތުން އަރައި މެޗު ކާމިޔާބުކޮށްގެންނެވެ. ފުރަތަމަ ސެޓު 6-1އިން ފެނާންޑޭޒް ފަސޭހަކަމާއެކު ހޯދާފައިވަނިކޮށް، ޕެގޫލާ ވަނީ ކުޅުން ރަނގަޅުކޮށް 6-4އަދި 6-3އިން ފަހު ދެ ސެޓު ކާމިޔާބުކޮށްފައެވެ. ކުރިއަށް އޮތް ބުރުގައި ޕެގޫލާ ވާދަކުރަން ޖެހޭނީ 16ވަނަ ސީޑު ރުމޭނިއާގެ ސޮރާނާ ސަރސްޓިއާއާއެވެ. ސަރސްޓިއާ މި ބުރަށް އައީ 19ވަނަ ސީޑު އިޓަލީގެ ޖޭސްމީން ޕައޮލީނީ 6-3އަދި 6-3އިން ބަލިކުރުމަށްފަހުއެވެ.
މީގެ އިތުރުން އަންހެން ސިންގަލްސްގައި ކުޅުނު ފާހަގަކޮށްލެވޭ އެހެން މެޗުތަކަށް ބަލާއިރު، މުބާރާތުގެ ހަތްވަނަ ސީޑު ޗެކް ރިޕަބްލިކްގެ ކަރޮލީނާ މުޗޯވާ ވަނީ 26ވަނަ ސީޑު އެމެރިކާގެ އެމާ ނަވާރޯ އަތުން ސީދާ ދެ ސެޓުން ބަލިވެ މުބާރާތުން އަލްވަދާޢު ކިޔާފައެވެ. ހަމައެއާ އެކު ޔޫކްރެއިންގެ މާޓާ ކޮސްޓްޔުކް ވަނީ 6-3އަދި 6-2އިން އެކަޓެރީނާ އެލެގްޒެންޑަރގެ މައްޗަށް ކުރިހޯދާފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.