ޖިބޫޓީގެ އެފްއޭއިން ފައިސާގެ ޚިޔާނާތުގެ މައްސަލައެއް

ދުނިޔޭގެ ފުޓްބޯޅައިގެ މައި އިދާރާ (ފީފާ)އިން ޖިބޫޓީގެ ފުޓްބޯޅަ ކުރިއެރުވުމަށް ދީފައިވާ ފައިސާއަށް އެ ގައުމުގެ ފުޓްބޯޅަ ފެޑަރޭޝަނުން ބޮޑެތި ޚިޔާނާތްތަކެއް ވެފައިވާކަން، ދާދި ފަހުން އާންމުކުރި ސަރުކާރުގެ އޮޑިޓް ރިޕޯޓަކުން ހާމަވުމާ ގުޅިގެން މައްސަލަ ހޫނުވެއްޖެއެވެ. 

މިއަހަރުގެ ތެރޭގައި ޖިބޫޓީގެ ސަރުކާރުން އެކުލަވާލައި އާންމުކޮށްފައިވާ އޮޑިޓް ރިޕޯޓުން ދައްކާ ގޮތުގައި، ކޮރަޕްޝަނަށް މަގުފަހިވާ ގޮތަށް ގިނަ އަމަލުތަކެއް އެ ފެޑަރޭޝަނުން ވަނީ ހިންގާފައެވެ. އޭގެ ތެރޭގައި، ފީފާއިން ކޮންމެ އަހަރަކު ފޯރުކޮށްދޭ އެއް މިލިއަން ޑޮލަރާއި އެހެނިހެން މާލީ އެހީތަކުގެ ބޮޑު ބައެއް ނަހަމަ ގޮތުގައި ވަނީ ބޭނުންކޮށްފައެވެ. މީގެ އިތުރުން، ފުޓްބޯޅައިގެ އުމްރާނީ ތަރައްގީއަށް ސައޫދީ އަރަބިއްޔާއިން ދިން ފައިސާއަށްވެސް އެ އިދާރާއިން އިހުމާލުވެފައިވާކަން ރިޕޯޓުގައި ފާހަގަކޮށްފައިވެއެވެ.

މި މައްސަލަތަކާ ގުޅިގެން، ފެޑަރޭޝަނުގެ އިސް އޮފިޝަލެއް ކަމަށްވާ މުހައްމަދު އެލަމް ފަރާހް ވަނީ ފާއިތުވި ހަފުތާގެ ތެރޭގައި މަގާމުން އިސްތިއުފާ ދެއްވާފައެވެ. އޭނާ އިސްތިއުފާ ދެއްވީ މެނޭޖްމަންޓުގެ އަމަލުތަކާއި ވަސީލަތްތައް ބޭނުންކުރަމުންދާ ގޮތާމެދު ހިތްހަމަނުޖެހުން ފާޅުކުރެއްވުމަށްފަހުގައެވެ. އެހެންނަމަވެސް، ޖިބޫޓީ ފުޓްބޯޅަ ފެޑަރޭޝަނުގެ ރައީސް ސުލައިމާން ހަސަން ވަބޭރީ ވަނީ މި ތުހުމަތުތައް ދޮގުކުރައްވާފައެވެ. އޭނާ ވިދާޅުވީ، ފީފާގެ މިންގަނޑުތަކާ އެއްގޮތަށް އެ އިދާރާ ގަވާއިދުން އޮޑިޓްކުރަމުން އަންނަ ކަމަށާއި، މިހާތަނަށް އެއްވެސް މައްސަލައެއް ފާހަގަވެފައި ނުވާ ކަމަށެވެ.

އެފްރިކާ ބައްރުގެ ކުދި ގައުމުތަކުގެ ފުޓްބޯޅަ އެސޯސިއޭޝަންތައް އޮޑިޓްކުރަން ފަށާފައިވަނީ، އާބާދީގައި ފަސްލައްކަ މީހުން ހިމެނޭ ކޭޕް ވާޑޭ ވޯލްޑް ކަޕަށް ކޮލިފައިވުމާ ގުޅިގެންނެވެ. މިއާއެކު އެހެން ކުދި ގައުމުތަކަށް ކުރިއެރުން ނުލިބޭ ސަބަބުތައް ހޯދުމުގެ މަސައްކަތް ވަނީ ފަށާފައެވެ. މި ދަނޑިވަޅުގައި ޖިބޫޓީގެ މައްސަލަ ފެންމަތިވި ނަމަވެސް، ފީފާއިން މިކަން މާބޮޑަށް ނުބަލާނެކަމަށް ފާޑުކިޔާ ފަރާތްތަކުން ލަފާކުރެއެވެ. ސަބަބަކީ، ފީފާގެ ރައީސް ޖިއާނީ އިންފަންޓީނޯ ހަތަރުވަނަ ދައުރަކަށް ކުރިމަތިލައްވާއިރު، ޔޫރަޕާއި އޭޝިއާ އަދި ކޮންކާކަފްގެ ތާއީދު ނުލިބޭތީ، އޭނާއަށް އެފްރިކާ ގައުމުތަކުގެ ވޯޓު ކޮންމެހެން ބޭނުންވުމެވެ.