ވިކާރިއޯ ޔުވެންޓަސްއަށް ބަދަލުވެއްޖެ

ޓޮޓްނަމް ހޮޓްސްޕަރގެ ގޯލްކީޕަރުގެ މަގާމު ފުރަމުން އައި އިޓަލީގެ ގުގްލިއެލްމޯ ވިކާރިއޯ، ކުރިއަށް އޮތް އެއް އަހަރު ދުވަހު ލޯނު އުސޫލުން ޔުވެންޓަސްއަށް ކުޅުމަށް އެ ކުލަބާ އެކު އެއްބަސްވުމަކަށް އަތުވެއްޖެއެވެ.

މި އެއްބަސްވުމުގެ މުއްދަތު ހަމަވުމުން، ބޭނުންވެއްޖެ ހިނދެއްގައި ވިކާރިއޯގެ ކޮންޓްރެކްޓް ދާއިމީ ކުރުމުގެ ފުރުސަތު ޔުވެންޓަސްއަށް އޮންނާނެކަން ޓޮޓްނަމުން ވަނީ ހާމަކޮށްފައެވެ. އުމުރުން 29އަހަރުގެ މި ކުޅުންތެރިޔާ ޓޮޓްނަމްގެ ޖާޒީގައި ފެންނަން ފެށީ 2023ވަނަ އަހަރު އިޓަލީގެ އެމްޕޯލީން ކުރި ޓްރާންސްފާއަކަށް ފަހުގައެވެ.

ޓޮޓްނަމްގައި ހޭދަކުރި ދުވަސްތަކުގައި އޭނާ ވަނީ އެ ޓީމަށް 117މެޗު ކުޅެދީފައެވެ. އަދި އޭގެ ތެރެއިން 29މެޗުގައި ބައިކޮޅަށް ލަނޑެއް ވަނަނުދީ ގޯލު ދިފާޢުކުރިއެވެ. މީގެ އިތުރުން، 17އަހަރުގެ ދިގު އިންތިޒާރަކަށްފަހު ޓޮޓްނަމުން 2025ވަނަ އަހަރުގެ ޔުއެފާ ޔޫރޮޕާ ލީގުގެ ޗެމްޕިއަންކަން ހޯދިއިރު، އެ ކާމިޔާބީގައި ވިކާރިއޯގެ ހިއްސާ ވަރަށް ބޮޑެވެ.

އިޓަލީގެ ޤައުމީ ޓީމުގެ ސްކޮޑުން ވިކާރިއޯއަށް އެންމެ ފުރަތަމަ ޖާގައެއް ލިބުނީ 2024ވަނަ އަހަރުގެ މާޗު މަހުގެ ތެރޭގައެވެ. އޭގެ ފަހުން އޭނާ ވަނީ ޤައުމީ ޓީމަށް ފަސް މެޗެއް ކުޅެދީފައެވެ. ފުޓުބޯޅައިގެ ކެރިއަރު އުދިނޭޒީން ފެށި މި ކީޕަރު ވަނީ އިނގިރޭސި ޕްރިމިއަރ ލީގަށް ބަދަލުވުމުގެ ކުރިން އިޓަލީގެ އެހެން ކުލަބުތައް ކަމަށްވާ ވެނީޒިއާ، ޕެރޫޖިއާ، ކަލިއާރީ އަދި އެމްޕޯލީގައި ވެސް މޮޅު ކުޅުމެއް ދައްކާފައެވެ.