އިނގިރޭސި ވިލާތުގެ ލިވަޕޫލްގެ ސްޕޯޓިން ޑައިރެކްޓަރުގެ މަގާމުން ވަކިވިތާ މަދު ދުވަސްކޮޅެއްގެ ތެރޭގައި، އެ ކުލަބުގެ ފުޓުބޯޅައިގެ ކަންކަން އިތުރަށް ހަރުދަނާކުރުމުގެ މަގުސަދުގައި، ސައުދީ އަރަބިއްޔާގެ ނަންމަޝްހޫރު ކުލަބު އަލް ހިލާލްގެ އެންމެ އިސް އެއް މަގާމާ އާދީއްތަ ދުވަހު ރިޗަޑް ހިއުސް ރަސްމީކޮށް ހަވާލުވެއްޖެއެވެ.
ސައުދީ ޕްރޯ ލީގުގެ ގަދަބާރެއް ކަމަށްވާ އަލް ހިލާލުން ހާމަކޮށްފައިވާ ގޮތުގައި، އެ ކުލަބުގެ ބޯޑުން މިހާރު ވަނީ ހިއުސްއާ އެކު ވެފައިވާ އެއްބަސްވުމުގެ ކަންކަން މުޅިން ނިންމައިފައެވެ. ހިއުސް އެ ކުލަބަށް ގެނައުމުގެ އެންމެ ބޮޑު ބޭނުމަކީ ކުޅުންތެރިން ހޯދުމުގެ ނިޒާމު މިހާރަށްވުރެ ފުޅާކޮށް، ޓެކްނިކަލް އަދި ސްކައުޓިންގެ ދާއިރާއިން ކުލަބުގެ ފެންވަރު އެހެން ހަރުފަތަކަށް ގެންދިއުމެވެ.
މިއަހަރުގެ ތެރޭގައި ބޯނެމައުތު ދޫކޮށް ލިވަޕޫލާ ގުޅުނު ހިއުސް ވަނީ، މަޝްހޫރު ކޯޗު ޔާގަން ކްލޮޕްގެ ބަދަލުގައި އާނޭ ސްލޮޓް އެ ޓީމަށް ގެނެސްފަ އެވެ. ސްލޮޓްގެ އިރުޝާދުގެ ދަށުން ލިވަޕޫލުން ޕްރެމިއާ ލީގު އުފުލާލި ނަމަވެސް، ފަހަކަށް އައިސް ނެރުނު ދަށް ނަތީޖާތަކާއި، ގާތްގަނޑަކަށް 500މިލިއަން ޑޮލަރުގެ އަގުބޮޑު ކުޅުންތެރިންގެ ފަރާތުން އެދެވޭ ކުޅުމެއް ނުފެނުމުގެ ސަބަބުން ކުލަބުގެ މެނޭޖްމަންޓުގެ ތެރޭގައި ވަނީ ހިތްހަމަނުޖެހުންތަކެއް އުފެދިފައެވެ. ލިވަޕޫލުން ބުނެފައި ވަނީ އޭނާ މަގާމުން ވަކިވީ އާ ތަޖުރިބާއެއް ކުރުމުގެ ބޭނުމުގައި ކަމަށެވެ. މިއީ އެ ކުލަބުގެ ސީއީއޯ މައިކަލް އެޑްވާޑްސް މަގާމުން ދުރުވިތާ ދެ މަސް ފަހުން އައި ބަދަލެކެވެ.
ސައުދީ ލީގުގެ ތަށި 21ފަހަރު އުފުލާލާފައިވާ އަލް ހިލާލުން އަންނަނީ ކުރިއަށް އޮތް ސީޒަނަށް ޓީމު ވަރުގަދަ ކުރުމުގެ ގޮތުން ޔޫރަޕުގެ މަޝްހޫރު ކުޅުންތެރިން ގެންނަމުންނެވެ. އެގޮތުން އާސެނަލްގެ ގަބްރިއަލް މާޓިނެއްލީއާއި އެސްޓަން ވިލާގެ އޮލޭ ވަޓްކިންސްގެ ސޮއި މިހާރު ވަނީ ހޯދައިފައެވެ. މި ކުލަބަކީ ސައުދީ ސަރުކާރުގެ ޕަބްލިކް އިންވެސްޓްމަންޓް ފަންޑާއި ޕްރިންސް އަލްވަލީދު ބިން ތަލާލްގެ ހިއްސާ އޮވެގެން ހިންގާ ކުލަބެކެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.