މުޙައްމަދު ސަލާހުގެ ބަދަލުގައި ފެންވަރު ރަނގަޅު ކުޅުންތެރިއެއް ހޯދުމުގެ ގޮތުން، ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުންދާ ފްރާންސްގެ ހުނަރުވެރި ފޯވާޑް ބްރެޑްލީ ބާކޯލާ ގަތުމަށް ލިވަޕޫލުން ރަސްމީކޮށް ހުށަހަޅަން ތައްޔާރުވަމުންދާ ކަމަށް މީޑިއާ ރިޕޯޓުތައް ބުނެފިއެވެ.
ފާއިތުވި ސީޒަނަށް ފަހު އެ ކުލަބާ ވަކިވި މިސްރުގެ ތަރި ސަލާހުގެ މަގާމް ފުރާނެ އެންމެ މުހިންމު ކުޅުންތެރިއަކީ އުމުރުން 23އަހަރުގެ ބާކޯލާ ކަމަށް ލިވަޕޫލްގެ މެނޭޖްމަންޓުން ވަނީ ކަނޑައަޅާފައެވެ. މި މުއާމަލާތް ކާމިޔާބުކުރުމަށް ޓަކައި އިނގިރޭސި ޕްރިމިއާ ލީގުގެ ކުލަބުން ގާތްގަނޑަކަށް 100މިލިއަން ޕައުންޑްގެ އަދަދެއް ހޭދަކުރަން ބޭނުންވިޔަސް، ފްރާންސްގެ ޗެމްޕިއަނުން އޭނާ ވިއްކާލަން ކިޔާ އަގު 145މިލިއަން ޕައުންޑަށް އަރައެވެ. މިއީ އިނގިރޭސިވިލާތުގެ ފުޓުބޯޅައިގެ ތާރީޚުގައި ޓްރާންސްފާ ރިކޯޑެއް މުގުރާލާނެހާ ބޮޑު އަދަދެކެވެ.
ޕީއެސްޖީއާއެކު ބާކޯލާ ހަދާފައިވާ އެއްބަސްވުމުގެ މުއްދަތު ހަމަވާން އަދި ދެ އަހަރު ބާކީ އޮތް ނަމަވެސް، އެ ޓީމުގެ ފުރަތަމަ އެގާރައިން ގަވާއިދުން ޖާގަ ހޯދަން އޭނާއަށް ވަނީ ގޮންޖެހުންތަކަކާ ކުރިމަތިލާން ޖެހިފައެވެ. މި ސަބަބާ ހުރެ އޭނާ ވެސް ހުރީ އެންފީލްޑަށް ބަދަލުވުމުގެ ޝައުގުވެރިކަމުގައެވެ.
ބާކޯލާއަށް އަމާޒު ހިފުމުގެ ކުރިން ލިވަޕޫލުން އެންމެ ބޮޑަށް ޝައުގުވެރިކަން ފާޅުކުރީ އާރްބީ ލައިޕްޒީގަށް ކުޅެމުންދިޔަ ޖަރުމަނުގެ ފޯވާޑް ޔަން ޑިއޮމާންޑޭ ހޯދުމަށެވެ. ނަމަވެސް، ސްޕެއިންގެ ގަދަބާރު ރެއާލް މެޑްރިޑަށް ބަދަލުވާން އޭނާ ނިންމުމާ އެކު، ލިވަޕޫލްގެ މިސްރާބު ވަނީ ބާކޯލާއަށް އަނބުރާލާފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.