ރޮޑްރީގެ ޓްރާންސްފަރއިން އެޓްލެޓިކޯއާއި ވިޔަރެއާލްއަށް ވެސް ފައިދާ

އިނގިރޭސިވިލާތުގެ މެންޗެސްޓަރ ސިޓީ ދޫކޮށް ސްޕެއިންގެ ގައުމީ ޓީމުގެ ކެޕްޓަން ރޮޑްރީ، އެފްސީ ބާސެލޯނާއާ ގުޅުމަށް ނިންމާފައިވުމާ އެކު، ފީފާގެ ޓްރެއިނިންގ ކޮމްޕެންސޭޝަން އުސޫލުގެ ދަށުން އޭނާ ކުރިން ކުޅުނު އެޓްލެޓިކޯ މެޑްރިޑާއި ވިޔަރެއާލްއަށް ބޮޑު މާލީ ފައިދާތަކެއް ލިބުމަށް މަގުފަހިވެއްޖެއެވެ.

ދުނިޔޭގެ ފުޓުބޯޅައިގެ މައި އިދާރާ، ފީފާއިން ކަނޑައަޅާފައިވާ ހާއްސަ މެކޭނިޒަމްގެ ދަށުން، ކުޅުންތެރިއެއްގެ އުމުރުން 12އަހަރާއި 23އަހަރާ ދެމެދު ތަމްރީނުކުރި ކްލަބްތަކަށް ޖުމްލަ ޓްރާންސްފަރ ފީގެ ފަސް އިންސައްތަ ލިބިގެންދާނެއެވެ. ބާސެލޯނާއާއި މެންޗެސްޓަރ ސިޓީއާ ދެމެދު ކުރިއަށްދާ ވިޔަފާރީގެ މުއާމަލާތް ނިމުމަކަށް އައުމާ އެކު، މި އުސޫލުގެ މަތިން އެޓްލެޓިކޯއާއި ވިޔަރެއާލްއަށް ފައިސާ ލިބިގެންދާނީ، ސިޓީއަށް ދައްކާ ފީގެ ތެރެއިން ކެނޑުމުގެ ބަދަލުގައި ބާސެލޯނާއިން ފީފާ މެދުވެރިކޮށް އަމިއްލައަށް އިތުރަށް ކުރާ ހޭދައެއްގެ ގޮތުގައެވެ.

މި އުސޫލު ބައްޓަންކުރެވިފައިވާ ގޮތުން، ކުޅުންތެރިޔާގެ އުމުރުން 12އަހަރާއި 15އަހަރާ ދެމެދު ހޭދަކުރި ކޮންމެ އަހަރަކަށް 0.25އިންސައްތަ އަދި 16އަހަރާއި 23އަހަރާ ދެމެދު ހޭދަކުރި ކޮންމެ އަހަރަކަށް 0.50އިންސައްތަ ކްލަބްތަކަށް ހައްގުވެއެވެ. އުމުރުން އެގާރަ އަހަރުން ފެށިގެން ސަތާރަ އަހަރާ ހަމައަށް އެޓްލެޓިކޯ މެޑްރިޑުގައި ރޮޑްރީ ހޭދަކޮށްފައިވާއިރު، މި ޓްރާންސްފަރ 65މިލިއަން ޔޫރޯއަށް ނިމިއްޖެނަމަ އެ ކްލަބަށް 1.5މިލިއަން ޔޫރޯ ލިބޭނެއެވެ. އަދި އިތުރު ބޯނަސްތަކާއެކު ޖުމްލަ އަގު 75މިލިއަނަށް އަރައިފިނަމަ އެޓްލެޓިކޯއަށް ލިބޭ މިންވަރު 2މިލިއަން ޔޫރޯއަށް އިތުރުވެގެންދާނެއެވެ. 

އަނެއްކޮޅުން ވިޔަރެއާލްގައި އޭނާ ފަސް ސީޒަނެއް ހޭދަކޮށްފައިވުމުގެ ސަބަބުން، 65މިލިއަން ޔޫރޯގެ ޓްރާންސްފަރއަކުންނަމަ 1.6މިލިއަން ޔޫރޯ، އަދި 75މިލިއަން ޔޫރޯގެ އެއްބަސްވުމަކުންނަމަ 1.875މިލިއަން ޔޫރޯ އެ ކްލަބަށް ލިބުމަކީ އެކަށީގެންވާ ކަމެކެވެ. 

ނިމިދިޔަ ވޯލްޑް ކަޕްގެ އެންމެ މޮޅު ކުޅުންތެރިޔާގެ މަގާމު ހާސިލުކުރި ރޮޑްރީ އެންމެ ފުރަތަމަ ކުޅެން ފެށި ރަޔޯ މަހަޑަހޮންޑާއިން އޭނާ ވަކިވީ އުމުރުން 11އަހަރުގައި ކަމަށްވުމުން، ފީފާގެ ގަވާއިދުގެ ދަށުން އެ ކްލަބަށް އެއްވެސް މާލީ މަންފާއެއް ނުލިބޭނެއެވެ.