ރޮޑްރީ ބާސެލޯނާއަށް ވިއްކާލަން ނިންމައިފި

އިނގިރޭސި ކުލަބު މެންޗެސްޓަރ ސިޓީއަށް ކުޅެމުން އަންނަ ދުނިޔޭގެ އެންމެ މޮޅު ކުޅުންތެރިޔާ ރޮޑްރީ، 65.4މިލިއަން ޕައުންޑް (88.47މިލިއަން ޑޮލަރު)ގެ ބޮޑު ފީއަކަށް ސްޕެއިންގެ ޗެމްޕިއަން ބާސެލޯނާއަށް ބަދަލުވުމަށް ދެ ކުލަބުން އެއްބަސްވުމަކަށް އައިސްފިކަމަށް ރިޕޯޓުތައް ބުނެފިއެވެ. 

ސްކައި ސްޕޯޓްސްއިން ހާމަކޮށްފައިވާ ގޮތުގައި، މިދިޔަ 2024ވަނަ އަހަރު ބަލޮންޑޯ ހާސިލުކުރި ހުނަރުވެރި މިޑްފީލްޑަރު ވަނީ ކެޓަލާން ކުލަބާއެކު ހަތަރު އަހަރު ދުވަހުގެ ކޮންޓްރެކްޓެއް ހެދުމަށް ގަބޫލުވެފައެވެ. އަދި މި ޓްރާންސްފާގެ އެންމެހައި ކަންކަން ނިންމާލުމަށް ޓަކައި ކުރިއަށް އޮތް ހަފުތާގެ ތެރޭގައި އޭނާ ސްޕެއިނަށް ފުރާނެއެވެ.

އުމުރުން 30އަހަރުގެ ރޮޑްރީގެ ވިދުން މި ފަހުން އެންމެ ބޮޑަށް ގަދަވެފައި ވަނީ، 2026ވަނަ އަހަރުގެ ފީފާ ވޯލްޑް ކަޕްގައެވެ. އެ މުބާރާތުގައި ތަފާތު މޮޅު ކުޅުމެއް ދައްކައި، ސްޕެއިނަށް ދެވަނަ ފަހަރަށް ދުނިޔޭގެ ތަށި ހޯދައިދިނުމުގެ އިތުރުން، މުބާރާތުގެ އެންމެ މޮޅު ކުޅުންތެރިޔާއަށްދޭ ރަން ބޯޅަ ވެސް ހާސިލުކުރީ އޭނާއެވެ.

މީގެ ހަތް އަހަރު ކުރިން، 2019ވަނަ އަހަރު އެތުލެޓިކޯ މެޑްރިޑުން 62.8މިލިއަން ޕައުންޑުގެ ރެކޯޑު ފީއަކަށް ސިޓީއާ ގުޅުނު ކުޅުންތެރިޔާގެ އެއްބަސްވުމުގައި ބާކީ އޮތީ އެންމެ އަހަރެކެވެ. ސިޓީން އޭނާ މަޑުކުރުވަން އެއްބަސްވުން އައުކުރަން ބޭނުންވި ނަމަވެސް، މިހާތަނަށް އެ ކުލަބަށް ކުޅެދިން 298މެޗުގައި އޭނާ ވަނީ 12މުބާރާތް ކާމިޔާބުކޮށްފައެވެ. މީގެ ތެރޭގައި ޕްރިމިއަރ ލީގުގެ ހަތަރު ތަށްޓާއި، ޔުއެފާ ޗެމްޕިއަންސް ލީގުގެ އިތުރުން އެފްއޭ ކަޕްގެ ދެ ތަށްޓާއި ލީގު ކަޕްގެ ތިން ތަށި ހިމެނެއެވެ.

ބުރަކައްޓަށް ދިމާވި މައްސަލައަކާ ގުޅިގެން ކުޑަ އޮޕަރޭޝަނެއް ކުރުމަށް ފަހު ރޮޑްރީ ފަރިތަކުރުންތަކާ ގުޅުނީ މިދިޔަ ހުކުރު ދުވަހުއެވެ. އެހެންކަމުން، ރޭ ކޮމިއުނިޓީ ޝީލްޑް މެޗުގައި އާސެނަލް އަތުން 3-0އިން ސިޓީ ބަލިވި މެޗުގައި އޭނާ ކުޅެފައެއް ނުވެއެވެ.