ބޮޑު މޮޅަށް ފަހު އާ ކުޅުންތެރިންނަށް އާޓެޓާގެ ތައުރީފު

އާ ސީޒަނަށް އާސެނަލްއާ ގުޅުނު އާ ކުޅުންތެރިންނަށް ކޯޗް އާޓެޓާ ތައުރީފްކޮށްފިއެވެ.

ކާޑިފްގައި ކުޅުނު ކޮމިއުނިޓީ ޝީލްޑް މެޗުގައި ޕްރިމިއާ ލީގުގެ ޗެމްޕިއަން މެންޗެސްޓަރ ސިޓީ 3-0 އިން ބަލިކޮށް ތަށި އުފުލާލުމަށް ފަހު، އާޓެޓާ ބުނީ މި ހޫނު މޫސުމުގައި އެ ކްލަބުން ގެނައި އާ ކުޅުންތެރިންގެ ބޭނުންތެރިކަން މިހާރު ވެސް ފެންނަމުންދާ ކަމަށެވެ.

އެންޒޯ މަރެސްކާގެ އިރުޝާދުގެ ދަށުން މުޅިން އަލަށް ނުކުތް ސިޓީއާ ދެކޮޅަށް އާސެނަލްއިން ދެއްކި މޮޅު ކުޅުމުގައި، ބްރޫނޯ ގިމަރޭޒް އަދި ކްރިސްޓޮސް ޒޮލިސް ފުރަތަމަ އެގާރައިގައި ހިމެނިގެން ކުޅުނުއިރު، އާ ކުޅުންތެރިން މެޗުގެ ފޯރިއާ އަވަހަށް ހޭނުމުން އާސެނަލްގެ ކޯޗު ހުރީ ވަރަށް ހިތްހަމަޖެހިފައެވެ.

މެޗުގައި އެންމެ ފާހަގަކޮށްލެވުނު އެއް ކުޅުންތެރިއަކީ ދެ އެސިސްޓް ހެދި ޒޮލިސް އެވެ. ގްރީކްގެ ވިންގަރ ވަނީ ދެވަނަ ލަނޑު ޖެހުމަށް ކައި ހާވާޓްޒްއަށް ފުރުސަތު ތަނަވަސްކޮށްދިނުމުގެ އިތުރުން، ހާފްޓައިމަށް ފަހު މާގިނައިރެއްނުވެ މާޓިން އޮޑެގާޑް އާސެނަލްގެ ތިންވަނަ ލަނޑު ޖެހުމަށް ވެސް މަގުފަހިކޮށްދީފައެވެ.

މީގެއިތުރުން މިޑްފީލްޑުގައި ގިމަރޭޒް ވެސް ވަނީ މޮޅު ކުޅުމެއް ދައްކައި، އާސެނަލްއަށް މެޗުގެ ކޮންޓްރޯލް ހޯދައިދިނުމުގައި އެހީތެރިވެދީފައެވެ. މިއީ ކުރިން ވެސް ވަރުގަދަ ސްކޮޑެއް އޮތް އާޓެޓާއަށް ލިބުނު އިތުރު ހިތްހަމަޖެހުމެކެވެ.

މިދިޔަ ސީޒަނުގެ ޕްރިމިއާ ލީގު ކާމިޔާބުކުރުމަށް ފަހު، ވާދަވެރިކަން ދެމެހެއްޓުމަށް ޓަކައި ސްކޮޑު ވަރުގަދަކުރަން ޖެހޭ ކަމަށް އާޓެޓާ ތަކުރާރުކޮށް ބުނަމުންދިޔަ ދަނޑިވަޅެއްގައި މި މެޗުގެ ކުޅުން ވަރަށް މުހިންމެވެ. ކޮމިއުނިޓީ ޝީލްޑް މެޗުން ފެނިގެންދިޔައީ އާ ކުޅުންތެރިންނަކީ ހަމައެކަނި މުސްތަގުބަލަށް ގެނައި ބައެއް ނޫން ކަމާއި، އެ ކުޅުންތެރިންނަށް ވަގުތުން ޓީމަށް އެހީތެރިވެދެވޭނެކަން ފެނިގެން ހިނގައްޖެއެވެ.

އާސެނަލްގެ ކޯޗު ބުނިގޮތުގައި މި ކުޅުމުން ފެނިގެންދިޔައީ ކުޅުންތެރިންގެ ކިބައިން އޭނާ ބޭނުންވާ ފަދަ މޮޅުވުމުގެ ރޫހެކެވެ. އަދި އާ ސީޒަން މިހާ ވަރުގަދަކޮށް ފެށުމުން އޭނާއަށް ހައިރާންކަމެއް ލިބުނުކަމަށް ވެސް އޭނާ އެއްބަސްވިއެވެ.

މެޗު ފެށިގެން އެންމެ 24 ސިކުންތުގެ ތެރޭގައި ކަލަފިއޯރީ ޖެހި ލަނޑަކީ ފާއިތުވި 58 އަހަރު ތެރޭގައި ކޮމިއުނިޓީ ޝީލްޑް މެޗެއްގައި ފެނުނު އެންމެ އަވަސް ލަނޑެވެ. އޭގެފަހުން ހާވާޓްޒް ނަތީޖާ ފުޅާކޮށްދިންއިރު، ދެވަނަ ހާފު ފެށިގެން ތިންވަނަ މިނެޓުގައި އޮޑެގާޑް ވަނީ މެޗުގެ ނަތީޖާ ކަށަވަރުކޮށްދީފައެވެ. 

އާޓެޓާއަށް މި ނަތީޖާގެ މުހިންމުކަން ހަމައެކަނި ތަށްޓަށްވުރެ މާ ބޮޑެވެ.

އާސެނަލްގެ ކޯޗު ބޭނުންވަނީ ގިނަ މުބާރާތްތަކެއްގައި ވާދަކުރެވޭނެ ފަދަ ވަރުގަދަ ސްކޮޑެއް ބިނާކުރާށެވެ. އަދި ޒޮލިސް އަދި ގިމަރޭޒްގެ ކުޅުމުން ފެނިގެންދިޔައީ ޓީމަށް ލިބިފައިވާ އިތުރު ފެންވަރާއި ހުނަރެވެ.

ޚާއްޞަކޮށް ޒޮލިސްގެ ދެ އެސިސްޓަކީ ވަރަށް މުހިންމު އެސިސްޓްތަކެކެވެ. އޭނާގެ ހަލުވި ކުޅުމާއި ޑިފެންޑަރުންނަށް ނުރައްކާކުރުމުގެ ސަބަބުން އާސެނަލްގެ ވާތްފަރާތު ފަޅިން އިތުރު ބާރެއް ލިބުނެވެ. އަދި އޮޑެގާޑްއާއި ހާވާޓްޒްއާ އެކު އޮތް ގުޅުމުން އެނގެނީ އޭނާއަކީ އާޓެޓާގެ އެޓޭކިންގް ރޮޓޭޝަންގައި މުހިންމު ކުޅުންތެރިއަކަށް އަވަހަށް ވެގެންދާނެ ކަމެވެ.

މި މޮޅުން އާސެނަލްގެ ސްކޮޑުގައި ކުޅުންތެރިންގެ މެދުގައި އޮތް ވާދަވެރިކަންވެސް  ހާމަވެގެންދިޔައެވެ. ޖާގަ މަދުވުމުގެ ސަބަބުން، މެޗުގެ ސްކޮޑުން ބައެއް މުހިންމު ކުޅުންތެރިން ބާކީކުރަން އާޓެޓާއަށް މަޖުބޫރުވިއެވެ.

ސްކޮޑުން ބާކީވި ކުޅުންތެރިންގެ ތެރޭގައި ގެބްރިއެލް މާޓިނެލީ، ގެބްރިއެލް ޖީސޫސް އަދި އީތަން އެންވަނޭރީ ހިމެނޭއިރު، މިއާ އެކު އެ ކުޅުންތެރިންގެ މުސްތަގުބަލާ މެދު ސުވާލު އުފެދުނެވެ. ނަމަވެސް، އެ ކުޅުންތެރިން ސްކޮޑުގައި ނެތުމަކީ އެމީހުން ކްލަބް ދޫކޮށްލަނީ ކަމަށް ދޭހަވާ ކަމެއް ނޫން ކަމަށް އާޓެޓާ ބުންޏެވެ.

އޭގެ ބަދަލުގައި، އޭނާ ވަނީ ޕްރިމިއާ ލީގުގެ މެޗުތަކުގައި ހިމަނަންޖެހޭ ކުޅުންތެރިންގެ އަދަދު ކަނޑައަޅާފައިވާ ގަވާއިދަށް އަނެއްކާ ވެސް ފާޑުކިޔާފައެވެ. އަދި ސްކޮޑުގެ އަދަދު އިތުރުކުރުމަށް ވަކާލާތުކުރަމުން އޭނާ ބުނީ، ކުޅެން ހައްގުވާ އެތައް ކުޅުންތެރިންނެއް ބާކީކުރަން ޖެހޭ ކަމަށެވެ. އޭނާ މީގެ ކުރިން ވެސް އޭނާ ވަނީ ޗެމްޕިއަންސް ލީގުގެ ގަވާއިދުތަކާ އެއްގޮތަށް މެޗުތަކުގައި 23 ކުޅުންތެރިންގެ ސްކޮޑެއް ހިމެނުމަށް ބާރުއަޅާފައެވެ.