އާޓެޓާގެ ކޮންޓްރެކްޓް އިތުރުކުރަން ނިންމައިފި

22 އަހަރުގެ ދިގު އިންތިޒާރަކަށްފަހު އިނގިރޭސި ޕްރިމިއަރ ލީގުގެ ޗެމްޕިއަންކަން އާސެނަލްއަށް ހޯދައިދިނުމުގައި އަދާކުރި މުހިންމު ދައުރުގެ ސަބަބުން، އެ ކުލަބުގެ ހެޑް ކޯޗު މިކޭލް އާޓެޓާގެ އެއްބަސްވުމުގެ މުއްދަތު އިތުރުކުރުމަށް އެ ޓީމުގެ މެނޭޖްމަންޓުން ނިންމާފައިވާކަމަށް ބީބީސީން މިއަދު ރިޕޯޓުކޮށްފިއެވެ.

މި ހިނގާ ސީޒަނުގެ ނިޔަލަށް އާޓެޓާގެ މިހާރުގެ ކޮންޓްރެކްޓް ހަމަވުމަށް ކައިރިވެފައިވާއިރު، އައު އެއްބަސްވުމަކަށް އައުމަށް ފާއިތުވި މަސްތަކުގައި ވަނީ ގިނަ މަޝްވަރާތަކެއް ކުރިއަށް ގެންގޮސްފައެވެ. ކުލަބުގެ ކޯ-ޗެއާމަން ޖޯޝް ކްރޮއެންކޭ ފާއިތުވި މެއި މަހު ހާމަކުރެއްވި ގޮތުގައި، ކޯޗުގެ މަގާމުގައި އޭނާ ދެމެހެއްޓުމަކީ އާސެނަލްގެ އިސްވެރިން މިވަގުތު އެންމެ ބޮޑު އަހައްމިއްޔަތުކަމެއް ދޭ އެއް ކަންތައް ކަމުގައެވެ.

އުމުރުން 44އަހަރުގެ ކޯޗު ކުލަބު ދޫކޮށްލަފާނެކަމުގެ އަޑުތަކެއް ފެތުރުނު ނަމަވެސް، މިއަހަރު ފެށުނުކޮޅު އޭނާ ވަނީ އާސެނަލްގައި މަޑުކުރަން ބޭނުންވާކަން ސާފުކޮށްދީފައެވެ.2019ވަނަ އަހަރު ޓީމާ ހަވާލުވުމަށް ފަހު އާޓެޓާ ވަނީ ކުޅުމުގެ ވައްޓަފާޅިއަށް އިންގިލާބީ ބަދަލުތަކެއް ގެނެސްދީފައެވެ. އޭގެ ނަތީޖާއެއްގެ ގޮތުން ވިދިވިދިގެން ތިން އަހަރު ލީގުގެ ދެވަނަ މަގާމު ހޯދުމަށްފަހު، ނިމިދިޔަ ސީޒަނުގައި އޭނާ ވަނީ ލީގުގެ ތަށި އުފުލާލާފައެވެ.

ލީގު ޗެމްޕިއަންކަން ދިފާއުކުރުމުގެ އަޒުމުގައި ނުކުމެ، އާސެނަލްއިން ވަނީ ކުޅުނު ފުރަތަމަ ހަތަރު މެޗުން ވެސް މޮޅުވެ ރަނގަޅު ފެށުމެއް ހޯދާފައެވެ. ނަމަވެސް، ފާއިތުވި ހޮނިހިރު ދުވަހުގެ ރޭ ބްރައިޓަންއާ ދެކޮޅަށް ކުޅުނު މެޗުން 3-0ގެ ނަތީޖާއަކުން ބަލިވެ، މި ސީޒަނުގެ ފުރަތަމަ ނާކާމިޔާބީއާ ވަނީ ކުރިމަތިލާން ޖެހިފައެވެ.