މޯލްޑިވްސް ހާފް މެރަތަން 2026އާ ގުޅިގެން އާންމުންނަށް މައުލޫމާތު ދިނުމަށާއި ދުޅަހެޔޮ ސިއްހަތަކަށް ހޭލުންތެރިކުރުމުގެ މަގުސަދުގައި، ހުޅުމާލޭ ސިންތެޓިކް ޓްރެކްގައި ހާއްސަ އެކްސްޕޯއެއް ފަށައިފިއެވެ.
މި ހިނގާ މަހުގެ 11އިން 12ވަނަ ދުވަހުގެ ނިޔަލަށް ކުރިއަށްގެންދާ މި ހަރަކާތުގައި ތަފާތު ގިނަ ޕްރޮގްރާމްތަކެއް ރާވާފައިވާއިރު، އެންމެ ފާހަގަކޮށްލެވޭ އެއް ކަމެއްގެ ގޮތުގައި ތަޖުރިބާކާރުންގެ ޕެނަލް ޑިސްކަޝަނެއް ރޭ ވަނީ ބާއްވާފައެވެ. ސިއްހަތަށް ފައިދާހުރި ގޮތެއްގައި ދިރިއުޅުމުގެ އާދަތައް ބައްޓަންކުރުމާއި، އެކުވެރިކަމާއެކު ދުވުމުގެ މުހިންމުކަމުގެ މައްޗަށް އަލިއަޅުވާލި މި މަޝްވަރާތަކުގައި، މޯލްޑިވްސް ހާފް މެރަތަންގެ އެމްބެސަޑަރު އަދި ދުނިޔޭގެ ފެންވަރުގައި ފާހަގަކޮށްލެވޭ ފިޓްނަސް ތަރި މިލިންޑް ސޮމަން ވަނީ ބައިވެރިވެފައެވެ.
މައުލޫމާތު ފޯރުކޮށްދިނުމުގެ އިތުރުން، ޒިޔާރަތްކުރާ ފަރާތްތަކަށް ހާއްސަކޮށްގެން މުނިފޫހިފިލުވުމުގެ ގިނަ ހަރަކާތްތަކެއް ވެސް މި އެކްސްޕޯގެ ތެރެއިން ފެނިގެންދާނެއެވެ. ހަމައެހެންމެ، މުޖުތަމައުގެ ހުރިހާ އުމުރުފުރައެއްގެ ބައިވެރިވުން އިތުރުކުރުމުގެ ގޮތުން، މި މަހުގެ 13ވަނަ ދުވަހުގެ ހަވީރު ކުޑަކުދިންނަށް ހާއްސަ ފެސްޓިވަލެއް ނުވަތަ ކުޑަކުދިންގެ ހަވީރެއް ބޭއްވުމަށް ވެސް އިންތިޒާމުކުރާ ފަރާތުން ވަނީ ނިންމާފައެވެ.
މި ހުރިހާ ހަރަކާތްތަކަކަށް ފަހު، މޯލްޑިވްސް ހާފް މެރަތަންގެ މައިގަނޑު ދުވުން އޮންނާނީ މި މަހުގެ 14ވަނަ ދުވަހުގެ ހެނދުނު، ހުޅުމާލޭ ސިންތެޓިކް ޓްރެކް ސަރަހައްދުގައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.