ނެދަލެންޑްސްއަށް ނޫނެކޭ ބުނެ،ސްލޮޓް ކުލަބު ފުޓުބޯޅައަށް

ލިވަޕޫލްގެ ކުރީގެ ކޯޗު އާނޭ ސްލޮޓް، ނެދަލެންޑްސްގެ ގައުމީ ޓީމުގެ ކޯޗުކަމާ ހަވާލުވުމަށް އެ ގައުމުގެ ފުޓުބޯޅަ އިދާރާއާއެކު ކުރިއަށްގެންދިޔަ މަޝްވަރާތައް ހުއްޓާލައި، ކުލަބު ފުޓުބޯޅައިގައި އިތުރަށް ކުރިއަށް ދިއުމަށް ނިންމައިފިއެވެ.

ނެދަލެންޑްސްގެ ފުޓުބޯޅަ އެސޯސިއޭޝަނާއެކު ކުރެވުނު މަޝްވަރާތަކުން އޭނާ ވަކިވީ އެއްބަސްވުމުގެ މުއްދަތާއި މުސާރައާ މެދު އުފެދުނު ހިޔާލުތަފާތުވުންތަކެއްގެ ސަބަބުން ކަމަށް މީޑިއާގައި ފެތުރިފައިވާ ރިޕޯޓުތައް ސްލޮޓް ވަނީ ދޮގުކޮށްފައެވެ. އޭނާ ހާމަކުރި ގޮތުގައި އެ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށާއި، ދެފަރާތުގެ ދެމެދުގައި މާލީ ކަންކަމާ ގުޅޭގޮތުން އެއްވެސް މަޝްވަރާއެއް ކުރެވިފައި ނުވާނެ ކަމަށެވެ.

ގައުމީ ޓީމުގެ ބަދަލުގައި ކުލަބަކާ ހަވާލުވާން ނިންމި މައިގަނޑު ސަބަބު ސާފުކޮށްދެމުން އުމުރުން 47އަހަރުގެ ކޯޗު ބުނީ، އޭނާގެ ކެރިއަރުގެ މި ދަނޑިވަޅުގައި ބޭނުންވަނީ ކޮންމެ ދުވަހަކު ކުޅުންތެރިންނާއެކު ފަރިތަކުރުންތަކުގައި ބައިވެރިވެ ދަނޑުމަތީގައި ވަގުތު ހޭދަކުރުމަށް ކަމަށެވެ. އަދި ގައުމީ ޓީމަކާ ހަވާލުވެއްޖެ ނަމަ އެ ފުރުސަތު ނުލިބޭނެކަން ފާހަގަކުރަމުން، ކުލަބު ލެވެލްގައި އަދިވެސް ގިނަ ކާމިޔާބީތަކެއް ހާސިލުކުރަން ބޭނުންވާކަމަށް ސްލޮޓް ބުންޏެވެ.

ނެދަލެންޑްސްގެ ފުޓުބޯޅަ އިދާރާއަށާއި ގައުމީ ޓީމަށް އޭނާގެ ހިތުގައި ވަރަށް ބޮޑު ގަދަރަކާއި އިހުތިރާމެއް އޮތްކަން ފާހަގަކުރަމުން ސްލޮޓް ބުނީ، މުސްތަގުބަލުގައި އަމިއްލަ ގައުމީ ޓީމަށް އިރުޝާދު ދިނުމަކީ ލިބިގެންދާނެ ވަރަށް ބޮޑު ފަޚުރެއް ކަމަށެވެ. ނަމަވެސް މިއީ އެކަމަށް އެންމެ ރަނގަޅު ވަގުތު ނޫންކަމަށް 2023ވަނަ އަހަރު ފެޔަނޫޑަށް ނެދަލެންޑްސް ލީގު ކާމިޔާބުކޮށްދިން ކޯޗު ބުންޏެވެ.

ސްލޮޓް އެންމެ ފަހުން ހަވާލުވެހުރި ލިވަޕޫލުން ވަނީ އޭނާގެ ފުރަތަމަ ސީޒަނުގައި ލީގު ތަށި 20ވަނަ ފަހަރަށް އެ ކުލަބަށް ކާމިޔާބުކޮށްދީފައެވެ. އެހެންނަމަވެސް، މިދިޔަ ސީޒަނުގައި އިނގިރޭސި ޕްރިމިއަރ ލީގުގެ ފަސްވަނައިގައި ލިވަޕޫލް އޮވެ ނިންމާލަން ޖެހުމުގެ ސަބަބުން، މެއި 30ގައި އޭނާ ވަނީ މަގާމުން ދުރުކޮށްފައެވެ. ނެދަލެންޑްސްގެ ކޯޗުކަމުގެ މަގާމު ހުސްވެފައި ވަނީ، 2026ގެ ވޯލްޑް ކަޕްގެ ދެވަނަ ބުރުގައި ޕެނަލްޓީ ޝޫޓްއައުޓުން މޮރޮކޯ އަތުން ބަލިވުމާ ގުޅިގެން ރޮނާލްޑް ކޫމަން އިސްތިއުފާ ދިނުމުންނެވެ.

ސްލޮޓް ގައުމީ ޓީމާ ހަވާލުނުވާން ނިންމުމާ އެކު، ނެދަލެންޑްސްގެ ފުޓުބޯޅަ އެސޯސިއޭޝަނުން މިހާރު އަންނަނީ ޕޯޗުގަލްގެ ކުރީގެ ކޯޗު ރޮބާޓޯ މާޓިނޭޒް އެ މަގާމަށް އައްޔަންކުރުމުގެ މަޝްވަރާތައް ކުރިއަށްގެންދަމުން ކަމަށް ރިޕޯޓުތައް ބުނެއެވެ.