"މާޒިޔާއިން ނުކުންނާނީ އުނދަގޫ އިމްތިޙާނަކަށް"

ތަޖިކިސްޠާނުގެ ރެގާރު ޓަޑާޒްއާ ދެކޮޅަށް އޭއެފްސީ ޗެލެންޖް ލީގުގެ ޕްރިލިމިނަރީ ބުރުގައި ކުޅޭ މެޗުން މޮޅުވެ ގްރޫޕް ސްޓޭޖުގެ ޖާގައެއް ކަށަވަރުކުރުމަކީ މާޒިޔާ ސްޕޯޓްސް އެންޑް ރެކްރިއޭޝަނަށް އޮތް ވަރަށް ބޮޑު ގޮންޖެހުމެއްކަމަށް އެ ޓީމުގެ އައު ކޯޗު، ޗެކް ރިޕަބްލިކްގެ ތޯމަސް ޓްރުޗާ ހާމަކޮށްފިއެވެ.

ނޫސްވެރިންނާ ބައްދަލުކުރައްވައި ވާހަކަދައްކަމުން ޓްރުޗާ ބުނީ އިދިކޮޅު ޓީމުގެ ކޯޗަކީ އެ ކުޅުންތެރިންނާ އެކު ގިނަ ދުވަސްތަކެއް ހޭދަކޮށްފައިވާ ތަޖުރިބާކާރެއް ކަމަށާއި، އަދި އެ ޓީމުގެ މައިގަނޑު ކުޅުންތެރިންނަކީ ވެސް އެކުގައި ގިނަ މެޗުތަކެއް ކުޅެފައިވާ ބައެއް ކަމަށެވެ. މީގެ އިދިކޮޅަށް، މާޒިޔާގެ އިރުޝާދު ދިނުމާ އޭނާ ހަވާލުވިތާ އަދި ވީ އެންމެ އެގާރަ ދުވަސްކަން ފާހަގަކޮށް، ކޯޗު ވަނީ މި ތަފާތުގެ ސަބަބުން ރެގާރު ޓަޑާޒްއަށް ބޮޑު ފައިދާއެއް އޮންނާނެކަމަށް ބުނެފައެވެ.

މި އުނދަގޫ މެޗުން ކާމިޔާބީ ހޯދޭނީ މުޅި ޓީމު އެކުގައި އާދަޔާޚިލާފު ހިތްވަރެއް ނެރެގެންކަމަށް ޓްރުޗާ ބުންޏެވެ. ފުރަތަމަ އެގާރައިގައި ހިމެނޭ ކުޅުންތެރިންގެ އިތުރުން ބަދަލު ކުޅުންތެރިންގެ ގޮތުގައި އަރާ ފަރާތްތަކުން ވެސް ސަތޭކަ އިންސައްތަ ހިތްވަރު ދޭންޖެހޭނެކަން އޭނާ ތަކުރާރުކުރިއެވެ. ކީޕަރުގެ ހުޝިޔާރުކަމާއި، ޑިފެންޑަރުންގެ ސާބިތުކަމާއި، މިޑްފީލްޑަރުން މެޗު ކޮންޓްރޯލްކުރުމުގެ އިތުރުން ވިންގުތަކަށް ކުޅޭ ކުޅުންތެރިން މެދުކެނޑުމެއްނެތި ދުވެ، ފޯވާޑުން ލަނޑު ޖެހުމުގެ މުހިންމުކަން ކޯޗު ފާހަގަކުރިއެވެ.

ޓްރުޗާގެ ބެލުމުގެ ދަށުން މާޒިޔާ ނުކުންނަ ތިންވަނަ މެޗުން މޮޅުވެއްޖެނަމަ، އޭއެފްސީ ޗެލެންޖް ލީގުގެ ގްރޫޕް ސްޓޭޖުން އެ ކުލަބަށް ޖާގަ ލިބޭނެއެވެ. އޭއެފްސީގެ މުބާރާތްތަކުގެ އޮނިގަނޑަށް ގެނެވުނު ބަދަލުތަކާ އެކު ރާއްޖެއަށް ލިބެނީ އެންމެ ޖާގައެކެވެ. ރޭންކިންގ އޮތް ގޮތުން ދިވެހި ޓީމުތަކަށް މިހާރު ޖެހެނީ ޕްރިލިމިނަރީ ބުރުގައި ނުވަތަ ޕްލޭއޮފްގައި ވާދަކުރާށެވެ. ފާއިތުވި އަހަރު ވެސް މާޒިޔާއިން މި މުބާރާތުގެ ގްރޫޕް ސްޓޭޖުގައި ކުޅުނެވެ. ނަމަވެސް، ކުޅުނު ތިން މެޗުން ވެސް ވަނީ ނާކާމިޔާބީއާ ކުރިމަތިލާން ޖެހިފައެވެ.

މާޒިޔާއާއި ރެގާރު ޓަޑާޒް ކުރިމަތިލާ ފޯރިގަދަ މެޗު ފެށުމަށް ހަމަޖެހިފައި ވަނީ ބުދަ ދުވަހުގެ މެންދުރުފަހު ތިނެއް ޖަހާއިރު، މާލޭގެ ގަލޮޅު ރަސްމީ ދަނޑުގައެވެ.