ވޮޝިންގޓަން އޯޕަންގެ ފައިނަލަށް ފްރިޓްޒް އަދި ހޯޑަރ

އެމެރިކާގެ ވޮޝިންގޓަން ޑީސީގައި މިހާރު ކުރިއަށްދާ މުބަޑާލާ ޑީސީ އޯޕަން ޓެނިސް މުބާރާތުގެ ފިރިހެން ސިންގަލްސް ފައިނަލަށް، އެމެރިކާގެ ޓޭލަރ ފްރިޓްޒް އަދި ސްޕެއިންގެ އުއްމީދީ ކުޅުންތެރިޔާ ރަފައެލް ހޯޑަރ ސެމީ ފައިނަލްގެ މެޗުތައް ކާމިޔާބުކޮށް ދަތުރުކޮށްފިއެވެ.

މި މުބާރާތުގައި ތިންވަނައަށް އެންމެ މަތިން ސީޑުކުރެވިފައިވާ ފްރިޓްޒް ފައިނަލުގެ ޖާގައެއް ކަށަވަރުކުރީ، ސެމީ ފައިނަލުގައި އޭނާއާ އެއް ގައުމަކަށް ނިސްބަތްވާ ބްރެންޑަން ނަކަޝީމާއާ ވާދަކޮށް، މެޗުގެ ކޮންޓްރޯލް ހޯދައިގެންނެވެ. މި މެޗު އޭނާ ކާމިޔާބުކުރީ ދެ ސެޓު އެއް ސެޓުންނެވެ. މެޗުގެ ފުރަތަމަ ސެޓު 6-3އިން ފްރިޓްޒް ގެންގޮސްފައިވަނިކޮށް، ނަކަޝީމާ ވަނީ ކުޅުން ރަނގަޅުކޮށް 6-3އިން ދެވަނަ ސެޓު ކާމިޔާބުކޮށްފައެވެ. އެހެންނަމަވެސް، ފަހު ސެޓުގައި މޮޅު ކުޅުމެއް ދައްކައި 6-3އިން ސެޓު ހޯދައި، ފްރިޓްޒް ވަނީ އޭނާގެ ކެރިއަރުގައި އޭޓީޕީ މުބާރާތެއްގެ ފައިނަލުން 23ވަނަ ފަހަރަށް ޖާގަ ހޯދާފައެވެ.

ފައިނަލުގައި ފްރިޓްޒްއާ ދެކޮޅަށް ނުކުންނަ އުމުރުން އެންމެ 19އަހަރުގެ ހޯޑަރ ސެމީ ފައިނަލް ކާމިޔާބުކުރީ ޗިލީގެ އަލެހަންޑްރޯ ޓަބީލޯއާ ބައްދަލުކުރި މެޗު ފަހަތުން އަރައި ކާމިޔާބުކޮށްގެންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު 6-6އިން އެއްވަރުވުމުން ކުޅުނު ޓައިބްރޭކް 8-6އިން ކާމިޔާބުކުރީ ޓަބީލޯއެވެ. ނަމަވެސް، އޭގެ ފަހުން ކުޅުނު ދެ ސެޓުވެސް 6-4އަދި 6-4އިން ކާމިޔާބުކޮށް ހޯޑަރ ވަނީ މެޗުން މޮޅުވެފައެވެ. މީގެ ކުރިން މިއަހަރުގެ މާރޗް މަހު އިންޑިއަން ވެލްސްގައި ޓަބީލޯ އަތުން ސީދާ ދެ ސެޓުން ބަލިވެފައިވުމާއެކު، މި މޮޅަކީ ހޯޑަރއަށް ލިބުނު ބޮޑު ހިތްހަމަޖެހުމެކެވެ. މީގެ އިތުރުން، މި ފަހަކަށް އައިސް އޭނާ ހޯދަމުން އަންނަ ބޮޑެތި ކުރިއެރުންތަކާއެކު، ކުރިއަށް އޮތް ދުނިޔޭގެ ޓެނިސް ރޭންކިންގ އަޕްޑޭޓުގައި ހޯޑަރ ދުނިޔޭގެ ގަދަ 20ކުޅުންތެރިންގެ ތެރޭގައި ހިމެނިގެންދާނެއެވެ.