ފުޓުބޯޅައިގެ ތެރޭގައި ހިނގާ ތަފާތުކުރުމުގެ ދަށުދަރަޖައިގެ އަމަލުތައް ހުއްޓުވުމުގެ މަގުސަދުގައި، އިނގިރޭސި ޕްރިމިއާ ލީގުގައި ކުޅޭ ކުޅުންތެރިއަކު ނަސްލީ ގޮތުން ނުވަތަ އެނޫން ވެސް ގޮތަކުން ފުރައްސާރައެއް ކޮށްފި ނަމަ، އެ ކުޅުންތެރިއަކަށް މަދުވެގެން ދިހަ މެޗުގެ ސަސްޕެންޝަނެއް އަންނަ ގޮތަށް އިނގިރޭސި ފުޓްބޯޅަ އެސޯސިއޭޝަން (އެފްއޭ)ގެ އަދަބު ދިނުމުގެ ގަވާއިދުތައް ހަރުކަށިކޮށްފިއެވެ.
އެފްއޭއިން ގެނައި މި ބަދަލާ އެކު، މައްސަލަތައް ބަލާ ކޮމިޓީތަކުން ކުށް ސާބިތުވާ ފަރާތްތަކަށް އެންމެ ކުޑަވެގެން ވެސް ދިހަ މެޗުގެ ސަސްޕެންޝަނެއް ދިނުން މިހާރު ލާޒިމުވާނެއެވެ. މި ގަވާއިދުގައި މަނާކޮށްފައިވާ ކަންކަމުގެ ތެރޭގައި، މީހާގެ ނަސްލާއި، ދީނާއި، ޖިންސާއި، އުފަންވި ގައުމާއި، ހަމުގެ ކުލައިގެ އިތުރުން ނުކުޅެދުންތެރިކަމަށް ނުވަތަ ޒާތީ ދިރިއުޅުމަށް އަމާޒުކޮށް ސީދާކޮށް އަދި ނުސީދާކޮށް ކުރާ ފުރައްސާރަތައް ވެސް ހިމެނެއެވެ. މީގެ ކުރިން މިފަދަ ކުށްތަކަށް ކުޅުންތެރިންނާއި، ކޯޗުން އަދި ޓެކްނިކަލް އޮފިޝަލުންނަށް ދެމުން އައީ ހަ މެޗާއި ބާރަ މެޗާ ދެމެދުގެ ސަސްޕެންޝަނެކެވެ.
އަލަށް އެކުލަވާލި އުސޫލުތައް ބުނާގޮތުން ކުށުގެ ކުޑަބޮޑު މިނަށް ބަލައި ދިހަ މެޗަށް ވުރެ ދިގު މުއްދަތަކަށްވެސް ސަސްޕެންޑުކުރުމުގެ ބާރު ލިބިގެންވެއެވެ. އެހެން ނަމަވެސް، ކުށަށް އިއުތިރާފުވެއްޖެ ނަމަ ނުވަތަ ލުއިދެވޭނެ ހާއްސަ ހާލަތެއް މެދުވެރިވެއްޖެނަމަ އަދަބު ހަ މެޗަށް ކުޑަކުރުމުގެ ފުރުސަތު އޮންނާނެއެވެ. މީސްމީޑިއާ ފަދަ ވަސީލަތްތަކުން ލިޔުމުން ކުރާ ފުރައްސާރައަށް މިއަށްވުރެ ކުރު ސަސްޕެންޝަނެއް ދެވިދާނެކަމަށް ބަޔާންކޮށްފައިވާއިރު، މިފަދަ ކަމެއް ދެވަނަ ފަހަރަށް ތަކުރާރުކޮށްފި ނަމަ ދެވޭ އަދަބު އެތައް ގުނައެއް ހަރުކަށިވާނެކަމަށް ވެސް ވަނީ އަންގާފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.