ސިނާއާއި ޖޮކޮވިޗް މުބާރާތުން ވަކިވުމުން ބޮޑު ކަންބޮޑުވުމެއް

އަންނަ ހަފުތާގައި މޮންޓްރިއާލްގައި ފެށުމަށް ތާވަލުކޮށްފައިވާ ކެނޭޑިއަން އޯޕަން ޓެނިސް މުބާރާތުގައި ދުނިޔޭގެ އެންމެ ކުރީގައި ގުނާލެވޭ ނޮވަކް ޖޮކޮވިޗް އަދި ޔަނިކް ސިނާ ބައިވެރިނުވާން ނިންމުމާ ގުޅިގެން، މުބާރާތް އިންތިޒާމުކުރާ ފަރާތްތަކުން ކަންބޮޑުވުން ފާޅުކޮށްފިއެވެ.

އަމިއްލަ ސިއްހަތަށް ރައްކާތެރިވުމުގެ ގޮތުން ސިނާ މި މުބާރާތް ދޫކޮށްލިއިރު، ތާރީޚުގައި 24ގްރޭންޑް ސްލޭމް ހޯދާފައިވާ ޖޮކޮވިޗް މުބާރާތުން ވަކިވީ އޭނާގެ ކުރިއަށް ހުރި މެޗުތަކުގެ ޝެޑިއުލް ލުއިކުރުމުގެ ބޭނުމުގައެވެ. ހަމައެއާ އެކު، އޭޕްރީލް މަހުން ފެށިގެން އަތަށް ލިބިފައިވާ އަނިޔާއަކަށް ފަރުވާ ހޯދަމުންދާތީ ޒުވާން ތަރި ކާލޯސް އަލްކަރާޒްއަށް ވެސް މި ފަހަރުގެ މުބާރާތުގައި ވާދައެއް ނުކުރެވޭނެއެވެ. ފާހަގަކޮށްލެވޭ ގޮތުގައި މިއީ މި ތިން ކުޅުންތެރިންނާ ނުލައި މި މުބާރާތް ކުރިއަށްގެންދަން ޖެހޭ ވިދިވިދިގެން ދެވަނަ ފަހަރެވެ.

މުބާރާތުގެ ޑިރެކްޓަރު ވަލެރީ ޓެޓްރޯލް ވަނީ، ފަހު ވަގުތު މުހިންމު ކުޅުންތެރިން މުބާރާތްތައް ދޫކޮށްލުމަކީ ސަޕޯޓަރުންނަށް ލިބޭ ވަރަށް ބޮޑު މާޔޫސްކަމެއްކަން ފާހަގަކޮށްފައެވެ. ކުޅުންތެރިންގެ ސިއްހަތަކީ އެންމެ އިސްކަންދޭންޖެހޭ ކަންތައް ކަމަށް ގަބޫލުކުރި ނަމަވެސް، އޭޓީޕީ 1000ފެންވަރުގެ މުބާރާތްތަކުގެ ފޯރި ހިފެހެއްޓުމަށް ޓަކައި އަދި މި މައްސަލައަށް ދާއިމީ ހައްލެއް ހޯދުމަށް އޭޓީޕީއާއެކު މަޝްވަރާކުރަމުންދާ ކަމަށް އޭނާ ބުންޏެވެ.

ކުޅުންތެރިންގެ ފަރާތުން އަންނަނީ ޓެނިސް ކަލަންޑަރުގައި އަހަރަކު 11މަސްދުވަހު މެދުކެނޑުމެއް ނެތި ކުޅެންޖެހުމުން ކުރިމަތިވާ ޖިސްމާނީ ވަރުބަލިކަމާއި އަނިޔާގެ މައްސަލަތަކުގެ ޝަކުވާ ކުރަމުންނެވެ. މިކަމާ ގުޅިގެން އޭޓީޕީގެ ޗެއާމަން އެންޑްރިއާ ގައުޑެންޒީ ބުނީ، ކުޅުމާއި ނުކުޅުން އޮންނަނީ ކުޅުންތެރިންގެ އަތްމަތީގައި ކަމަށާއި، ނަމަވެސް އެކަށީގެންވާ ވަރަށް މެޗުތައް ކުޅުމަށް ބާރުއަޅަމުންދާ ކަމަށެވެ. އަދި ޑަބްލިއުޓީއޭ އިން ވެސް އަންނަނީ ކުޅުންތެރިންގެ ސިއްހަތާ ގުޅޭގޮތުން ޝެޑިއުލްތަކަށް ބަދަލު ގެނައުމުގެ މަސައްކަތް ކުރަމުން ކަމަށް ވަނީ ބުނެފައެވެ.

ޓެނިހުގެ ދުނިޔޭގެ އުއްމީދަކީ އޮގަސްޓް މަހުގެ ފަހުކޮޅު ނިއު ޔޯކުގައި ފަށާ ޔޫއެސް އޯޕަންއަށް ތައްޔާރުވުމުގެ ގޮތުން، އަންނަ މަހު އޮންނަ ސިންސިނާޓީ އޯޕަންގައި މި ހުރިހާ ތަރިން ވެސް ކޯޓުން ފެނިގެން ދިޔުމެވެ.