މެންޗެސްޓަރ ސިޓީއަށް ގިނަގުނަ ކާމިޔާބީތަކެއް ހޯދައިދިނުމަށް ފަހު ޕެޕް ގާޑިއޯލާ މަގާމުން ވަކިވުމާ ގުޅިގެން، އެ ކުލަބުގެ އިރުޝާދުދިނުމާ އަލަށް ހަވާލުވި އެންޒޯ މަރެސްކާ، އެއީ އޭނާއަށް ކުރިމަތިވާނެ ތާރީޚީ ގޮތުން ވެސް ވަރަށް ބޮޑު އިމްތިހާނެއް ކަމަށް ބުނެފިއެވެ.
އާއިލާއާ އެކު ވަގުތު ހޭދަކުރުމުގެ ބޭނުމުގައި ނިމިދިޔަ ސީޒަނަށްފަހު ގާޑިއޯލާ ސިޓީގެ ކޯޗުކަމުން އިސްތިއުފާދީފައިވާއިރު، ފާއިތުވި ދިހަ އަހަރު ދުވަހުގެ ތެރޭގައި 20ތަށި އެ ކުލަބަށް ކާމިޔާބުކޮށްދިން ގާޑިއޯލާއަކީ ދުނިޔޭގައި ހުރި އެންމެ މޮޅު ކޯޗުކަމަށް މަރެސްކާ ސިފަކުރިއެވެ. އަދި އޭނާއަށް ފަހު ސިޓީގެ ހުންގާނާ ހަވާލުވުމުގެ ފުރުސަތު ލިބުމަކީ ފަޚުރެއްކަމުގައި ވިޔަސް، ގާޑިއޯލާގެ ބަދަލުގައި އެ ފެންވަރުގެ ނަތީޖާތަކެއް ނެރުމަކީ ފަސޭހަކަމަކަށް ނުވާނެކަމަށް މަރެސްކާ ފާހަގަކުރިއެވެ.
ތާރީޚަށް ބަލާއިރު، މެންޗެސްޓަރ ޔުނައިޓެޑްގައި ސާ އެލެކްސް ފާގަސަން އަދި އާސެނަލްގައި އާސެން ވެންގާ ފަދަ ދިގު މުއްދަތެއްގައި ޚިދުމަތްކުރި ކޯޗުންނަށް ފަހު އެ ޓީމުތަކާ ހަވާލުވި ފަރާތްތަކަށް ވެސް ބޮޑެތި ހުރަސްތަކާ ކުރިމަތިލާންޖެހުނުކަން މަރެސްކާގެ ވާހަކައިގައި އަލިއަޅުވާލިއެވެ. އެހެން ނަމަވެސް، މިފަދަ ބޮޑު ގޮންޖެހުމަކާ ކުރިމަތިލުމަކީ އޭނާ ފަސްޖެހޭނެ ކަމެއް ނޫންކަމަށާއި، މީގެ އެންމެ ހިތްހަމަޖެހޭ ކަމަކީ މި ކާމިޔާބީ ހާސިލުކުރެވޭތޯ ކެރިގެން މަސައްކަތްކުރުން ކަމަށް އޭނާ ބުންޏެވެ.
މީގެ ކުރިން ގާޑިއޯލާގެ އެހީތެރިއެއްގެ ގޮތުގައި ވެސް މަސައްކަތްކޮށްފައިވާ މަރެސްކާ ސިޓީއަށް ބަދަލުވީ، އިނގިރޭސި މީޑިއާތަކުން ރިޕޯޓުކުރާ ގޮތުގައި، ގާޑިއޯލާގެ ޚާއްސަ ލަފާގެ މަތިންނެވެ. މަރެސްކާ ވަނީ އޭގެ ކުރިން ޗެލްސީއަށް ޔޫއޭފާ ކޮންފަރެންސް ލީގާއި ކުލަބު ވޯލްޑް ކަޕް ކާމިޔާބުކޮށްދީފައެވެ.
އައު ސީޒަނަށް ޓީމު ވަރުގަދަކުރުމުގެ މަސައްކަތް މަރެސްކާ ފަށާފައިވާއިރު، އިނގިރޭސި ކުޅުންތެރިޔާ އެލިއޮޓް އެންޑަސަން ވަނީ ސިޓީއަށް ސޮއިކޮށްފައެވެ. އަދި ޖެރެމީ ޑޮކޫއާއި އުޒްބެކިސްތާނުގެ ޑިފެންޑަރު ހުސަނޯވްގެ އެއްބަސްވުން އާކުރުމުގެ އިތުރުން، ވޯލްޑް ކަޕްގެ މޮޅު ކުޅުންތެރިޔާ އަދި ސްޕެއިންގެ މުހިންމު މިޑްފީލްޑަރު ރޮޑްރީ ކުލަބުގައި މަޑުކުރުވުމަކީ މިވަގުތު އޭނާ އެންމެ އިސްކަންދޭ އެއް ކަންތައްކަމަށް ވަނީ މައުލޫމާތު ލިބިފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.