ވޯލްޑް ކަޕް ފުޓުބޯޅަ މުބާރާތުގައި ސްޕޭން އަތުން ބަލިވި މެޗަށް ފަހު، ގައުމީ ޓީމާއެކު އެނބުރި އާޖެންޓީނާއަށް ދިއުމުގެ ބަދަލުގައި، ކެޕްޓަން ލަޔޮނަލް މެސީ އޭނާ ދިރިއުޅެމުން އަންނަ އެމެރިކާގައި މަޑުކުރަން ނިންމައިފިއެވެ.
ދިފާއީ ޗެމްޕިއަނުންގެ ގޮތުގައި މުބާރާތާ ކުރިމަތިލައި އިތުރު ވަގުތުގައި 1-0ގެ ނަތީޖާއަކުން ސްޕޭން އަތުން ބަލިވި އާޖެންޓީނާ ޓީމުގެ ގިނަ ތަރިންތަކެއް ވަނީ އެނބުރި ގައުމަށް ނުދާން ނިންމާފައެވެ. މެސީ އެމެރިކާގައި މަޑުކުރިއިރު، އެހެން ކުޅުންތެރިން ވަނީ ޗުއްޓީ ހޭދަކުރުމަށާއި ކްލަބްތަކާ ގުޅުމަށް އެކި މަންޒިލްތަކަށް ފުރާފައެވެ.
އެހެން ނަމަވެސް، ކޯޗު ލަޔޮނަލް ސްކަލޯނީ އަދި ކީޕަރު އެމެލިއާނޯ މާޓިނޭޒް ފަދަ ބޭފުޅުންނާ އެކު އެނބުރި ގައުމަށް ދިޔަ ވަފުދަށް ސަރުކާރުން ވަނީ ރަތް ދޫލައިގެ ހޫނު މަރުހަބާއެއް ކިޔާފައެވެ. މެޗުގައި ރަތް ކާޑު ހޯދި އެންޒޯ ފެނާންޑޭޒްގެ އިތުރުން ލައުޓާރޯ މާޓިނޭޒް، ހޫލިއަން އަލްވަރޭޒް، ޖަރޮނީމޯ ރުއްލީ، ނޮކޯ ޕަޒް، ކްރިސްޓިއަން ރޮމޭރޯ، މޮލީނާ އަދި ހުއާން މޫސޯ ފަދަ މުހިންމު ކުޅުންތެރިން ގައުމަށް ދިޔަ ޓީމުގައި ނުހިމެނެއެވެ.
އާޖެންޓީނާގެ މީޑިއާތަކުން ރިޕޯޓުކުރާ ގޮތުގައި، މެސީއާއެކު އެމެރިކާގެ އިންޓަ މިއާމީއަށް ކުޅެމުން އަންނަ ރޮޑްރީގޯ ޑިޕޯލް ވެސް ކްލަބާ ގުޅޭނީ ޗުއްޓީ ފުރިހަމަކުރުމަށް ފަހުގައެވެ. ކުޅުންތެރިންނަށް މަރުހަބާ ކިޔުމަށް ސަރުކާރުން ބޮޑު ރަސްމިއްޔާތެއް ނުބޭއްވި ނަމަވެސް، ކުޅުންތެރިން އެދޭ ދުވަހެއްގައި ރަސްމީ ބަންދެއް އިއުލާނުކޮށް، އާންމު ސަޕޯޓަރުންނާއެކު އުފާފާޅުކުރުމުގެ ހަރަކާތްތަކެއް ކުރިއަށް ގެންދިއުމަށް މިހާރު ވަނީ ރާވާފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.