މިރޭ އާޖެންޓީނާ އާއި ސްޕެއިން ވާދަކުރާ ބޮޑު ފައިނަލް މެޗަށް ދުނިޔޭގެ ފުޓުބޯޅަ ސަޕޯޓަރުން ތައްޔާރުވަމުން އަންނައިރު، މީގެ ނަވާރަ އަހަރު ކުރިން ބާސެލޯނާގެ ކޭމްޕް ނޯ ސްޓޭޑިއަމްގެ ހެދުން ބަދަލުކުރާ ކޮޓަރީގައި ލިއޮނެލް މެސީއާއި ތުއްތު ލަމީން ޔަމާލް އެކުގައި ނަގާފައިވާ ތާރީޚީ ފޮޓޯއަކަށް މީސްމީޑިއާގައި ބޮޑު ސަމާލުކަމެއް ލިބެން ފަށައިފިއެވެ.
ޔުނިސެފްގެ ކަލަންޑަރަކަށް 2007ވަނަ އަހަރު ނެގި މި ފޮޓޯއިން ފެނިގެންދަނީ، އުމުރުން އެންމެ ތުއްތު އިރު ޔަމާލް ބާތްޓަބެއްގައި އިންދާ މެސީ އޭނާ ފެންވަރުވައިދޭ މަންޒަރެވެ. އޭރު އެއްވެސް މީހަކަށް ނޭނގުނު ނަމަވެސް، މިއަދު އުމުރުން 19އަހަރުގެ ޔަމާލް އަކީ ބާސެލޯނާގައި މެސީގެ ފިޔަވަޅުތަކުގެ މަތިން ހިނގަމުން އަންނަ، އަދި ސްޕެއިންގެ ޤައުމީ ޓީމުގައި ވެސް އެންމެ ވިދުންގަދަ އެއް ކުޅުންތެރިޔާއެވެ. ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާގެ ގޮތުގައި ގިނަ ބަޔަކު ދެކޭ މެސީއާ ދެކޮޅަށް، އޭނާގެ ބަދަލުގައި ކުރިމަގުގައި ވިދާލާނެކަމަށް ބެލެވޭ ޔަމާލް ނުކުންނަ މި މެޗަކީ ފުޓުބޯޅައިގެ މާޒީ އާއި މުސްތަޤުބަލް ގުޅުވައިދޭނެ ކުރިމަތިލުމެއްގެ ގޮތުގައި ތަޖުރިބާކާރުން ސިފަކުރެއެވެ.
މި ފޮޓޯއާ ގުޅިފައިވާ އެންމެ އާދަޔާޚިލާފު އެއް ކަމަކީ އަދަދު "ނަވާރަ"އާ ގުޅިފައިވާ އިއްތިފާޤުތަކެވެ. މިގޮތުން، މި ފޮޓޯ ނެގިތާ މިހާރު 19އަހަރު ވެފައިވާއިރު، ޔަމާލްގެ އުމުރުން ވެސް ވަނީ 19އަހަރު ފުރިފައެވެ. މީގެ އިތުރުން ސްޕެއިންގެ ޤައުމީ ޓީމުގައި ޔަމާލް ބޭނުންކުރާ ޖާޒީ ނަންބަރަކީ 19ކަމަށްވާއިރު، މި ފޮޓޯ ނެގި ދުވަސްވަރު މެސީ ބާސެލޯނާގައި ކުޅެމުންދިޔައީ ވެސް ހަމަ 19ނަންބަރު ޖާޒީގައެވެ. މިއީ ސަޕޯޓަރުންނަށް ލިބިފައިވާ ވަރަށް ބޮޑު ހައިރާންކަމެކެވެ.
މި ތާރީޚީ މަންޒަރު އެންމެ ފުރަތަމަ ގިނަ ބައެއްގެ ލޮލުގައި އަޅައިގަތީ، ނިމިދިޔަ 2024ވަނަ އަހަރުގެ ޔޫރޯ މުބާރާތް ސްޕެއިން އިން ކާމިޔާބުކުރުމާ ގުޅިގެން ޔަމާލްގެ ބައްޕަ މުނީރު ނަސްރާއީ ސޯޝަލް މީޑިއާގައި މި ފޮޓޯ އާންމުކުރުމުންނެވެ. "ދެ ލެޖެންޑުންގެ ފެށުން"ކަމަށް ބުނެ އޭނާ ހިއްސާކުރި މި ފޮޓޯއަށްފަހު، މިރޭގެ ފައިނަލް ވެގެންދާނީ ފުޓުބޯޅަ ދަނޑެއްގައި ރަސްމީކޮށް މި ދެތަރިން ކުރިމަތިލާ ފުރަތަމަ ފަހަރަށެވެ. މެޗުގެ ނަތީޖާ ކޮންމެ ގޮތަކަށް ނުކުތް ނަމަވެސް، މި ދެ ކުޅުންތެރިންގެ މެދުގައި އޮތް ވާދަވެރިކަމާ އެކު މި ފޮޓޯގެ މަޤުބޫލުކަން އިންޓަނެޓުގައި އިތުރަށް އުފުލިގެންދާނެކަން ކަށަވަރެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.