"ސްޕެއިނަށް އޮތް އެންމެ އުނދަގޫ މަރުހަލާއަކީ ބެލްޖިއަމް"

ފީފާ ވޯލްޑް ކަޕް 2026ގެ ކުއާޓާ ފައިނަލްގައި މިރޭ މެންދަމު ރާއްޖެ ގަޑިން 12ޖަހާއިރު ބެލްޖިއަމާ ދެކޮޅަށް ސްޕެއިން ނުކުންނަ މެޗަކީ، މި މުބާރާތުގައި އެ ޓީމު ކަޑައްތުކުރަންޖެހޭނެ އެންމެ އުނދަގޫ ހަރުފަތް ކަމަށް ސްޕެއިންގެ ކޯޗު ލުއިސް ޑެ ލަ ފުއެންޓޭ ބުނެފިއެވެ.

ޔޫރަޕްގެ ނަން މަޝްހޫރު ބޮޑެތި ކްލަބްތަކުގައި ކުޅެމުން އަންނަ ތަޖުރިބާކާރު ކުޅުންތެރިންތަކެއް ހިމެނޭ ބެލްޖިއަމްގެ ސްކޮޑަކީ ވަރަށް ނުރައްކާތެރި އަދި ވަރުގަދަ ޓީމެއްކަން މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޑެ ލަ ފުއެންޓޭ ފާހަގަކުރިއެވެ. އޭނާ ކަށަވަރުކޮށްދިން ގޮތުގައި މިއީ މިހާތަނަށް ސްޕެއިނުން ކުރިމަތިލާ އެންމެ އުނދަގޫ އަދި އެންމެ ބޮޑު އިމްތިހާނެވެ.

މި މުބާރާތުގައި މިހާތަނަށް ކުޅުނު އެއްވެސް މެޗެއްގައި ސްޕެއިން ކޮޅަށް ގޯލެއް ވަދެފައި ނުވާއިރު، އެ ޓީމުން ކުއާޓާގެ ޖާގަ ކަށަވަރުކުރީ ގަދަފަދަ ޕޯޗުގަލްގެ މައްޗަށް 1-0އިން ކުރިހޯދައިގެންނެވެ. ސްޕެއިން ފެންނަނީ ބަލިކުރަން އުނދަގޫ ޓީމެއްގެ ގޮތުގައިކަން ފާހަގަކުރަމުން ކޯޗު ބުނީ، ޓީމުގެ ކާމިޔާބީގެ އަސްލަކީ ވަކިވަކި ކުޅުންތެރިންގެ މޮޅުކަމަށް ވުރެ ބޮޑަށް، އަމިއްލަ އެދުން ދޫކޮށް އެންމެން ގުޅިގެން އެއް ޓީމެއްގެ ގޮތުގައި ކުރާ ބުރަ މަސައްކަތް ކަމަށެވެ.

ޕޯޗުގަލް މެޗުގައި ސްޕެއިންގެ ޒުވާން ތަރި ލަމީން ޔަމާލްގެ ފަރާތުން ފެނުނު މޮޅު ޑިފެންސިވް ކުޅުމަށް ޑެ ލަ ފުއެންޓޭ ވަނީ ވަރަށް ބޮޑަށް ތައުރީފުކޮށްފައެވެ. މީގެ އިތުރުން، ކުރިއަށް އޮތް ތަނުގައި އޭނާގެ ފަރާތުން ހަމަލާ އުފެއްދުމުގައި ތަފާތު މޮޅު ކުޅުމެއް ފެނިގެންދާނެ ކަމާ މެދު އެއްވެސް ޝައްކެއް ނެތް ކަމަށްވެސް ކޯޗު ބުންޏެވެ.

މޮރޮކޯ ބަލިކޮށް މުބާރާތުގެ ސެމީ ފައިނަލުން ޖާގަ ހޯދާފައިވާ ފްރާންސާ ދެކޮޅަށް ކުޅެން ޖެހިދާނެތީ އެކަމާ ގުޅޭގޮތުން ނޫސްވެރިއަކު ކުރި ސުވާލަށް ޖަވާބުދެމުން ކޯޗު ބުނީ، މި ވަގުތު އެހެން އެއްވެސް ކަމަކަށް ވިސްނުން ނެތް ކަމަށެވެ. ފްރާންސުން މޮޅު ކުޅުމެއް ދެއްކި ނަމަވެސް، ސްޕެއިންގެ ވިސްނުން ހުރީ ހަމައެކަނި ބެލްޖިއަމް ބަލިކުރުމަށް ކަމަށް އޭނާ ޔަގީންކަން ދިނެވެ.