ނަޕޮލީގެ އިރުޝާދުދޭން ކޯޗު އެލެގްރީއާ ހަވާލުކޮށްފި

އިޓާލިއަން ސެރިއޭގެ މަޝްހޫރު ކުލަބު ނަޕޮލީއަށް ކާމިޔާބީތަކެއް ހޯދައިދިނުމުގެ އަމާޒުގައި، އެ ޓީމުގެ އިރުޝާދު ދިނުމުގެ އެންމެހާ ޒިންމާތަކާ 2029ވަނަ އަހަރުގެ ޖޫން މަހުގެ ނިޔަލަށް އިޓަލީގެ ކާމިޔާބު ކޯޗު މަސިމިލިއާނޯ އެލެގްރީ ރަސްމީކޮށް ހަވާލުވެއްޖެއެވެ.

އެންޓޯނިއޯ ކޮންޓޭގެ އިރުޝާދުގެ ދަށުން ނިމިދިޔަ ސީޒަނުގައި ލީގުގެ ދެވަނަ ނަޕޮލީން ހޯދާފައިވަނިކޮށް، އޭނާ މަގާމުން ވަކިވުމުން އެ ޖާގަ ފުރުމަށް ގެނައި އުމުރުން 58އަހަރުގެ އެލެގްރީއަކީ އިޓަލީގެ ފުޓުބޯޅައިގައި ފާހަގަކޮށްލެވޭ ފަރާތެކެވެ. ލީގުގެ ޗެމްޕިއަންކަން އިންޓަ މިލާނުން ހޯދި ނަމަވެސް، ކުރިއަށް އޮތް ސީޒަނުގައި ނަޕޮލީގެ ފެންވަރު ރަނގަޅުކުރުމަށް އެލެގްރީގެ ތަޖުރިބާގެ ބޭނުން ހިފާނެއެވެ.

މީގެ ކުރިން ޔުވެންޓަސް އަދި އޭސީ މިލާނުގައި އޭނާ ހޭދަކުރި ދުވަސްތަކުގައި ވަނީ ބޮޑެތި ކާމިޔާބީތަކެއް ހާސިލުކޮށްފައެވެ. އެގޮތުން، އިޓާލިއަން ލީގުގެ ޗެމްޕިއަންކަން ހަ ފަހަރެއްގެ މަތިން ހޯދައިދިނުމުގެ އިތުރުން، ލީގާއި ކަޕް ހިމެނޭހެން ޑޮމެސްޓިކް ޑަބަލް ހަތަރު ފަހަރު އޭނާ ވަނީ ކާމިޔާބުކޮށްފައެވެ.

ނަމަވެސް، އެލެގްރީ އެންމެ ފަހުން އޭސީ މިލާނާއެކު ހޭދަކުރި ދެވަނަ ދައުރު ނިމިގެންދިޔައީ ހިތްދަތި ގޮތަކަށެވެ. އެންމެ ސީޒަނަކަށްފަހު ފާއިތުވި މެއި މަހު އޭނާ މަގާމުން ދުރުކުރީ، ނަތީޖާތައް ދަށްވުމުގެ ސަބަބުން ކުލަބުގެ އެމެރިކާގެ އޯނަރުން ކަމަށްވާ ރެޑްބާޑް ކެޕިޓަލް ޕާޓްނާސްއިން އެއީ ބޮޑު ނާކާމިޔާބީއެއްގެ ގޮތުގައި ސިފަކުރުމަށްފަހުއެވެ.

އެ ސީޒަނުގެ އެންމެ ފަހު މެޗުގައި ކަލިއާރީއާ ވާދަކޮށް އަމިއްލަ ދަނޑުގައި 2-1އިން ބަލިވުމާ އެކު، ޔޫރަޕުގެ މުބާރާތްތަކުގައި ކުރިން ރަސްކަންކުރި އޭސީ މިލާނަށް ލީގު ނިންމާލަން ޖެހުނީ ފަސްވަނައިގައެވެ. މި ނަތީޖާއާ އެކު، ވިދިވިދިގެން ދެވަނަ އަހަރަކަށް ޗެމްޕިއަންސް ލީގުގެ ޖާގައެއް އެ ޓީމަށް ވަނީ ގެއްލިފައެވެ.