ތަށި ކާމިޔާބު ކުރުމުގެ ފުރިހަމަ ގާބިލްކަން މޮރޮކޯގައި އެބަހުރި: އުއަހްބީ

ވޯލްޑް ކަޕްގެ ތަށި އުފުލާލައި ދުނިޔޭގެ ޗެމްޕިއަންކަން ހޯދުމުގެ ހުރިހާ ގާބިލްކަމެއް މޮރޮކޯ ޓީމުގައި އެބަހުރި ކަމަށް އެޓީމުގެ ކޯޗު މުހަންމަދު އުއަހްބީ ބުނެފިއެވެ.

އޭނާ މިހެން ބުނީ ގްރޫޕް ސީގައި ހައިޓީއާ ވާދަކޮށް 4-2ގެ ނަތީޖާއަކުން މޮރޮކޯ މޮޅުވި މެޗަށް ފަހު ނޫސްވެރިންނާ ވާހަކަދައްކަމުންނެވެ. އުއަހްބީ ބުނި ގޮތުގައި މޮރޮކޯ މިހާރު އޮތީ މުޅިން އާ ހިސާބެއްގައެވެ. އެހެންކަމުން މި މުބާރާތް ކާމިޔާބު ކުރެވިދާނެ ކަމަށް އުންމީދު ކުރުމަކީ މިހާރު ކުރެވިދާނެ ކަމެއް ކަމަށް އޭނާ ގަބޫލުކުރެއެވެ.

މޮރޮކޯގެ ކޯޗު އިތުރަށް ފާހަގަކުރި ގޮތުގައި ދުނިޔޭގެ އެއްވަނަ ޓީމަށް ވުމުގެ ހުރިހާ ސިފައެއް އެ ޓީމުގައި އެބަހުއްޓެވެ. ނަމަވެސް މި ލަނޑުދަނޑި ހާސިލްކުރެވޭނީ މުޅި ޓީމު އެކަތިގަނޑެއްގެ ގޮތުގައި ގުޅިގެން މަސައްކަތް ކޮށްގެން ކަމަށް އޭނާ ބުންޏެވެ. އަދި މިކަން ކުރެވިދާނެ ކަމުގެ ފުރިހަމަ އިތުބާރު ޓީމުގެ ހުރިހާ ކުޅުންތެރިންނާއި އޮފިޝަލުންގެ ކިބައިގައި އެބައޮތް ކަމަށްވެސް އުއަހްބީ ހާމަކުރިއެވެ.

ގްރޫޕްގެ އެއްވަނަ ނުލިބުމުން ހިތާމަކުރާކަން ހާމަކުރަމުން ކޯޗު ބުނީ، މިއީ ހައިރާންވާންޖެހޭ ކަމެއް ނޫން ކަމަށާއި އެއީ ހައިޓީއާ ދެކޮޅަށް އެންމެ އެދެވޭ ކުޅުން ނުދެއްކުމުން ކަމަށެވެ. މި މެޗުގެ ކުރިން ބްރެޒިލްއަށް ވުރެ ކުރިއަށް ޖެހިލުމަށް މޮރޮކޯ އުންމީދު ކުރި ނަމަވެސް، މުބާރާތުން ކަޓާފައިވާ ހައިޓީން ވަނީ އެއްވެސް ޕްރެޝަރެއް ނެތި ވަރަށް ހިތްވަރުގަދަ ކުޅުމެއް ދައްކާފައެވެ. އެގޮތުން މެޗުގައި ދެ ފަހަރެއްގެ މަތިން ހައިޓީން ލީޑު ނަގައި މޮރޮކޯ ހާސްކޮށްލި ކަމަށާއި، އެހެންވެ މިއީ ވަރަށް އުނދަގޫ މެޗެއްގެ ގޮތުގައި އުއަހްބީ ސިފަކުރިއެވެ.

ގްރޫޕް ސީގެ ދެވަނަ ޓީމުގެ ގޮތުގައި 32ޓީމުގެ ބުރަށް ދަތުރުކުރި މޮރޮކޯއަށް ދެން ކުރިމަތިލާން ޖެހޭނީ ގްރޫޕް އެފްގެ އެއްވަނަ ހޯދާ ޓީމާއެވެ. އެ ގްރޫޕްގެ އެއްވަނަ ހޯދުމުގެ ފުރުސަތު މިހާރު އޮތީ ޖަޕާން، ނެދަލަންޑްސް އަދި ސްވިޑްން އަށެވެ.

މެޗަށްފަހު ވާހަކަދައްކަމުން ހައިޓީގެ ކޯޗު ސެބަސްޓިއަން މިގްނަރ ބުނީ މެޗުގެ ނަތީޖާއާ މެދު ހިތްހަމަނުޖެހޭ ކަމަށެވެ. އަދި މި މެޗުން މަދުވެގެން ޕޮއިންޓެއް ލިބުނު ނަމަވެސް ހިތްހަމަޖެހުމެއް ލިބުނީސް ކަމަށް އޭނާ ބުންޏެވެ. ނަމަވެސް ހައިޓީގެ ކުޅުންތެރިން އެންމެ ފަހު ވަގުތާ ޖެހެންދެން ދެއްކި ހިތްވަރަށް އޭނާ ތައުރީފުކުރިއެވެ. މިގްނަރ ބުނި ގޮތުގައި މި މެޗުގައި ފެނިގެންދިޔައީ ކުޅުންތެރިން އެންމެ މަތީ ފެންވަރުގައި ގައުމު ތަމްސީލުކުރި ތަނެވެ. މެޗު ނިމުމުން މޮރޮކޯގެ ކުޅުންތެރިން ވަނީ ދަނޑުގައި ތިބި ސަޕޯޓަރުންނަށް ގޮސް ޝުކުރު އަދާކޮށްފައެވެ.