ފީފާ ވޯލްޑް ކަޕްގެ ތާރީހުގައި ކުޅެވޭ ހާއްސަ 1000ވަނަ މެޗުގެ ރެފްރީކަން ކުރުމުގެ ތާރީހީ ޝަރަފު ރޮމޭނިއާގެ ތަޖުރިބާކާރު ރެފްރީ އިސްޓަވާން ކޯވަޗްއަށް ފީފާއިން ހަވާލުކޮށްފިއެވެ.
މިއަންނަ އާދިއްތަ ދުވަހުގެރޭ މެކްސިކޯގެ މޮންޓެރޭ ސްޓޭޑިއަމްގައި ކުޅުމަށް ހަމަޖެހިފައިވާ މި ތާރީހީ މެޗުގައި ބައްދަލުކުރާނީ ގްރޫޕް އެފްގެ ދެ ގައުމު ކަމަށްވާ ޓިއުނީޝިއާއާއި ޖަޕާނެވެ.
މި މެޗުގައި އުމުރުން 40އަހަރުގެ ކޯވަޗްއަށް އެހީތެރިވުމަށް އޭނާގެ ރޮމޭނިއާ ޓީމުގެ ދެ އެސިސްޓަންޓް ރެފްރީން ކަމަށްވާ ފެރެންޒް ޓުންޔޯގީއާއި މިހައި މަރީސާ ހަރަކާތްތެރިވާނެއެވެ. މީގެ އިތުރުން، މެޗުގެ ފޯތު އޮފިޝަލަކަށް ކޮސްޓަރީކާގެ ހުއާން ކަލްޑެރޯން ހަމަޖައްސާފައިވާއިރު، ރިޒާވް ރެފްރީއެއްގެ ގޮތުގައި ހަރަކާތްތެރި ވާނީ ހަމަ އެ ގައުމަށް ނިސްބަތްވާ ކާލޯސް މޯރާއެވެ.
ވޯލްޑް ކަޕްގެ ތާރީހުން ހާއްސަ ޖާގައެއް ހޯދާނެ މި މެޗަށް ތައްޔާރުވުމުގެ ގޮތުން، ކޯވަޗްއަށް ވަނީ ހާއްސަ ޖާޒީއެއް ހަވާލުކޮށްފައެވެ. މިކަމަށްޓަކައި ބޭއްވި ހާއްސަ ރަސްމިއްޔާތެއްގައި އޭނާއަށް މި ޖާޒީ ހަވާލުކޮށްދިނީ ފީފާ ރެފްރީސް ކޮމެޓީގެ ޗެއަރމަން ޕިއެރްލުއިޖީ ކޮލީނާއެވެ. މި މެޗަށް ހާއްސަކޮށް ފިޔާތޮށި ކުލައިގައި ފަރުމާކޮށްފައިވާ ޖާޒީގައި، ރަން ކުލައިގެ ވޯލްޑް ކަޕް ތަށި ހިމެނޭ ބެޖެއްގެ އިތުރުން 1000ވަނަ މެޗު ރަމްޒުކޮށްދޭ ހާއްސަ ބެޖެއް ހަރުކޮށްފައިވެއެވެ.
މި ނިންމުމާ ގުޅޭގޮތުން ވާހަކަދައްކަވަމުން ކޮލީނާ ބުނީ، މި ހާއްސަ މެޗަށް ރެފްރީއަކު ކަނޑައެޅީ ގިނަ މަޝްވަރާތަކެއް ކުރުމަށް ފަހު ކަމަށެވެ. އަދި ކޯވަޗް މީގެ ކުރިން އިންސާފުކޮށްފައިވާ މެޗުތަކަށް ބަލާއިރު، އޭނާއަކީ މިފަދަ މުހިންމު މެޗެއްގައި ރެފްރީކަން ކުރުމުގެ ފުރިހަމަ ގާބިލުކަން ހުރި، އަދި މި ޝަރަފު ހައްގު ރެފްރީއެއް ކަމަށްވެސް ކޮލީނާ ފާހަގަކުރިއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.