ޗައިނާއިން ބަލާނީ ވެސް ސަޕޯޓް ކުރާނީ ވެސް އެ ގައުމުގެ ރެފްރީ "ކާޑް މާސްޓަރ"ގެ މެޗް

ވޯލްޑް ކަޕަށްދާ ގައުމީ ޓީމުތަކަށް އަލްވަދާއު ކިޔުމަކީ އާންމުކޮށް ވަރަށް ކުލަގަދަ ހަފްލާއެކެވެ. ފަރުވާތެރިކަމާ އެކު ހޮވާލެވިފައިވާ ކުޅުންތެރިން ރީތި ސޫޓުތަކުގައި ތިބެ، ކޮންމެ ހަތަރު އަހަރަކުން އެއްފަހަރު ބާއްވާ އެންމެ ބޮޑު އެއް ކުޅިވަރު މުބާރާތުގައި ގައުމު ތަމްސީލުކުރުމަށް ފުރުމުގެ ކުރިން ސަޕޯޓަރުންނަށް އަތްތިލަ ހޫރުވައި ހަދައެވެ.

ނަމަވެސް މިއަހަރު ޗައިނާއަކަށް މި ފުރުސަތެއް ނެތެވެ.

އެ ގައުމު އަނެއްކާ ވެސް މުބާރާތަށް ކޮލިފައިނުވުމުން، ފުޓްބޯޅަ ސަޕޯޓަރުންގެ ސަމާލުކަން މިހާރު ހުއްޓިފައިވަނީ ގައުމު ތަމްސީލުކުރާ އެހެން ފަރާތަކަށެވެ. އެއީ ހަރުކަށި އަދި ދޫނުދޭ ރެފްރީކަމުގެ ސްޓައިލެއްގެ ސަބަބުން "ކާޑް މާސްޓަރ"ގެ ނަމުން މަޝްހޫރުވެފައިވާ ރެފްރީ މާ ނިންގްއެވެ.

އުމުރުން 46 އަހަރުގެ މާ އަކީ އަބަދުވެސް އަމިއްލަ ގައުމުގައި އެންމެން ލޯބިވާ މީހެއް ނޫނެވެ. އަދި ބައެއް ފަހަރު އޭނާގެ ނިންމުންތަކާ މެދު ބޮޑެތި ހިޔާލުތަފާތުވުންތަކެއް އުފެދެއެވެ. އޭނާގެ 10 އަހަރުވީ ކެރިއަރުގައި، އެ ގައުމުގެ އެތެރޭގެ މެޗުތަކުގައި ސަޕޯޓަރުންގެ ފުރައްސާރައާއި އެއްޗެހިގޮވުން އޭނާއަށް ވަނީ ވަރަށް ގިނައިން އަމާޒުވެފައެވެ.

2015ވަނަ އަހަރު ޝަންހާއީ ޑާބީގެ ފޯރިގަދަ މެޗެއްގައި އޭނާ ވަނީ ނުވަ ރީނދޫ ކާޑާއި ތިން ރަތް ކާޑު ދައްކައި، ސޯޝަލް މީޑިއާގައި ބޮޑު ސަމާލުކަމެއް ހޯދައި، އެ ނަން ހޯދާފައެވެ.

ފަހަކަށް އައިސް، ޗައިނާގެ ސޯޝަލް މީޑިއާގައި ވަނީ ކުރިން ހިޔާލުތަފާތުވުންތައް އުފެދުނު މި ތަރިއަށް (މި މުބާރާތުގައި ހުރި ހަމައެކަނި ޗައިނާގެ ރެފްރީ) ގައުމީ ފަޚުރެއްގެ ގޮތުގައި ބަލައިގަނެ، އޭނާއަށް ބޮޑު ތަރުހީބެއް ދޭން ފަށާފައެވެ. އޭނާއާ ގުޅުން ހުރި ހޭޝްޓެގްތަކަށް ސޯޝަލް މީޑިއާ ޕްލެޓްފޯމްތަކުގައި މިލިއަނުން ވިއުސް ލިބެމުންދެއެވެ.

"އެހެން ގައުމުތަކުން ބަލަނީ އެ ގައުމުތަކުގެ ޓީމުތައް މެޗު ކުޅޭތަން، އަހަރެމެން މި ބަލަނީ އަހަރެމެންގެ ރެފްރީ ކާޑު ދައްކާތަން،" ޗައިނާގެ ސޯޝަލް މީޑިއާ ޕްލެޓްފޯމެއް ކަމަށްވާ ރެޑްނޯޓްގެ ޔޫޒަރަކު ލިޔެފައިވެއެވެ.

މާ ވަނީ އޭނާގެ ވޯލްޑް ކަޕް ދަތުރަށް ޗައިނާގެ އެންމެ ބޮޑެތި ބައެއް ބްރޭންޑްތަކުގެ ސްޕޮންސާޝިޕް ވެސް ހޯދާފައެވެ. އޭގެ ތެރޭގައި ޓެކްނޮލޮޖީ ކުންފުނި ލެނޯވޯއާއި އިލެކްޓްރޯނިކްސްގެ ބޮޑު ކުންފުނި ހައިސެންސް ހިމެނެއެވެ.

ނިމިދިޔަ މަހު ރެޑްނޯޓް އެކައުންޓް ހުޅުވި ފަހުން، މާއަށް ވަނީ 210،000އަށް ވުރެ ގިނަ ފޮލޯވަރުން ލިބިފައެވެ. އޭނާގެ ފުރަތަމަ ޕޯސްޓްތަކުގެ ތެރޭގައި، މެކްސިކޯ، ކެނެޑާ އަދި އެމެރިކާގައި ބުރާސްފަތި ދުވަހު ފެށި މި މުބާރާތަށް ފުރުމުގެ ކުރިން އެއާޕޯޓުން ބޭރުގައި ނަގާފައިވާ ފޮޓޯއެއް ހިމެނެއެވެ. އެ ފޮޓޯގެ ކެޕްޝަނުގައި ލިޔެފައިވަނީ "ހިނގާ ދަމާ!" އެވެ.

މަގްބޫލު އެހެން ސޯޝަލް މީޑިއާ ޕްލެޓްފޯމެއް ކަމަށްވާ ވޭބޯގެ ޔޫޒަރަކު މަޖާޒީ ގޮތަކަށް ބުނެފައިވަނީ، "އޭނާގެ ފޮށި ފުރިފައި ހުންނާނީ ރީނދޫ އަދި ރަތް ކާޑުން ކަމަށް ބެލެވެއެވެ."

"ބޯޑިން ކާޑެއް ބޭނުމެއް ނުވާނެ، ހަމައެކަނި ރަތް ކާޑެއް ދައްކާލާ،" ރެޑްނޯޓްގެ އެހެން ޔޫޒަރަކު ލިޔެފައިވެއެވެ.

12 އާއި 16 ގަޑިއިރުގެ ވަގުތުގެ ތަފާތެއް ހުރި ނަމަވެސް، ބައެއް މީހުން ބުނަނީ މާ ރެފްރީކަން ކުރާ މެޗުތައް ބަލަން ކެތްމަދުވެފައި ތިބި ކަމަށެވެ.

"އަހަންނަށް އެނގެނީ ހަމައެކަނި ކްރިސްޓިއާނޯ ރޮނާލްޑޯ، މެސީ، އަދި އެމްބާޕޭ ފަދަ މަޝްހޫރު ކުޅުންތެރިން،" ފުޓްބޯޅައަށް ފޮލޯ ނުކުރާ ކަމަށް އެއްބަސްވަމުން ޑެބީ ވޭންގް ސީއެންއެން އަށް ބުންޏެވެ. ނަމަވެސް އޭނާ ބުނީ މާގެ މެޗުތައް ބަލާނެ ކަމަށެވެ. "މާ ނިންގް ކިތައް ކާޑު ދައްކާނެތޯ ބަލަން އަހަރެން ވަރަށް ޝައުގުވެރިވޭ."

"(މާ) އަކީ ވޯލްޑް ކަޕަށްދާ އަހަރެމެންގެ ހަމައެކަނި މީހާ، އަހަރެމެން އޭނާއަށް ސަޕޯޓްކުރާނެ ކަމަށް ހީވަނީ،" ބެއިޖިންގެ ފުޓްބޯޅަ ސަޕޯޓަރެއް ކަމަށްވާ ޓެޑް ކުއީ ވެސް ސީއެންއެން އަށް ބުންޏެވެ.

މާ ރެފްރީކަން ކުރި ގިނަ މެޗުތަކެއް ބަލާފައިވާ ކުއީ ބުނީ، ހިޔާލުތަފާތުވުންތައް ހުރި ނަމަވެސް އޭނާއަކީ ޝައްކެއް ވެސް  ނެތްގޮތުގައި "ޗައިނާގެ އަދި މުޅި އޭޝިއާގެ ވެސް އެންމެ މޮޅު އެއް ރެފްރީ" ކަމަށެވެ.

ޗައިނާގެ އެންމެ މަތީ ފަންތީގެ ޕްރޮފެޝަނަލް ފުޓްބޯޅަ ލީގު ކަމަށްވާ ޗައިނީޒް ސުޕަރ ލީގުގައި ރެފްރީކަން ކުރުމުގެ އިތުރުން، އޭޝިއަން ފުޓްބޯލް ކޮންފެޑަރޭޝަން (އޭއެފްސީ) ޗެމްޕިއަންސް ލީގު ހިމެނޭ ގޮތަށް ބައިނަލްއަގުވާމީ މެޗުތަކުގައި ވެސް މާ ގަވާއިދުން ރެފްރީކަން ކުރެއެވެ.

މާ އަކީ 2011ވަނަ އަހަރުން ފެށިގެން ފީފާގެ ސާޓިފައިޑް ރެފްރީއެކެވެ. އަދި އޭނާ ވަނީ މީގެ ހަތަރު އަހަރު ކުރިން ގަތަރުގައި ބޭއްވި ވޯލްޑް ކަޕްގައި ފުރަތަމަ ފަހަރަށް ބައިވެރިވެ، ބައެއް މެޗުތަކުގައި ހަތަރުވަނަ އޮފިޝަލެއްގެ ގޮތުގައި މަސައްކަތް ކޮށްފައެވެ.

"ވޯލްޑް ކަޕްގެ ތެރޭގައި، ދުނިޔޭގެ އެންމެ މޮޅު ރެފްރީންގެ ކިބައިން އަހަރެމެން ވަރަށް ބޮޑަށް ދަސްކުރާނަން. އަދި ޗައިނާގެ ރެފްރީން ތަމްރީނުކޮށް ތަރައްގީކުރުމަށް އެހީތެރިވުމަށް ޓަކައި އަގުހުރި ތަޖުރިބާތަކެއް ހިފައިގެން އެނބުރި އަންނާނަން،" އެމެރިކާ ބައްރަށް ފުރުމުގެ ކުރިން ޗައިނާގެ ދައުލަތުގެ މީޑިއާއަށް މާ ބުންޏެވެ.