މޮރޮކޯއިން މެޗް ފެށި 10 ކުޅުންތެރިންނަކީ އެހެން ގައުމުތަކަށް އުފަން ކުޅުންތެރިން

ވޯލްޑްކަޕްގައި ރޭ ބްރެޒިލްއާ ދެކޮޅަށް ކުޅުނު މެޗްގައި މޮރޮކޯއިން ނެރުނު ފުރަތަމަ 11ގައި އެހެން ގައުމުތަކަށް އުފަން 10ކުޅުންތެރިން ތިބުމުން އެކަމަށް ސަމާލުކަން ލިބިއްޖެއެވެ.

އާދީއްތަ ދުވަހުގެ ފަތިހު ކުޅުނު ފޯރިގަދަ މޮރޮކޯއާއި ބްރެޒިލްގެ ކުރިމަތިލުން ބެލުމަށް ހޭލާ ތިބި މީހުންނަށް، 1-1އިން މެޗު އެއްވަރުވުމުން މާ ބޮޑު ހައިރާންކަމެއް ނުލިބިދާނެއެވެ. އެއީ މޮރޮކޯ ރޭންކިންގްގެ 7ވަނައިގައި އޮތްއިރު، ބްރެޒިލް 6ވަނައިގައި އޮތުމުންނެވެ.

ގަތަރުގައި 2022ވަނަ އަހަރު ބޭއްވި ވޯލްޑް ކަޕްގައި ރެކޯޑް ކާމިޔާބީއަކާ އެކު ސެމީ ފައިނަލަށް ދަތުރުކުރި މޮރޮކޯއިން، މުހައްމަދު އުއާބީގެ އިރުޝާދުގެ ދަށުން ކާލޯ އަންޗެލޮއްޓީގެ ޓީމާ ދެކޮޅަށް ނުކުމެ އަނެއްކާ ވެސް ތާރީޚީ ކާމިޔާބީއެއް ހޯދީ، ގައުމުން ބޭރުގައި އުފަންވި ކުޅުންތެރިންގެ މައްޗަށް އެކުލެވޭ 10ކުޅުންތެރިން ދަނޑަށް ނެރެގެންނެވެ.

މި ފުރަތަމަ 11އިން ދައްކުވައިދިނީ މޮރޮކޯގެ ފުޓްބޯޅަ ހުނަރުވެރިން މުޅި ދުނިޔެއަށް ފެތުރިފައިވާ މިންވަރެވެ. ގޯލްކީޕަރު ޔާސީން ބޫނޫ އުފަންވީ ކެނެޑާގެ މޮންޓްރިއަލްއަށެވެ. އަދި ޑިފެންޑަރުން ކަމަށްވާ އަޝްރަފް ހަކީމީއާއި ޝާދީ ރިއާދު އުފަންވީ ސްޕެއިންގެ މެޑްރިޑް އަދި ޕަލްމާއަށެވެ. ސެންޓަރ ބެކް އީސާ ދިއޮޕް އުފަންވީ ފްރާންސްގެ ޓުލޫޒްއަށެވެ. އަދި ފުލްބެކް ނުސައިރު މަޒްރައުއީ އުފަންވީ ނެދަލޭންޑްސްގެ ލެއިޑަރޑޯޕް އަށެވެ.

މޮރޮކޯގެ މިޑްފީލްޑުން ވެސް އެ ގައުމުން ބޭރުގައި ދިރިއުޅޭ އާބާދީގެ ފުންމިން ހާމަވެގެންދިޔައެވެ. ފްރާންސްގެ ސެންލިސްއަށް އުފަން އައްޔޫބް ބުއައްދީއާ އެކު މިޑްފީލްޑް ބެލެހެއްޓީ ނޭންސީއަށް އުފަން ނީލް އެލް އައިނާއުއީ އެވެ. އަދި ބިލާލް އެލް ޚައްނޫސް އުފަންވީ ބެލްޖިއަމްގެ މޮލެންބީކްއަށެވެ. ސްޓްރައިކަރު އިސްމާއިލް ސައިބާރީއާއި ކަނާތްފާތު ވިންގަށް ކުޅޭ ބްރަހީމް ޑިއާޒް އުފަންވީ ސްޕެއިންގެ ޓެރާސާ އަދި މަލާގާއަށެވެ.

ފުރަތަމަ 11އިން އަމިއްލަ ގައުމަށް އުފަންވި ހަމައެކަނި ކުޅުންތެރިއަކީ ކަސަބްލާންކާއަށް އުފަން ވާތްފާތު ވިންގް އަޒައްދީން އޫނާހީއެވެ. މި ހޫނު މޫސުމުގެ ވޯލްޑް ކަޕަށް ހޮވި މޮރޮކޯގެ 26ކުޅުންތެރިންގެ ސްކޮޑުގައި ވެސް، އަމިއްލަ ގައުމަށް ކުޅުންތެރިންގެ އަދަދަކީ 7އެކެވެ.

މި ސްކޮޑުގެ ގިނަ ކުޅުންތެރިންނަކީ ފްރާންސް، ސްޕެއިން، ބެލްޖިއަމް އަދި ނެދަލޭންޑްސްގެ އެކަޑެމީތަކުން ތަމްރީނުވެ، އެމީހުންގެ ކާބަފައިންގެ ގައުމު ތަމްސީލުކުރުމަށް ނިންމި ކުޅުންތެރިންނެވެ.

މެޗަށް ފަހު ވާހަކަދައްކަމުން އުއާބީ ވަނީ މޮރޮކޯ ފުޓްބޯޅައިގެ މުސްތަގުބަލާ މެދު އުންމީދު އެބައޮތް ކަމަށް ބުނެފައެވެ. ނަމަވެސް އޭނާގެ ޓީމަށް މިއަށް ވުރެ ރަނގަޅަށް ކުޅެވޭނެ ކަމަށް ބުންޏެވެ. "އަހަރެމެން މިވަރުން ފުއްދައެއް ނުލާނަން. މިއީ ނިމުމެއް ނޫން ކަމަށް އަހަރެން ވައުދުވަން،" ނޫސްވެރިންގެ ބައްދަލުވުމުގައި ބެލްޖިއަމް-މޮރޮކޯ ކޯޗު ބުންޏެވެ.