ބްރެޒިލްގެ ކުޅުންތެރިން ތިބީ ވަރަށް ހާސްވެފައި: އަންޗެލޮޓީ

މި އަހަރުގެ ފީފާ ވޯލްޑް ކަޕްގެ ގްރޫޕް ސީގައި ބްރެޒިލާއި މޮރޮކޯ ބައްދަލުކުރި ފޯރިގަދަ މެޗު 1-1އިން އެއްވަރުވެގެން ނިމުނުއިރު، ބްރެޒިލްގެ ކުޅުންތެރިން ތިބީ ހިތްއަވަސްވެ ބިރުގެން އަދި ހާސްވެފައި ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.

އެމެރިކާގެ ނިއު ޖާޒީގެ އީސްޓް ރަދަފޯޑްގައި ހުންނަ ސްޓޭޑިއަމްގައި ކުޅުނު މި މެޗަށްފަހު ވާހަކަދައްކަމުން އަންޗެލޮޓީ ވަނީ ފުރަތަމަ ހާފުގައި ޓީމުގެ ބެލެންސް ގެއްލި، ކުޅުންތެރިން ވަރަށް "ނާވަސް" ކޮށް ފެނުނުކަން ފާހަގަކޮށްފައެވެ.

މި މެޗުގައި ފުރަތަމަ ލަނޑު ޖަހައި ކުރިހޯދީ ވޯލްޑް ކަޕްގެ ގަދަ ބާރެއްގެ ގޮތުގައި ބެލެވޭ ބްރެޒިލްގެ މައްޗަށް މޮރޮކޯއިންނެވެ. މެޗުގެ 21ވަނަ މިނެޓުގައި ބްރެޒިލްގެ މިޑްފީލްޑަރު ލޫކަސް ޕަކޭޓާ އަތުން ބޯޅަ ގެއްލުމުގެ ފައިދާ ނަގައި، އިސްމާއީލް ސައިބާރީ ވަނީ ބްރެޒިލްގެ ގޯލްކީޕަރު އެލިސަންގެ ބޯމަތިން ބޯޅަ ފޮނުވާލައިގެން މޮރޮކޯއަށް ލީޑު ހޯދައިދީފައެވެ. ނަމަވެސް އޭގެ 11މިނެޓު ފަހުން، މެޗުގެ 32ވަނަ މިނެޓުގައި ބްރެޒިލްގެ ތަރި ވިނީޝިއަސް ޖޫނިއާ ވަނީ ހިތްގައިމު ލަނޑެއް ޖަހައި ނަތީޖާ އެއްވަރުކޮށްދީފައެވެ.

މެޗުގެ ފެށުމާ ބެހޭ ގޮތުން ވާހަކަދައްކަމުން އަންޗެލޮޓީ ބުނީ ޓީމުން މެޗު ފެށީ އެންމެ ރަނގަޅަށް ނޫން ކަމަށެވެ.

"އަހަރެމެން މެޗު ފެށީ ރަނގަޅަކަށް ނޫން. ޓީމު އޮތީ ތަންކޮޅެއް ނާރވަސްވެފައި. މާ ގިނައިން ބޯޅަ ގެއްލި، ޗެލެންޖުތަކެއް ކުރިމަތިވެ ނާކާމިޔާބުވި" އަންޗެލޮޓީ ބުންޏެވެ.

އޭނާ އިތުރަށް ބުނީ ދެވަނަ ހާފުގައި ކުޅުން ރަނގަޅުވި ނަމަވެސް، މޮރޮކޯ ފަދަ ވަރުގަދަ ޓީމަކާ ދެކޮޅަށް ކުޅުމަކީ އަބަދުވެސް އުނދަގޫ ކަމެއް ކަމަށެވެ.

އެންމެ ފަހުން 2022ވަނަ އަހަރު ބޭއްވި ވޯލްޑް ކަޕްގެ ސެމީ ފައިނަލާ ހަމައަށް ދަތުރުކުރި މޮރޮކޯއިން މި މެޗުގައި ވެސް މޮޅު ކުޅުމެއް ދެއްކިއިރު، އެ ޓީމުގެ ކޯޗު މުހައްމަދު އުއާބީ ބުނީ އޭނާގެ އަމާޒަކީ މިފަހަރު ސެމީ ފައިނަލަށް ވުރެ ދުރަށް ދިއުން ކަމަށެވެ. މެޗުން ލިބުނު އެއް ޕޮއިންޓާ މެދު އޭނާ ބުނީ މިއަށް ވުރެ ރަނގަޅު ނަތީޖާއަކަށް އުއްމީދު ކުރި ނަމަވެސް، އެއް ޕޮއިންޓަކީ ވެސް ގޯސް ނަތީޖާއެއް ނޫން ކަމަށެވެ.

މި ނަތީޖާއާ އެކު ގްރޫޕް ސީގެ ފޯރި ގަދަވެފައިވާއިރު، މި ގްރޫޕްގައި ދެން ހިމެނެނީ ސްކޮޓްލޭންޑާއި ހެއިޓީއެވެ. ކުރިއަށް އޮތް މެޗުގައި ބްރެޒިލް ނުކުންނާނީ ހެއިޓީއާ ދެކޮޅަށެވެ. އަދި މޮރޮކޯ ބައްދަލުކުރާނީ ސްކޮޓްލޭންޑާއެވެ.