ބަރޮސް މޯލްޑިވްސް ކަޓުވާލުމަށްފަހު ސަން ސިޔާމް އޮޅުވެލިން ރިސޯޓު ސުޕަ ލީގުގެ ފައިނަލާ ގާތަށް ޖެހިލައިފި

ރާއްޖޭގެ ރިސޯޓުތަކަށް އަމާޒުކޮށްގެން ބާއްވާ އެންމެ ޝަރަފުވެރި ފުޓްސަލް މުބާރާތް ކަމަށްވާ "ރިސޯޓު ސުޕަ ލީގު 2026"ގައި ކުޅުނު ފުރަތަމަ ކުރިމަތިލުމުގެ ދެ ލެގުން ބަރޮސް މޯލްޑިވްސް ބަލިކޮށް، ސަން ސިޔާމް އޮޅުވެލިން މުބާރާތުގެ ފައިނަލުގެ ޖާގައަކާ ގާތަށް ޖެހިލައިފިއެވެ.

މާލެ އަތޮޅުގެ ދެ ޒޯނުގެ ޗެމްޕިއަނުންގެ މެދުގައި ހޯމް އެންޑް އަވޭ އުސޫލުން ކުޅުނު މި މެޗުތަކުގެ އެގްރިގޭޓް ނަތީޖާއިން ސައުތު މާލޭ ޒޯނުގެ ޗެމްޕިއަން އޮޅުވެލި ކުރިހޯދީ 7-2އިންނެވެ. އަމިއްލަ ރަށުގައި ކުޅުނު ފުރަތަމަ ލެގު 2-1ގެ ނަތީޖާއަކުން އޮޅުވެލި ކާމިޔާބުކުރިއިރު، ކުރުނބާ މޯލްޑިވްސްގައި ކުޅުނު ދެވަނަ ލެގު އެ ޓީމުން ކާމިޔާބުކުރީ 5-1ގެ ތަފާތު ބޮޑު ނަތީޖާއަކުން ނޯތު މާލޭ ޒޯނުގެ ޗެމްޕިއަން ބަރޮސް މައްޗަށް ކުރި ހޯދައިގެންނެވެ.

މި މުބާރާތް ކުރިއަށްދާ ގޮތަށް ބަލާއިރު، ހަ ޒޯނެއްގެ ޗެމްޕިއަނުން ވާދަކުރާ ސުޕަ ލީގުގެ ތިން ކުރިމަތިލުމުގެ ތެރެއިން އެންމެ ގިނަ ގޯލު ޖަހައިގެން ފައިދާ ގޯލުގެ ތަފާތުން އެންމެ ކުރީގައި އޮންނަ ޓީމަކަށް ފައިނަލުގެ ސީދާ ޖާގައެއް ކަށަވަރުވާނެއެވެ. އަދި އަނެއް ދެ ކުރިމަތިލުމުން މޮޅުވާ ޓީމުތައް ޖެހޭނީ، ފައިނަލުގެ ފަހު ޖާގަ ހޯދުމަށްޓަކައި ސެމީ ފައިނަލުގައި ވާދަކުރާށެވެ.

ސުޕަ ލީގުގައި ދެން އޮންނާނީ ބާ ޒޯނުގެ ޗެމްޕިއަން ފިނޮޅު މޯލްޑިވްސްއާއި ނޫނު ޒޯނުގެ ޗެމްޕިއަން ވެލާ ޕްރައިވެޓް އައިލެންޑް ބައްދަލުކުރާ މެޗުތަކެވެ. މި މަހުގެ 17ވަނަ ދުވަހު ވެލާގައި ފުރަތަމަ ލެގު ކުޅޭއިރު، ދެވަނަ ލެގު އޮންނާނީ 19ވަނަ ދުވަހު އަވާނީ ފަރެސްގައެވެ. މީގެ އިތުރުން، އަރި ޒޯނުގެ ޗެމްޕިއަން ކޮންރެޑް މޯލްޑިވްސްއާއި ދާލު ޒޯނުގެ ޗެމްޕިއަން ސެއިންޓް ރީޖަސް ވޮއްމުލި ބައްދަލުކުރާ ފުރަތަމަ މެޗު މި މަހުގެ 21ގައި ކޮންރެޑުގައި ކުޅުމަށްފަހު، 23ވަނަ ދުވަހު އަންގްސާނާ ވެލާވަރުގައި ވޮއްމުލީގެ ހޯމް މެޗު ކުޅުމަށް ވަނީ ތާވަލުކުރެވިފައެވެ.