ލެގޫންސް ސްޕޯޓްސް ކުލަބަށް 17އަހަރު ފުރުމުގެ މުނާސަބަތުގައި، އެ ކުލަބުގެ ކުރިމަގުގެ އަމާޒުތަކާއި ކާމިޔާބީތައް ފާހަގަކުރުމަށް ޓަކައި ލެގޫންސް ދަނޑުގައި ޚާއްޞަ އަދި ކުލަގަދަ ރަސްމިއްޔާތެއް ބާއްވައިފިއެވެ.
މި ރަސްމިއްޔާތުގައި ވަނީ ކުލަބުގެ ތާރީޚުގައި އެކި ގޮތްގޮތުން އެހީތެރިވެދެއްވި ފަރާތްތަކުގެ އަގުވަޒަންކޮށް ހަނދާނީ ފިލާ އަރުވާފައެވެ. މީގެ އިތުރުން، ހާޒިރުވި މެންބަރުންގެ ތެރެއިން ގުރުއަތުން ހޮވުނު ފަސް ފަރާތަކަށް ނަގުދު ފައިސާގެ އިނާމު ދީފައިވެއެވެ. ހަމައެހެންމެ، ކުލަބުގެ ސަޕޯޓަރުން ވަނީ ކޮރަޕްޝަނާއި ރިޝްވަތު ފަދަ ނޭދެވޭ އަމަލުތަކުގެ ތެރެއިން ކުލަބަށް ގެއްލުންދިނުމަށް އެއްވެސް ފަރާތަކަށް ޖާގަ ނުދޭނެކަމުގެ ވަރުގަދަ އިންޒާރެއް ދީފައެވެ.
ރަސްމިއްޔާތުގައި ވާހަކަދެއްކެވި އިސް ބޭފުޅުން ވަނީ ލެގޫންސްއިން ހޯދަމުން އަންނަ ތަރައްގީއަކީ ދަނޑު ސަރަހައްދުން ވެސް ފެންނަން އޮތް ހަގީގަތެއްކަން ފާހަގަކުރައްވާފައެވެ. އަދި އެ ކުލަބަކީ އެއް އާއިލާއެއް ފަދައިން ގުޅިގެން، ހިތްވަރާއި ކެރޭކަމާ އެކު މަސައްކަތްކުރާ ނަމޫނާ ބަޔެއްކަމަށް ވިދާޅުވެ، ބޯޑުގެ ހިންގުންތެރިކަމަށް ޝުކުރު އަދާކުރެއްވިއެވެ. ސަޕޯޓަރުންގެ އެންމެ ބޮޑު ހުވަފެނަކީ ރާއްޖޭގެ އެންމެ މަތީ ފަންތީގެ ފުޓުބޯޅަ މުބާރާތް، ފުރަތަމަ ޑިވިޝަނުން ލެގޫންސް ފެނިގެންދިއުން ކަމުގައި ވެސް އެ ބޭފުޅުން ވިދާޅުވިއެވެ.
އުފާވެރި މާހައުލެއްގައި ކުރިއަށްދިޔަ މި ހަރަކާތް ނިންމާލާފައި ވަނީ ބައިވެރިންނަށް ދެވުނު ޚާއްޞަ ފަރިއްކޮޅަކާއި، މަޝްހޫރު 'ހޭވައްލާ' ބޮޑުބެރު ގުރޫޕުގެ ހިތްގައިމު ހުށަހެޅުންތަކަކުންނެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.