އިނާކީ ވިލިއަމްސް ގައުމީ ޓީމަށް ކުޅުން ނިންމާލައިފި

ގާނާގެ ޤައުމީ ފުޓްބޯޅަ ޓީމަށް ކުޅެމުން އައި އެތުލެޓިކް ބިލްބާއޯގެ ކެޕްޓަން އުމުރުން 32އަހަރުގެ އިނާކީ ވިލިއަމްސް، ބައިނަލްއަގުވާމީ މައިދާނާ ވަކިވިކަން މިއަދު ސޯޝަލް މީޑިއާ މެދުވެރިކޮށް ރަސްމީކޮށް ހާމަކޮށްފިއެވެ.

އޭނާ އެންމެ ފަހުން ގައުމީ ޖާޒީގައި ފެނިގެންދިޔައީ، ދާދި ފަހުން ނިމިގެންދިޔަ ފީފާ ވޯލްޑް ކަޕްގެ ދެވަނަ ބުރުގައި ކޮލަމްބިއާ އަތުން 1-0އިން ބަލިވެ ގާނާ މުބާރާތުން އަލްވަދާއު ކިޔަން ޖެހުނު މެޗުގައެވެ. ނަމަވެސް އޭނާ ވަނީ، 2010ވަނަ އަހަރަށްފަހު ފުރަތަމަ ފަހަރަށް ގާނާ ވޯލްޑް ކަޕްގެ ނޮކްއައުޓް މަރުހަލާއަށް ގެންގޮސްދިނުމުގައި ވަރަށް މުހިންމު ހިއްސާއެއް ވެދީފައެވެ.

ގާނާއަށް ނިސްބަތްވާ މައިންބަފައިންނަށް ސްޕެއިންގެ ބިލްބާއޯގައި އުފަންވި ވިލިއަމްސް، ގާނާ ތަމްސީލުކުރަން ފެށީ 2022ވަނަ އަހަރުގެ ތެރޭގައެވެ. އޭގެ ހަ އަހަރު ކުރިން ސްޕެއިންގެ ގައުމީ ޓީމާއެކު އެކުވެރިކަމުގެ މެޗެއްގައި ބައިވެރިވެފައިވާ ހުނަރުވެރި ކުޅުންތެރިޔާ ވަނީ ގާނާގެ ގައުމީ ޓީމަށް ޖުމްލަ 28މެޗު ކުޅެދީ، އެ ޓީމަށް ދެ ލަނޑު ކާމިޔާބުކޮށްދީފައެވެ.

ރިޓަޔާކުރުމާ ގުޅޭގޮތުން ޝުއޫރު ފާޅުކުރަމުން ވިލިއަމްސް ބުނީ، ގާނާގެ ގައުމީ ދިދަ މޭމަތީގައި ޖަހައިގެން ކުޅުމަކީ އޭނާގެ އަމިއްލަ ވަޒަނާ ގާތްވުމަށް މަގުފަހިވި ވަރަށް ފަޚުރުވެރި ތަޖުރިބާއެއް ކަމަށެވެ. އަދި ފުޓްބޯޅައިގެ ބޭރުން ވެސް އެ ގައުމުން އޭނާއަށް ގިނަގުނަ ކަންތައްތަކެއް ފަހިކޮށްދީފައިވާކަން ފާހަގަކުރަމުން، ގާނާއަކީ އޭނާގެ ހަޔާތުގެ ވަރަށް ހާއްސަ ބައެއްގެ ގޮތުގައި އަބަދުވެސް ދެމިއޮންނާނެ ކަމަށް އޭނާ ބުންޏެވެ.

އިނާކީ ވިލިއަމްސް ބައިނަލްއަގުވާމީ ފުޓްބޯޅައާ ދުރަށް ދިޔައިރު، އޭނާގެ ކޮއްކޮ ނިކޯ ވިލިއަމްސްއަކީ މި ފަހަރުގެ ވޯލްޑް ކަޕްގެ ތަށި އުފުލާލި ސްޕެއިންގެ ގައުމީ ޓީމުގައި ހިމެނޭ މުހިންމު ތަރިއެކެވެ.