ކޯޓުއާއަށް މޮޅު ކުޅުންތެރިޔާ ނުދިނުމުން މޮރީނިއޯގެ ފާޑުކިޔުން

ޔޫއެފާ ޗެމްޕިއަންސް ލީގުގައި ރެއާލް މެޑްރިޑުން 2-1ގެ ނަތީޖާއަކުން އިންޓަ މިލާން ބަލިކުރި މެޗުގެ އެންމެ މޮޅު ކުޅުންތެރިޔާގެ މަގާމު ހައްގުވަނީ އެ ޓީމުގެ ގޯލްކީޕަރު ޓިބޯ ކޯޓުއާއަށް ކަމަށް ރެއާލްގެ ކޯޗު ހޯޒޭ މޮރީނިއޯ ބުނެފިއެވެ.

މި މެޗުގެ މޮޅު ކުޅުންތެރިޔާގެ އެވޯޑް ޔޫއެފާއިން ދީފައި ވަނީ ރެއާލަށް ދެވަނަ ލަނޑު ކާމިޔާބުކޮށްދިން އެ ޓީމުގެ ކެޕްޓަން ފެޑެރީކޯ ވަލްވާޑޭއަށެވެ. ނަމަވެސް މޮރީނިއޯ ހުރީ މި ނިންމުމާ މެދު ވަރަށް ބޮޑަށް ހިތްހަމަނުޖެހިފައެވެ.

މެޗަށް ފަހު ވާހަކަދައްކަމުން މޮރީނިއޯ ވަނީ ހިނިގަނޑެއް ޖަހާލުމަށް ފަހު، އެވޯޑް ހޮވި ފަރާތަށް ވަރަށް ބޮޑަށް ފާޑުކިޔާފައެވެ.

"މިއަދުގެ މެޗުގެ އެންމެ މޮޅު ކުޅުންތެރިޔާ ހޮވި މީހާ އޮތީ ނިދާފައި ކަންނޭނގެ. މިއަދު ކޯޓުއާއަށް އެންމެ މޮޅު ކުޅުންތެރިޔާގެ މަގާމު ނުދީފިނަމަ، ދެން ދުވަހަކު ވެސް އޭނާއަކަށް އެ މަގާމެއް ނުލިބޭނެ"މޮރީނިއޯ ބުންޏެވެ.

މީގެ އިތުރުން، މިއީ ވަރަށް ބޮޑަށް އޮޅުންބޮޅުން ބޮޑުވެގެންދިޔަ މެޗެއްގެ ގޮތުގައި މޮރީނިއޯ ސިފަކުރިއެވެ. އޭނާ ހާމަކުރި ގޮތުގައި ރެއާލް މެޑްރިޑަށް ފަސް ލަނޑު ނުވަތަ ހަ ލަނޑުގެ ތަފާތުން މޮޅުވުމުގެ ފުރުސަތު އޮތް ނަމަވެސް، މެޗުގެ ފަހުކޮޅު އިންޓަ މިލާނުން ކުޅުން ރަނގަޅުކޮށް 5-5 ގެ ނަތީޖާއަކުން މެޗު އެއްވަރުކުރުމުގެ ފުރުސަތު ވެސް އޮތެވެ.

މި މެޗަށް ރެއާލް މެޑްރިޑުން ކުރިމަތިލީ ސަސްޕެންޝަނުގެ ސަބަބުން އެ ޓީމުގެ މުހިންމު ދެ ކުޅުންތެރިން ކަމަށްވާ އަރުދާ ގުލ އާއި ބެނާޑޯ ސިލްވާ ނުލައެވެ. މީގެ ތެރެއިން ބެނާޑޯގެ ބަދަލުގައި މެދުތެރެއަށް ކުޅުވީ ޑިފެންޑަރު ޓްރެންޓް އެލްގްޒެންޑާ އާނޯލްޑެވެ. އާނޯލްޑް ދެއްކި ކުޅުމަށް ތައުރީފުކުރަމުން މޮރީނިއޯ ބުނީ، ފުލްބެކަކަށް ކުޅުމާއި މެދުތެރެއަށް ކުޅުމުގައި ބޭނުންވާ ފިޒިކަލް ފިޓްނަސް ތަފާތުވާނެ ކަމަށާއި، އާނޯލްޑް ދަނޑުން ފޭބިއިރު ހުރީ މުޅިން ވަރުބަލިވެފައި ކަމަށެވެ.

މި މެޗުގައި ރެއާލަށް ފުރަތަމަ ލީޑު ހޯދައިދިނީ ކިލިޔަން އެމްބާޕޭއެވެ. ނަމަވެސް ދެވަނަ ހާފުގައި ކާލޯސް އަގްސްޓޯ ވަނީ ލަނޑެއް ޖަހައި އިންޓައަށް އުންމީދެއް ހޯދައިދީފައެވެ. މެޗުގެ ފަހުކޮޅު އެމްބާޕޭ ބަދަލުކުރަން އުޅުމުން އޭނާ ދަނޑުން ފޭބި ވަގުތު ރެއާލްގެ ސަޕޯޓަރުން ވަނީ އޭނާއަށް މަލާމާތްކޮށް ތުނބުން ފުމެ އަޑުގަދަކޮށްފައެވެ. މިކަމާ ގުޅޭގޮތުން ކުރިމަތިވި ސުވާލުތަކަށް ޖަވާބުދެމުން މޮރީނިއޯ ބުނީ، ސަޕޯޓަރުންނާ ބެހޭގޮތުން އެއްވެސް ނެގެޓިވް ވާހަކައެއް ދައްކަން ބޭނުންނުވާ ކަމަށެވެ.