ވަޔެކާނޯ ބަލިކޮށް އެއްވަނައަށް ބާސެލޯނާ ޖެހިލައިފި

ސްޕެނިޝް ލީގުގައި ކޭމްޕް ނޯގައި ރޭ ކުޅުނު މެޗުގައި ރަފީނިއާ އާއި ލަމީން ޔަމާލް ދެއްކި މޮޅު ކުޅުމާ އެކު، ފަހަތުން އަރައި 5-2އިން ރަޔޯ ވަޔެކާނޯ ބަލިކޮށް ތާވަލުގެ އެންމެ ކުރިއަށް ބާސެލޯނާ ޖެހިލައިފިއެވެ.

މި މޮޅާއެކު ބާސެލޯނާއިން ވަނީ ކުޅުނު ތިން މެޗުން ވެސް މޮޅުވެ، ސައްތައިން ސައްތަ ރެކޯޑެއް ދަމަހައްޓާފައެވެ. އަމިއްލަ ދަނޑުގައި ކުޅުނު މި މެޗުގެ ކުރީކޮޅު، 12ވަނަ މިނެޓުގައި ސާޖިއޯ ކަމެއްޔޯގެ ގޯލުން ވަޔެކާނޯއިން ލީޑު ނެގި ނަމަވެސް، އޭގެ ހަތް މިނެޓު ފަހުން ރަފީނިއާ ވަނީ ބާސެލޯނާއަށް ނަތީޖާ ހަމަހަމަކޮށްދީފައެވެ. އަދި އޭގެ ކުޑަ އިރުކޮޅެއް ފަހުން، 21ވަނަ މިނެޓުގައި ޒުވާން ތަރި ޔަމާލް ކާމިޔާބުކުރި ހިތްގައިމު ލަނޑުން ބާސެލޯނާއިން މެޗުގެ ކޮންޓްރޯލް ހޯދިއެވެ.

ދެވަނަ ހާފުގެ ކުޅުން ފެށިގެން ހަވަނަ މިނެޓުގައި ބާސެލޯނާއަށް އިތުރު ފަސޭހައެއް ލިބުނީ، އެންތަނީ ގޯޑަން ނަގައިދިން ހުރަހެއް ދިފާއުކުރަން އުޅުމުގެ ތެރޭގައި ވަޔެކާނޯގެ ފްލޯރިއަން ލެޖޫންގެ އަތުން ބައިކޮޅަށް ވަން ގޯލުންނެވެ. އެހެންނަމަވެސް، 59ވަނަ މިނެޓުގައި ލިބުނު ކޯނަރެއްގެ ބޭނުން ހިފައިގެން ކަމެއްޔޯ ވަނީ އިތުރު ލަނޑެއް ޖަހައި، ވަޔެކާނޯއަށް އުންމީދު އާކޮށްދީފައެވެ.

މެޗުގެ ފަހުކޮޅުގައި ބާސެލޯނާއިން ވަނީ އެ ޓީމުގެ އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން 71ވަނަ މިނެޓުގައި ގޯޑަން ތަނަވަސްކޮށްދިން ފުރުސަތަކުން ރަފީނިއާ ވަނީ މި ސީޒަނުގައި އޭނާގެ ފަސްވަނަ ގޯލު ޖަހާފައެވެ. އަދި މެޗުގެ ފުރިހަމަ ވަގުތު ހަމަވާން ގާތްވެފައި ވަނިކޮށް، 90ވަނަ މިނެޓުގައި ޔަމާލް ޖެހި ލަނޑާ އެކު ބާސެލޯނާއިން ތަފާތު ބޮޑު މޮޅެއް ކަށަވަރުކުރިއެވެ.

ލީގު ތާވަލަށް ބަލާއިރު، ބާސެލޯނާ މިހާރު އެއްވަނައިގައި އޮތީ ކުޅުނު 3މެޗުން ލިބުނު 9ޕޮއިންޓާއެކު، ފައިދާ ގޯލުގެ ތަފާތުން ވާދަވެރި ރެއާލް މެޑްރިޑް ފަހަތަށް ޖައްސާލުމަށްފަހުއެވެ. އަނެއްކޮޅުން، މި މެޗުން ބަލިވި ރަޔޯ ވަޔެކާނޯ އޮތީ ތިން މެޗުން ލިބުނު އެންމެ ޕޮއިންޓަކާއެކު ތާވަލުގެ 18ވަނައިގައެވެ.