ބޯންމަތާއި ސަންޑަރލަންޑަށް އޭސީ މިލާންގެ ބޮޑު އިމްތިޙާނެއް!

ފަރަންސޭސިވިލާތުގެ މޮނާކޯގައި ބޭއްވި ޔުއޭފާ ޔޫރޮޕާ ލީގުގެ ގުރުއަތުލުމުން، އިނގިރޭސި ޕްރިމިއަރ ލީގުގެ ބޯންމަތު އަދި ސަންޑަރލަންޑާ ދެކޮޅަށް ޔޫރަޕުގެ ގަދަބާރު އޭސީ މިލާން ނުކުންނަން ޖެހިއްޖެއެވެ. 

މިދިޔަ ސީޒަނުގެ ޕްރިމިއަރ ލީގުގެ ހަވަނަ ހޯދައިގެން ތާރީޚުގައި ފުރަތަމަ ފަހަރަށް ޔޫރަޕުގެ މުބާރާތަކުން ޖާގަ ހޯދި ބޯންމަތުން އަމިއްލަ ދަނޑުގައި މިލާނާ ދެކޮޅަށް ކުޅޭ މެޗަކީ އެ ކުލަބަށް ވަރަށް ޚާއްޞަ މެޗަކަށް ވާނެއެވެ. މާކޯ ރޯސްގެ އިރުޝާދުގެ ދަށުން ކުޅޭ ބޯންމަތުން އަމިއްލަ ދަނޑުގައި ދެން ނުކުންނާނީ ވިކްޓޯރިއާ ޕްލެޒެން، ސްޓަރމް ގްރާޒް އަދި ހަޕޮއެލް ބީރުޝޭބާއާ ދެކޮޅަށެވެ. އަދި ރަށުން ބޭރުގައި ރެއާލް ސޮސިއެޑާޑް، ސެލްޓަ ވީގޯ، ސްޕާޓާ ޕްރާގު އަދި ލިލްސްޓްރޮމްއާ ކުރިމަތިލާނެއެވެ.

އަނެއްކޮޅުން، 1973ވަނަ އަހަރަށްފަހު ފުރަތަމަ ފަހަރަށް ޔޫރަޕަށް ނުކުންނަ ސަންޑަރލަންޑުގެ ސަޕޯޓަރުން އެންމެ އިންތިޒާރުކުރާނީ ރަށުން ބޭރުގައި މިލާނާ ދެކޮޅަށް ކުޅޭ މެޗަށެވެ. މީގެ އިތުރުން ސަންޑަރލަންޑް ރަށުން ބޭރުގައި އެންޑަރލެކްޓް، ލެޗު ޕޮޒްނަން އަދި ޕޯޗުގަލްގެ ދެވަނަ ޑިވިޝަނުގައި އޮވެ ކަޕް ކާމިޔާބުކޮށްފައިވާ ޓޮރެންސޭއާ ބައްދަލުކުރާނެއެވެ. އަމިއްލަ ދަނޑުގައި އެ ޓީމު ކުޅޭނީ އޭޒީ އަލްކްމާ، ޑީނަމޯ ޒަގްރެބް، ޔަގިއެލޯނިއާ ބިއާލިސްޓޮކް އަދި ލެވްސްކީ ސޯފިއާއާއެވެ.

ހަތް ފަހަރު ޔޫރަޕުގެ ޗެމްޕިއަންކަން ހޯދާފައިވާ މިލާނުން މި ދެ ޓީމުގެ އިތުރުން ކުޅެން ޖެހެނީ ބެންފީކާ، އޭޒީ އާލްކްމާ، ފެރެންކްވަރޯސް، އާރްބީ ބާލްސްޒްބާރގް، އަރަރާތު އަރުމީނިއާ އަދި ލެވްސްކީ ސޯފިއާއާއެވެ.

މުބާރާތުގެ އެހެން ފާހަގަކޮށްލެވޭ މެޗުތަކަށް ބަލާއިރު، ޕޮޓް އެކެއްގައި ހިމެނޭ ޖަރުމަނުގެ ބަޔަރ ލެވަކޫސެން އަމިއްލަ ދަނޑުގައި ފްރާންސްގެ އޮލިމްޕިކް މާސޭއާ ބައްދަލުކުރާއިރު، ރަށުން ބޭރުގައި ކުޅޭނީ ލިއޯންއާއެވެ. އަދި އިޓަލީގެ ޔުވެންޓަސްއިން ރެއާލް ސޮސިއެޑާޑް، އާލްކްމާ އަދި ސެލްޓަ ވީގޯއާ ދެކޮޅަށް ނުކުންނަ މެޗުތަކަކީ ވެސް ފޯރިގަދަވާނެ ކަމަށް ބެލެވޭ މެޗުތަކެކެވެ.

ޔުއޭފާއިން މުބާރާތުގެ މެޗުތައް ކުޅޭނެ ތާރީޚުތައް މި ހަފުތާ ބަންދުގައި އިޢުލާނުކުރަން ނިންމާފައިވާއިރު، ފުރަތަމަ ބުރުގެ މެޗުތައް އޮންނާނީ އަންނަ ސެޕްޓެމްބަރު މަހުގެ 16އަދި 17ގައެވެ. މި މުބާރާތުގެ ފައިނަލް އަންނަ އަހަރުގެ މެއި 26ވަނަ ދުވަހު ޖަރުމަނުގެ ފްރޭންކްފަރޓްގައި ކުޅުމަށް ހަމަޖެހިފައިވާއިރު، މިދިޔަ އަހަރު މުބާރާތް ކާމިޔާބުކުރީ އިސްތަންބޫލުގައި ކުޅުނު ފައިނަލުގައި ފްރެއިބަރގް ބަލިކޮށް އެސްޓަން ވިލާއިންނެވެ.