ސަލާހުގެ ފުރަތަމަ މެޗުން ޓީމު ވީ ބަލި

ތުރުކީގެ ސުޕަރ ލީގުގައި އިސްތަންބޫލްގައި ކަސިމްޕާސާއާ ދެކޮޅަށް ކުޅުނު މެޗު 1-1އިން އެއްވަރުވެ، މިޞްރުގެ ކެޕްޓަން މުޙައްމަދު ސަލާހު ތުރަބްޒޮންސްޕޯގެ ޖާޒީގައި ކުޅުނު ފުރަތަމަ މެޗުން އެ ޓީމަށް މޮޅެއް ނުލިބި ނިންމާލަން ޖެހިއްޖެއެވެ.

ލިވަޕޫލްގައި ނުވަ ސީޒަނެއް ހޭދަކުރުމަށް ފަހު ހިލޭ ޓްރާންސްފާއެއްގެ ދަށުން ތުރަބްޒޮންސްޕޯއާ ގުޅުނު އުމުރުން 34އަހަރުގެ ފޯވާޑް، މި މެޗުގެ 58ވަނަ މިނެޓުގައި ވަނީ ކުޅެން އަރާފައެވެ. ބަދަލު ކުޅުންތެރިއެއްގެ ގޮތުގައި ކަނާތްފަރާތު ވިންގަށް ކުޅެން ނުކުމެ، ސަލާހު ވަނީ ލަނޑުޖަހާނެ ރަނގަޅު ފުރުޞަތުތަކެއް ތަނަވަސްކޮށްދީފައެވެ. ނަމަވެސް އެ ޓީމުގެ އެއްވެސް ކުޅުންތެރިއަކަށް އެއިން ފުރުޞަތެއްގެ ބޭނުން ހިފޭގޮތެއް ނުވިއެވެ.

މި މެޗުގައި ފުރަތަމަ ލަނޑުޖަހައި ކުރިހޯދީ ތުރަބްޒޮންސްޕޯއިންނެވެ. މި ލަނޑު އެ ޓީމަށް ކާމިޔާބުކޮށްދިނީ ނޯއާ ސަވިއޯލޯއެވެ. އެހެން ނަމަވެސް ދެވަނަ ހާފު ފެށުނުތާ ކުޑަ އިރުކޮޅެއްގެ ތެރޭގައި ލިބުނު ޕެނަލްޓީއެއް ކާމިޔާބުކޮށްދީ، އެޑްރިއަން ބެނެޑީޒަކް ވަނީ ކަސިމްޕާސާއަށް ނަތީޖާ ހަމަހަމަކޮށްދީފައެވެ.

މެޗުގެ ނަތީޖާއާ މެދު ހިތްހަމަނުޖެހުން ފާޅުކުރަމުން ތުރަބްޒޮންސްޕޯގެ ކޯޗު ފާތިހު ޓެކޭ ބުނީ، މިއީ އެ ޓީމަށް މޮޅުވެވެން ޖެހޭނެ މެޗެއް ކަމަށާއި އައު ސީޒަނުގެ ފެށުން ދިޔައީ އުއްމީދުކުރި ގޮތަށް ނޫން ކަމަށެވެ. މީގެ އިތުރުން، ކުރިއަށް އޮތް ބުރާސްފަތި ދުވަހު ޔޫރޮޕާ ލީގުގެ ޕްލޭއޮފްގައި ހަންގޭރީގެ ފެރެންސްވަރޯސްއާ ދެކޮޅަށް ކުޅޭ މެޗަކީ އުނދަގޫ އަދި އެހާމެ މުހިންމު ކުރިމަތިލުމެއްކަން އޭނާ ފާހަގަކުރިއެވެ. ފާތިހު ދެކޭގޮތުގައި ވޭތުވެދިޔަ ސީޒަން ލީގުގެ ތިންވަނައިގައި ނިންމާލި ތުރަބްޒޮންސްޕޯއަށް ވުރެ ފެރެންސްވަރޯސް ހުރިހާ ގޮތަކުން ވެސް ވަރުގަދަވާނެއެވެ.

މިމަހުގެ ކުރީކޮޅު ދެ އަހަރުގެ އެއްބަސްވުމެއްގައި ތުރަބްޒޮންސްޕޯއަށް ސޮއިކުރި ސަލާހަކީ ފުޓުބޯޅައިގެ ދުނިޔޭގައި ގިނަ ކާމިޔާބީތަކެއް ހޯދާފައިވާ ކުޅުންތެރިއެކެވެ. "މިޞްރުގެ ރަސްގެފާނު"ގެ ލަޤަބު ހޯދާފައިވާ ކެޕްޓަން ވަނީ އިނގިރޭސި ޕްރިމިއަރ ލީގުގެ އިތުރުން ޔުއޭފާ ޗެމްޕިއަންސް ލީގުގެ ތަށި ވެސް ލިވަޕޫލާ އެކު އުފުލާލާފައެވެ.