އުރީދޫ ނޭޝަންގެ އެހީތެރިކަމާއެކު ޔޫތު ހަބްގައި ނިމިގެންދިޔަ "ޕަބްޖީ މޮބައިލް ނޭޝަނަލް ޗެމްޕިއަންޝިޕް މޯލްޑިވްސް 2026"ގެ އެންމެ ކުރީގެ މަޤާމުތައް ހޯދައިގެން، "ސައުތު އޭޝިއާ ރީޖަނަލް ޗެމްޕިއަންޝިޕް 2026"ގައި ދިވެހިރާއްޖެ ތަމްސީލުކުރުމުގެ ޓިކެޓް ރާއްޖޭގެ ތިން އީސްޕޯޓްސް ޓީމަކުން ކަށަވަރުކޮށްފިއެވެ.
މިދިޔަ ހުކުރު އަދި ހޮނިހިރު ދުވަހު ކުރިއަށް ދިޔަ މި ޤައުމީ މުބާރާތުގެ ފައިނަލް ބުރުގައި ޖުމްލަ ސޯޅަ ޓީމަކުން ވަނީ ފޯރިގަދަ ދިހަ މެޗެއް ކުޅެފައެވެ. މި މެޗުތަކުން އެންމެ ގިނަ ޕޮއިންޓު ހޯދައިގެން މުބާރާތުގެ ތަށި އުފުލާލީ "ސިންޑިކޭޓް" އިންނެވެ. މުބާރާތުގެ ރަނަރއަޕްކަން "އެލްއެންއެން އެސްޑީއެމްޒެޑް" އަށް ލިބުނުއިރު، ތިންވަނަ މަޤާމު ޙާޞިލުކުރީ "ޑީސީއެމް ޑީއެމްޓީ" އިންނެވެ.
މި ކާމިޔާބީއާ ގުޅިގެން އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ޙުސައިން ނިޔާޒު ވަނީ، ދިވެހިރާއްޖޭގެ އީސްޕޯޓްސް ކުޅުންތެރިންނަށް ބައިނަލްއަޤުވާމީ ފެންވަރުގައި ހުނަރު ދައްކާލުމުގެ ފުރުޞަތު ތަނަވަސްކޮށްދިނުމަކީ އެ ކުންފުނީގެ މައިގަނޑު އެއް އަމާޒުކަން ފާހަގަކުރައްވާފައެވެ. އަދި ސަރަޙައްދީ މުބާރާތަކަށް ރާއްޖޭގެ ޓީމުތައް ދަތުރުކުރުމަކީ މުޅި ޤައުމަށް ލިބިގެންދިޔަ ވަރަށް ބޮޑު ފަޚުރެއްކަމުގައި އޭނާ ވިދާޅުވިއެވެ.
އުރީދޫގެ "ޑިޖިޓަލް މޯލްޑިވްސް"އަމާޒުގެ ދަށުން، އުރީދޫ ނޭޝަން މެދުވެރިކޮށް ރާއްޖޭގެ ވީޑިއޯ ގޭމް ކުޅޭ ފަރާތްތަކަށް އަންނަނީ ގިނަގުނަ ފުރުޞަތުތަކެއް ފޯރުކޮށްދެމުންނެވެ. މިގޮތުން، ދެކުނު އޭޝިއާގެ މުބާރާތުގައި ވާދަކުރާ ދިވެހި ތިން ޓީމަށް އެ ކުންފުނިން ވަނީ ހޫނު މަރުޙަބާއެއް ކިޔައި، ބައިނަލްއަޤުވާމީ މައިދާނުގައި ފުރިހަމަ ކާމިޔާބީއަކަށް އެދިފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.