މީހަކު ޒަޚަމްކޮށްލި މައްސަލައިގައި ޓޯނީގެ މައްޗަށް ދައުވާކޮށްފި

ލަންޑަނުގެ ސޯހޯ ސަރަހައްދުގައި ހުންނަ ނައިޓް ކްލަބެއްގެ ތެރޭގައި މިދިޔަ އަހަރުގެ ޑިސެމްބަރު މަހު މީހަކަށް ހަމަލާދީ މާރާމާރީ ހިންގިކަމުގެ ތުހުމަތުގައި އިނގިރޭސި ފޯވާޑް އައިވަން ޓޯނީގެ މައްޗަށް ޖުލައި 31ވަނަ ދުވަހު ދައުވާ އުފުލައިފިއެވެ.

މެޓްރޯޕޮލިޓަން ފުލުހުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ނޯތުހެމްޕްޓަނަށް ނިސްބަތްވާ އުމުރުން 30އަހަރުގެ ކުޅުންތެރިޔާގެ މައްޗަށް އުފުލާފައިވަނީ މީހެއްގެ ހަށިގަނޑަށް ގެއްލުންދިނުމުގެ ޖިނާއީ ދައުވާއެކެވެ. ފުލުހުން ބުނި ގޮތުގައި މި ދައުވާ ގުޅެނީ ޑިސެމްބަރު މަހުގެ 6ވަނަ ދުވަހު ވާޑޯ ސްޓްރީޓްގެ ކްލަބެއްގައި ހިނގި ހާދިސާއަކާއެވެ. މި މައްސަލައިގެ ޝަރީއަތަށް އޭނާ އަންނަ ސެޕްޓެމްބަރު މަހުގެ 24ވާ ބުރާސްފަތި ދުވަހު ވެސްޓްމިންސްޓަރ މެޖިސްޓްރޭޓް ކޯޓަށް ހާޒިރުވުމަށް ވަނީ އަންގާފައެވެ.

ޓޯނީ ކޯޓަށް ހާޒިރުވާންޖެހޭ ދުވަސް ދިމާވަނީ، ޔުއެފާ ނޭޝަންސް ލީގުގައި ދުނިޔޭގެ ޗެމްޕިއަން ސްޕެއިނާ ދެކޮޅަށް ވެމްބްލީ ސްޓޭޑިއަމްގައި އިނގިރޭސި ގައުމީ ޓީމު ކުޅުމަށް ހަމަޖެހިފައިވާ މެޗުގެ ދެ ދުވަސް ކުރިއާއެވެ.

މިދިޔަ ސީޒަނުގައި ސައުދީ ޕްރޯ ލީގުގެ އަލް-އަހްލީއަށް 42ލަނޑު ކާމިޔާބުކޮށްދީފައިވާ ޓޯނީއަކީ ބްރެންޓްފޯޑްގެ ކުރީގެ ތަރިއެކެވެ. ފީފާ ވޯލްޑް ކަޕަށް އެކުލަވާލި އިނގިރޭސި ސްކޮޑުގައި ވެސް އޭނާ ހިމެނުނު ނަމަވެސް، ކޯޗު ތޯމަސް ޓުޗެލްގެ ބެލުމުގެ ދަށުން އެ މުބާރާތުގައި އޭނާއަށް ކުޅުމުގެ މާގިނަ ފުރުސަތުތަކެއް ލިބިފައެއް ނުވެއެވެ.