އަނިޔާއިން އެއްކޮށް ފަސޭހަވެފައި ނުވާތީ، އެމެރިކާގައި އޮގަސްޓު މަހު ބާއްވާ ސިންސިނާޓީ އޯޕަން ޓެނިސް މުބާރާތުގައި ވާދަނުކުރުމަށް، އެ މުބާރާތުގެ އެންމެ ފަހުގެ ޗެމްޕިއަން ސްޕެއިންގެ ކާލޯސް އަލްކަރާޒް ނިންމައިފިއެވެ.
އުމުރުން 23އަހަރުގެ ހުނަރުވެރި ކުޅުންތެރިޔާ މި ފަހަރުގެ މުބާރާތް ދޫކޮށްލަން ޖެހުނުއިރު، އޭނާއަށް ވަނީ މި އަހަރުގެ އެޕްރީލް މަހު ކުރިއަށްދިޔަ ބާސެލޯނާ އޯޕަންއިން ވެސް ފުރުސަތު ގެއްލިފައެވެ. ފްރެންޗް އޯޕަންގެ ތަށި ދިފާއުކުރުމަށް ނުކުމެ އުޅެނިކޮށް ކުރިމަތިވި މި އަނިޔާގެ ސަބަބުން، ދާދި ފަހުން ނިމިގެންދިޔަ ވިމްބަލްޑަން މުބާރާތުގައި ވެސް އޭނާއަށް ކުޅެވޭގޮތް ވަނީ ނުވެފައެވެ. އަދި މިހާތަނަށް ވެސް މުޅިން ފިޓްވެ، ވާދަވެރި ކުޅުމަކަށް އެނބުރި އައުމަށް އޭނާއަށް ވަނީ ގިނަ ހުރަސްތަކަކާ ކުރިމަތިވެފައެވެ.
ދުނިޔޭގެ ރޭންކިންގެ ތިންވަނަ މަގާމުގައި މިހާރު އޮތް އަލްކަރާޒްއަކީ މިދިޔަ އަހަރުގެ ސިންސިނާޓީ އޯޕަންގެ ތަށި އުފުލާލި ކުޅުންތެރިޔާއެވެ. އެ ފަހަރުގެ މުބާރާތް އޭނާ ކާމިޔާބުކުރީ ދުނިޔޭގެ ރޭންކިންގެ އެއްވަނައިގައި މިވަގުތު އޮތް އިޓަލީގެ ޔަނިކް ސިނާ ބަލިކުރުމަށްފަހުގައެވެ.
މި އަހަރުގެ ސިންސިނާޓީ އޯޕަން ކުރިއަށް ގެންދިއުމަށް ހަމަޖެހިފައިވަނީ އޮގަސްޓް 13ވަނަ ދުވަހުން ފެށިގެން 23ވަނަ ދުވަހުގެ ނިޔަލަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.