އަލްޖީރިއާގެ ކޯޗުކަމުން ވްލަޑިމިއާ ޕެޓްކޮވިޗް ވަކިވެއްޖެ

ފީފާ ވޯލްޑް ކަޕް 2026ގެ ދެވަނަ ބުރުން އަލްޖީރިއާ ކަޓާފައި ވަނިކޮށް، ދެ ފަރާތް އެއްބަސްވެގެން އެ ޤައުމުގެ ޤައުމީ ފުޓުބޯޅަ ޓީމުގެ ހެޑް ކޯޗު ވްލަޑިމިއާ ޕެޓްކޮވިޗް އޭނާގެ މަޤާމުން މިއަދު ވަކިވެއްޖެއެވެ.

އަލްޖީރިއާގެ ފުޓްބޯޅަ ފެޑެރޭޝަނުން އާންމުކުރި ރަސްމީ ބަޔާނެއްގައި ހާމަކޮށްފައިވާ ގޮތުން، ބޮސްނިއާއަށް އުފަން އުމުރުން 62އަހަރުގެ ކޯޗާއި އޭނާގެ އެސިސްޓެންޓުންގެ ޓީމާ އެކު ހަދާފައިވާ ކޮންޓްރެކްޓް ވަނީ ރަސްމީކޮށް ނިމުމަކަށް ގެނެސްފައެވެ. ފާހަގަކޮށްލެވޭ ގޮތުގައި މިއަހަރުގެ ފެބްރުއަރީ މަހު ޓީމާ ހަވާލުވި ޕެޓްކޮވިޗް ވަނީ، ދާދި ފަހުން އުތުރު އެމެރިކާގައި ބޭއްވި ވޯލްޑް ކަޕަށް ފުރުމުގެ ކުރިން 2028ވަނަ އަހަރުގެ ނިޔަލަށް އޭނާގެ އެއްބަސްވުމުގެ މުއްދަތު އާކޮށްފައެވެ.

މި ފަހަރުގެ ވޯލްޑް ކަޕްގައި ޖުމުލަ 48ޤައުމު ވާދަކުރިއިރު، އަލްޖީރިއާއަށް މުބާރާތުގެ ނޮކްއައުޓް ބުރުން ޖާގަ ލިބުނީ ގްރޫޕް ސްޓޭޖުގެ ތިންވަނައަށް ދިޔަ ޓީމުތަކުގެ ތެރެއިން އެންމެ ނަތީޖާ ރަނގަޅު އަށް ޓީމުގެ ތެރޭގައި ހިމެނިގެންނެވެ. ނަމަވެސް މުބާރާތުގެ ދެވަނަ ބުރުގައި ސްވިޒަލެންޑާ ދެކޮޅަށް ކުޅުނު މެޗުން 2-0ގެ ނަތީޖާއަކުން ބަލިވުމާއެކު، އަލްޖީރިއާއަށް ވަނީ މުބާރާތް ނިމިފައެވެ.

ކޯޗާ ނުލައި އަލްޖީރިއާގެ ޓީމުން ދެން ތައްޔާރުވާން ޖެހިފައި ވަނީ 2027ވަނަ އަހަރު އޮންނަ އެފްރިކާ ކަޕް އޮފް ނޭޝަންސްގެ ކޮލިފައިން މެޗުތަކަށެވެ. އަންނަ ސެޕްޓެމްބަރު މަހުގެ ތެރޭގައި ފަށަން ހަމަޖެހިފައިވާ މި ކޮލިފައިންގައި އަލްޖީރިއާ ލައްވާލާފައިވަނީ ޓޯގޯ، ބުރުންޑީ އަދި ޒެމްބިއާއާއެކު ގްރޫޕް "އައި"ގައެވެ.