ފުޓްބޯޅަ ލެޖެންޑް ފްރާންކޯ ބަރޭސީ މަރުވެއްޖެ

ފުއްޕާމޭގެ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް، އޭސީ މިލާނާއި އިޓަލީ ގައުމީ ޓީމުގެ ކުރީގެ ކެޕްޓަން އަދި ދުނިޔޭގެ ފުޓްބޯޅައިގެ ތާރީޚުގައި އުފެދުނު އެންމެ މޮޅު އެއް ޑިފެންޑަރު ކަމަށްވާ ފްރާންކޯ ބަރޭސީ އުމުރުން 66އަހަރުގައި މިއަދު މަރުވެއްޖެއެވެ.

ބަރޭސީ މަރުވިކަން ހާމަކޮށް އޭސީ މިލާނުން ނެރުނު ބަޔާނެއްގައި ބުނީ، މިއީ އެ ކުލަބުގެ އާއިލާއަށް ލިބުނު ފުން ހިތާމައެއް ކަމަށާއި، ކުލަބުގެ ތާރީޚުގައި އޭނާގެ ހަނދާންތައް އަބަދަށް ދެމިއޮންނާނެ ކަމަށެވެ. އަދި އޭނާ ދައްކައިދިން ސާބިތުކަމަކީ ފަހުގެ ޖީލުތަކަށް އޮތް ފުރިހަމަ ނަމޫނާއެއްކަމަށް އެ ކުލަބުން ވަނީ ސިފަކޮށްފައެވެ. ފާއިތުވި އަހަރު މިލާނުގެ އޮނަރަރީ ނައިބު ރައީސްކަން ވެސް ކުރި ބަރޭސީ ވަނީ ދާދި ފަހުން ފުއްޕާމޭގެ އޮޕަރޭޝަނެއް ވެސް ކޮށްފައެވެ.

އިޓަލީގެ ފުޓްބޯޅައިގެ ރަން ޒަމާން ކަމަށްވާ 1980އާއި 1990ގެ އަހަރުތަކުގައި އެންމެ ބޮޑަށް ވިދާލި މި ކުޅުންތެރިޔާގެ ވިހި އަހަރުގެ ދިގު ކެރިއަރު އެއްކޮށް ހޭދަކުރީ އޭސީ މިލާނުގައެވެ. އޭގެ ތެރެއިން 15ސީޒަނުގައި ޓީމު ގޮވައިގެން ނުކުތީ ކެޕްޓަނެއްގެ ގޮތުގައެވެ. އޭނާގެ ކެޕްޓަންކަމުގެ ދަށުން މިލާނުން ވަނީ ޔޫރަޕުގެ ޝަރަފުވެރި ތިން މުބާރާތާއި އިޓާލިއަން ލީގު ހަ ފަހަރު ކާމިޔާބުކޮށްފައެވެ. ބަރޭސީއަށް އިޙުތިރާމް އަދާކުރުމުގެ ގޮތުން މިލާނުން ވަނީ އޭނާ ބޭނުންކުރި 6ނަންބަރު ޖާޒީ ރިޓަޔާކޮށްފައެވެ. މިއީ އެ ކުލަބުގެ ދިގު ތާރީޚުގައި ވެސް ކުޅުންތެރިއަކަށް މިފަދަ ޝަރަފެއް އެރުވި ފުރަތަމަ ފަހަރެވެ.

ގައުމީ ޓީމާއެކު ވެސް ގިނަ ކާމިޔާބީތަކެއް ހޯދާފައިވާ ބަރޭސީއަކީ 1982ވަނަ އަހަރުގެ ވޯލްޑް ކަޕް އުފުލާލި އިޓަލީ ޓީމުގެ މުހިންމު ހިއްސާއެކެވެ. މީގެ އިތުރުން 1994ވަނަ އަހަރުގެ ވޯލްޑް ކަޕް ފައިނަލުގައި ކަކުލުގެ އޮޕަރޭޝަނަކަށް ފަހު އެންމެ 25ދުވަސް ތެރޭގައި އެނބުރި އައިސް 120މިނެޓު ކުޅުނު މެޗަކީ އޭނާގެ އަޒުމާއި ހިތްވަރު މުޅި ދުނިޔެއަށް ސާބިތުކޮށްދިން މެޗެކެވެ. 

ބަރޭސީ އެންމެ ބޮޑަށް ފާހަގަކުރެވިފައިވަނީ އޭސީ މިލާނަށް އޭނާ ބެހެއްޓި ލާމަސީލު ވަފާތެރިކަމުގެ ސަބަބުންނެވެ. އެގޮތުން 1980ގެ އަހަރުތަކުގެ ކުރީކޮޅު ކުލަބަށް ދިމާވި މައްސަލަތަކާހުރެ ދެ ފަހަރެއްގެ މަތިން ދެވަނަ ޑިވިޝަނަށް ވެއްޓުނު ދަނޑިވަޅުގައި ވެސް ޓީމު ދޫކޮށް ނުގޮސް، އަލުން އެންމެ މަތީ ފަންތިއަށް ކުލަބު ގެނެސްދިނުމުގައި އޭނާގެ ދައުރު ވަރަށް ބޮޑެވެ.