ޤައުމީ ޓީމުގެ ކޯޗަކު ހޯދުމުގެ މައްސަލައިގައި އުފެދުނު ޚިޔާލު ތަފާތުވުންތަކަކަށް ފަހު، އިޓަލީގެ ފުޓްބޯޅަ ފެޑެރޭޝަނުގެ ޓެކްނިކަލް ޑައިރެކްޓަރުގެ މަގާމާ ހަވާލުވިތާ އެންމެ 16ދުވަހުގެ ތެރޭގައި ޕައޮލޯ މަލްޑިނީއާއި އޭނާގެ އެޑްވައިޒަރު ލިއޮނާޑޯ ކުއްލި ގޮތަކަށް އިސްތިއުފާދީފިއެވެ.
ޖެހިޖެހިގެން ތިންވަނަ ފަހަރަށް ވޯލްޑް ކަޕުން އިޓަލީއަށް ޖާގަ ނުލިބުމާ ގުޅިގެން، ޓީމު އަލުން އެކުލަވާލުމުގެ ބޮޑު މަސްއޫލިއްޔަތާ އެކު މި މަހުގެ 11ވަނަ ދުވަހު މަލްޑިނީއާ ވަނީ މުހިންމު ޒިންމާތަކެއް ހަވާލުކޮށްފައެވެ. އޭނާގެ އެންމެ އިސް ވާޖިބަކަށް އޮތީ ޖެނާރޯ ގަޓޫސޯގެ ބަދަލުގައި އައު ކޯޗަކު ހަމަޖެއްސުމެވެ. ޕެޕް ގާޑިއޯލާ އެ ހުށަހެޅުމަށް ނޫނެކޭ ބުނުމުން، މަލްޑިނީ ދެން އެންމެ ބޮޑަށް މަސައްކަތްކުރީ އިޓަލީގެ ލެޖެންޑް އަންދްރެއާ ޕިރްލޯ އެ މަގާމަށް ގެނައުމަށެވެ.
އެހެން ނަމަވެސް، ރަޝިއާގެ ބެޓިން ކުންފުންޏަކާ އެކު ޕިރްލޯ އޮންނަ ވިޔަފާރީގެ ގުޅުމަކާ ހުރެ އަމާޒުވި ފާޑުކިޔުންތަކާއެކު، އޭނާ ވަނީ ޤައުމީ ޓީމާ ހަވާލުނުވާނެކަން ހާމަކޮށްފައެވެ. ރިޕޯޓުތައް ބުނާގޮތުން، ބްރެޒިލްގެ ކުރީގެ ތަރި ލިއޮނާޑޯ އާއި މަލްޑިނީ މަގާމުން ދުރަށް ދިޔައީ ޕިރްލޯގެ ނިންމުން އިއުލާންކުރިތާ ކުޑަ ވަގުތުކޮޅެއްގެ ތެރޭގައެވެ.
މިއީ އިޓަލީގެ ފުޓްބޯޅަ ފެޑެރޭޝަނާ އަލަށް ހަވާލުވި ރައީސް ޖިއޮވާނީ މަލަގޯއަށް ކުރިމަތިވި ވަރަށް ބޮޑު ގޮންޖެހުމެކެވެ. ވޯލްޑް ކަޕުން ކެޓުމުގެ އިތުރުން، ޔޫރަޕުގެ މުބާރާތްތަކުގައި އިޓަލީގެ ކުލަބުތަކުން ދަށް ނަތީޖާތަކެއް ނެރެފައިވުމާ އެކު، ފާއިތުވި 40އަހަރު ދުވަހުގެ ތެރޭގައި އެ ޤައުމުގެ ފުޓްބޯޅަ ނުވެއްޓޭހާ ދަށު ދަރަޖައަކަށް މިހާރު ވަނީ ވެއްޓިފައެވެ. މަލްޑިނީގެ އިސްތިއުފާއާ އެކު، ހުސްވެފައިވާ ކޯޗުގެ މަގާމަށް ދެން އެންމެ ގަދަޔަށް އިވެނީ ތަޖުރިބާކާރު ކޯޗުން ކަމަށްވާ ރޮބާޓޯ މަންޗިނީ، އެންޓޯނިއޯ ކޮންޓޭ ނުވަތަ ތިއާގޯ މޮޓާގެ ނަމެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.