ރެއާލަށް ކުޅޭ އައިވަރީ ކޯސްޓުގެ ފުރަތަމަ ކުޅުންތެރިޔަކަށް ޑިއޮމޮންޑް!

ޖަރުމަނުގެ އާރްބީ ލައިޕްޒިގަށް ކުޅެމުން އައި އައިވަރީ ކޯސްޓުގެ އުމުރުން 19އަހަރުގެ ހުނަރުވެރި ފޯވަޑް ޔާން ޑިއޮމޮންޑް، 117މިލިއަން އެމެރިކާ ޑޮލަރުގެ ބޮޑު ފީއަކަށް ސްޕެއިންގެ ގަދަބާރު ރެއާލް މެޑްރިޑަށް ބަދަލުވާން ނިންމައިފިއެވެ.

ފްރާންސްގެ ޕެރިސް ސެންޓް ޖާމަން (ޕީއެސްޖީ)އިން ވެސް މި ޒުވާން ކުޅުންތެރިޔާ ހޯދުމަށް ގިނަގުނަ މަސައްކަތްތަކެއް ކޮށްފައި ވަނިކޮށް، ރެއާލުން ވަނީ މި ރޭސް ކާމިޔާބުކޮށްފައެވެ. މި ޓްރާންސްފާއާ އެކު އޭނާ ވެގެންދާނީ ތާރީޚުގައި ވެސް ރެއާލް މެޑްރިޑްގެ ޖާޒީލާނެ އައިވަރީ ކޯސްޓަށް ނިސްބަތްވާ ފުރަތަމަ ފުޓުބޯޅަ ކުޅުންތެރިޔާއަށެވެ.

ރިޕޯޓުތައް ބުނާގޮތުން، ކުރިއަށް އޮތް ހަފުތާގެ ތެރޭގައި ސްޕެއިނަށް ދަތުރުކޮށް، ކްލަބުގެ މެޑިކަލް ޓެސްޓުތައް ފުރިހަމަކުރުމަށް ފަހު ފަސް އަހަރުގެ މުއްދަތަކަށް ޑިއޮމޮންޑް އެ ޓީމާ އެކު އެއްބަސްވުމުގައި ސޮއިކުރާނެއެވެ. ނިމިދިޔަ ފީފާ ވޯލްޑް ކަޕްގައި ގައުމީ ޓީމު ތަމްސީލުކޮށްފައިވާ މި ހުނަރުވެރި ތަރި ވަނީ ފާއިތުވި ސީޒަނުގެ ބުންޑެސްލީގާގައި 12ލަނޑު ކާމިޔާބުކޮށްފައެވެ.

ރެއާލް މެޑްރިޑުން ކުރީކޮޅަށް ކުޅޭ އައު ކުޅުންތެރިޔަކު ގެނެސްފައި މިވަނީ، އެ ޓީމުގެ މުހިންމު ފޯވަޑް ވިނީޝިއަސް ޖޫނިއާ އެހެން ކްލަބަކަށް ބަދަލުވެދާނެކަމުގެ އަޑުތަކެއް ފެތުރިފައިވާ ދަނޑިވަޅެއްގައެވެ. އިނގިރޭސި ޕްރިމިއާ ލީގުގެ އާސެނަލުން ވިނީޝިއަސްއަށް ފާރަލަމުންދާއިރު، އޭނާ ދޫކޮށްލަން ރެއާލުން ބޭނުންވަނީ މަދުވެގެން 182މިލިއަން ޑޮލަރުގެ ބިޑެއް ލިބުމުންނެވެ. މިވަގުތު އޭނާގެ ކޮންޓްރެކްޓުގައި ބާކީ އެންމެ އަހަރެއް އޮތް ނަމަވެސް، އެއްބަސްވުން އާކުރުމާ މެދު އަދި ދެ ފަރާތަށް ގޮތެއް ނިންމިފައެއް ނުވެއެވެ.